2 SAMUEL 20 - BIBEL JAMITA NA DENGGAN

Si Seba mambaen paraloan

¹ Di kota Gilgal adong ma sada bayo panggaori si Seba goarna. Anak ni si Bikri do i sian Marga Benyamin. Dompak na ro angka na mangudurkon si Daud, dipalu si Seba ma sarune jana manggora-gora ma ia, “Nada adong parsambunganta dohot si Daud. Tu ahanta ma mangihutkon ia? Jo hamu halak Israel, beta mulak be hita!”

² Dung i markehean be ma antong halak Israel i manadingkon si Daud jana diihutkon halahi si Seba. Tapi anggo halak Juda tongtong do burju mangudurkon si Daud sian Batang aek Jordan lopus tu Jerusalem.

³ Dung lalu si Daud di bagas godangnia na di Jerusalem i, dibaen ia ma rading sisampulu halak na nitadingkon i manjago bagas godang i di bagasan sada bagas na dijago ni pangawal. Tuk do dibaen na porlu di halahi, tapi nada jungada be si Daud modom rap dohot halahi. Jadi gabe dipingit ma halahi jana songon na mabalu noma ngolu ni halahi lopus mate.

⁴ Didok si Daud ma tu si Amasa, “Palagut ma sude halak Juda, jana ro ma ho tuson rap dohot halahi di bagasan tolu ari.”

⁵ Jadi kehe ma si Amasa laho palagutkon halahi, hape nada mulak ia di na nitontuhon ni raja i.

⁶ Dung i didok raja i ma tu si Abisai, “Sumusa dope hita baenon ni si Seba ulang pado si Absalom. Antong anggo songon i, oban ma paranganki jana kojar ma si Seba, anso ulang jabat diingani ia angka kota na marbenteng jana malua sian hita.”

⁷ Jadi si Abisai ma mamimpin pasukan ni si Joab dohot tentara pangawal ni raja i maradu sude tentara na deba nari, kehe ma halahi sian Jerusalem laho mangkojar si Seba.

⁸ Dung lalu halahi di batu na godang na di Gibeon, ro ma si Amasa mandapotkon halahi. Marpakean porang do si Joab, mamake podang na marsarung na tambat di gontingnia. Di na mardalan ia tu jolo, taldus ma sarung ni podang i gabe rumar ma podangna i tu tangan siambirangnia.

⁹ Didok si Joab ma tu si Amasa, “Aha do barita, dongan?” ning ia lalu ditiop ia janggut ni si Amasa dohot tangannia siamun tarsongon na giot mangumma ia.

¹⁰ Nada diida si Amasa podang na di tangan siambirang ni si Joab i. Tompu ma ditihamkon si Joab podang i tu butuha ni si Amasa, jabat use isi ni butuha ni si Amasa i tu tano. Mate disi do si Amasa, gabe nada pola porlu be tihamon ni si Joab ia mangulahi. Dung i dipatorus si Joab dohot si Abisai angginia ma mangkojar si Seba.

¹¹ Jongjong ma sada halak tentara ni si Joab di lambung ni bangke ni si Amasa i jana pio-pio, “Sanga ise na mamihak tu si Joab dohot si Daud, diihutkon ma si Joab!”

¹² Payak di tongan dalan i ma bangke ni si Amasa na margulu mudar i. Diida tentara ni si Joab sinangkin ma, sai maradian sude na mamolus disi. Jadi hara ni i, disarat ia ma bangke i tu ladang i jana ditutupi ia dohot ulos.

¹³ Dung dipaduru bangke i sian dalan i, sude ma halak torus mardalan mangihutkon si Joab laho mangkojar si Seba.

¹⁴ Ma pola dibolus si Seba sude luat ni marga ni Israel, dung i lalu ma ia di kota Abel-Bet-Maaka, diihutkon sude na marmarga Bikri.

¹⁵ Tarbege ma tu parangan ni si Joab na di kota i si Seba, lalu dihobuk halahi ma kota i. Ditimbun halahi ma tano humaliang tembok parruar jana dipungka muse ma manghuar di toru ni tembok i laho mangunggalkonsa.

¹⁶ Adong do di kota i sada anakboru na bisuk. Jongjong ma anakboru i di ginjang ni tembok lalu manggora-gora ma ia, “Tangihon! Tangihon! Pangido hamu ma anso ro si Joab tuson; giot mangkobari au dohot ia.”

¹⁷ Dung i ro ma si Joab jana disapai anakboru i ma tusia, “Tuan i dehe si Joab?” “Olo,” ning ia mangalusi. Didok anakboru i ma, “Tangihon ma na hudokkon on, tuan.” “Hutangihon pe,” ning si Joab mangalusi.

¹⁸ Didok anakboru i ma, “Anggo najolo somalna songon on do didok halak, ‘Muda porlu di ho panogu-noguon, kehe ma ho tu kota Abel,’ – jana songon i do tutu dibaen halahi.

¹⁹ Godang do kota Abelnami on – on ma sada kota na dumame dohot na tigor di tano Israel. Biasi giot roncohonon ni tuan i kota on? Na por dehe rohamu manyegohon tano ni Tuhan?”

²⁰ “Nada” ninna si Joab mangalusi, “nada adong saotik pe maksudku laho manyegohon sanga mangaroncohon kotamunu on!

²¹ Nada songon i anggo rohanami. Tapi adong sada bayo na margoar si Seba pompar ni si Bikri, na marasal sian luat na di partoran Efraim na mambaen paraloan tu Raja Daud. Pasahat ma bayo i, anso kehe au mundur sian kota on.” Didok anakboru i ma, “Hami danggurkon pe ulu ni bayo i tu tuan i sian tembok on.”

²² Dung i kehe ma ia jana dipalalu ia ma maksudnia i tu halak kota i. Dung i diponggolkon halahi ma ulu ni si Seba i jana didanggurkon tu si Joab. Dung i diombus si Joab ma sarune, jana kehe ma parangannia i manadingkon kota i mulak tu ingananna be. Kehe ma si Joab mulak tu Jerusalem mangadop tu raja i.

Angka pagawe ni si Daud

²³ Angka on ma parpangkat na gincat na niangkat ni si Daud: Panglima ni sude tentara ni Israel: Si Joab. Kepala ni tentara pengawal ni si Daud (halak Kreti dohot Pleti): Si Benaya anak ni si Joyada.

²⁴ Kepala ni parkarejo paksa: Si Adoniram. Bendahara ni harajaan: Si Josafat anak ni si Ahilud.

²⁵ Sekretaris ni harajaan: Si Seya. Malim: Si Zadok dohot si Abyatar.

²⁶ Malim di bagas godang: Si Ira na sian kota Jair.