2 SAMUEL 17 - BIBEL JAMITA NA DENGGAN

Disursari si Husai sangkap ni si Ahitofel

¹ Nada sadia honok dung salpu i, didok si Ahitofel muse ma tu si Absalom, “Paloas ma hupili dua bolas ribu halak. Naron borngin giot kehe ma au mangkojar si Daud.

² Hatiha gale ia jana manderse disi ma ia hualo. Tarsonggot ia baenonku lopus maporus sude parangannia i. Hum Raja Daud sajo do na giot bunuonku.

³ Jana sude parangannia i, paulahonku ma tu raja i songon boru na mulak tu halaklahina. Nada he gumonan hosa ni sada halak di raja lakna? Anggo na asing i indangkon nihahua.”

⁴ Denggan do sipaingot i diida si Absalom songon i muse di sude pamimpin ni Israel.

⁵ Tapi haru songon i pe didok si Absalom dope, “Saonnari dipio jolo si Husai; tole tabege pandapotnia.”

⁶ Di na ro si Husai mangadop, dipaboa si Absalom ma sangkap ni si Ahitofel; lalu didok ia ma, “Ihutkononta dehe sipaingotnia i? Muda inda ningmu, baen usul na asing.”

⁷ Dialusi si Husai ma, “Anggo sanoli on, nada denggan usul ni si Ahitofel i.

⁸ Torang do diboto raja i, anggo si Daud dohot parangannia i angka parporang na barani do. Na songon gompul boru-boru na agoan anak do jingar ni halahi. Boti muse, si Daud sandiri pe parajurit na marpangalaman do i na so jungada modom rap dohot parangannia.

⁹ Saborngin on pe aropku martabuni di bagasan sada liang do ia sanga di inganan na asing. Antong, sugari ma rupani dialo si Daud parangan ni raja i jadi sanga ise na umbege i, dokkononna ma, madung talu parangan ni si Absalom.

¹⁰ Jadi salangkan angka jolma na umbarani dohot na songon jingar ni singa pe gabe mabiar noma. Angke sude do halak Israel umbotosa na parporang do amang ni raja i, jana angka paranganna pe angka parporang na barani do.

¹¹ Jadi anggo au mandok songon on do: Palagut ma sude halak Israel sian Dan lalu tu Berseba, lopus songon horsik na di topi ni laut bahatna. Jadi daulat i sandiri ma mamimpin halahi marporang.

¹² Sanga na di dia pe si Daud dapot hita ma i, jana tapajolo ma mamorangi ia painte so diboto ia dope sanga aha na masa. Nada adong na bolas luncat, sanga na ia pe dohot parangannia i.

¹³ Sugari marlojong ia tu bagasan sada kota, buaton ni rayatta i ma tali jana saratonna ma kota i lalu dabuhonon ni halahi tubagasan rura na donok tu kota i. Sada batu pe nada adong na tading baenonna di ginjang ni tor i.”

¹⁴ Umbege i didok si Absalom dohot halak Israel i ma sude, “Dumenggan do na nidok ni si Husai on sian sipaingot ni si Ahitofel i.” Tutu ma antong na dung diputuskon Tuhan laho manyundati sipaingot ni si Ahitofel na denggan i, anso marmara si Absalom.

Si Daud palua dirina

¹⁵ Dung i dipaboa si Husai ma tu Malim Zadok dohot Malim Abyatar, sipaingot ni si Ahitofel dohot sipaingotnia i sandiri tu si Absalom dohot tu angka pamimpin ni Israel i.

¹⁶ Didok si Husai ma, “Ompoti ma! Paboa ma tu si Daud anso ulang marborngin ia di panariparan ni batang aek na di halongonan i. Angkon tariparannia ma manigor Batang aek Jordan. Anggo inda songon i maropuk ma ia dohot tentarania i baenonna.”

¹⁷ Jadi painte-intehon ma si Jonatan anak ni si Abyatar dohot si Ahimaas anak ni si Zadok i di lambung ni mual En-Rogel na di topi ni kota Jerusalem i. Nada puluk be halahi masuk tu kota i, angke mabiar halahi diida halak. Songon somalna, adong do sada anakboru parkobas na palaluhon tu halahi barita sipalaluon tu Raja Daud.

¹⁸ Hape adong ma sada dakdanak halaklahi na midaan halahi, jana dipaboa dakdanak i ma tu si Absalom. Jadi diompoti halahi noma kehe lalu martabuni di bagas ni sada halak huta Bahurim. Di lambung ni bagasna i adong do sumur jana tu sumur i ma halahi masuk.

¹⁹ Dipahembang dadaboru ni nampuna bagas i ma panutupina tu ginjang ni sumur i jana diparerak ia ma gandum disi, gabe nada haidaan be sumur i.

²⁰ Marroan ma angka naposo ni si Absalom tu bagas i jana disapai halahi ma tu anakboru sinangkin, “Di dia si Ahimaas dohot si Jonatan?” “On dope taripar halahi di batang aek i,” ning ia mangalusi. Dijalak-jalahi halahi ma doli-doli na dua i, tapi nada dapot halahi be, lalu mulak noma halahi tu Jerusalem.

²¹ Ruar ma si Ahimaas sian sumur i jana diompoti halahi ma mandapotkon Raja Daud laho paboahon i sudena. Didok halahi ma, “Dilehen si Ahitofel do sipaingot mangalo raja i. Jadi kehe ma manigor saonnari raja i manaripari batang aek on.”

²² Taripar ma si Daud dohot parangannia i di Batang aek Jordan i jana lalu ma halahi di bariba, andostorang.

²³ Dung diida si Ahitofel na so diihutkon hatania i, dipasang ia ma palano ni halodenia, lalu mulak ma ia tu kotania sandiri. Dung dipasidung ia sude urusannia, manyingkot ma ia lalu ditanom di kuburan ni halahi sahorong.

²⁴ Ma lalu si Daud di kota Mahanaim di na taripar si Absalom di Batang aek Jordan diihutkon angka halak Israel. (

²⁵ Madung diangkat si Absalom, si Amasa gabe kapala ni tentara manggontihon si Joab. Si Amasa, i ma anak ni si Jitra halak Israel; inangna margoar si Abigail boru ni si Nahas, i ma pareban ni si Zeruya inang ni si Joab.)

²⁶ Marbandar di tano Gilead ma si Absalom dohot parangannia i.

²⁷ Di na lalu si Daud di Mahanaim, dialo-alo si Sobi anak ni si Nahas na sian kota Raba na di Amon ma ia, dohot si Makir anak ni si Amiel na sian Lodebar, dohot si Barsilai na sian Rogelim na di Gilead.

²⁸ Dioban halahi ma podoman, mangkuk, huali, dohot kasur di si Daud dohot parangannia i, songon i muse gandum, jabaure, topung, gandum na digoreng, kacang polong,

²⁹ aer ni loba, miak, kapala ni susu dohot biri-biri sanga na piga. Diboto halahi do na malean si Daud dohot parangannia i, manguas boti loja hara ni na mardalan di halongonan i.