2 SAMUEL 16 - BIBEL JAMITA NA DENGGAN

Si Daud dohot si Ziba

¹ Hum salpu si Daud manganangkohi ambubu ni tor i, ompot ma ro si Ziba, pangoloi ni si Mefiboset i mandapotkon ia maroban sapasang halode na dibobani dohot roti dua ratus kamata, saratus ranting anggur na mahiang, saratus holting angka parbatu na rata dohot sakantongan aek ni anggur.

² Marsapa ma si Daud tusia, “Baen aha dehe on sudena?” Dialusi si Ziba ma, “Anggo angka halode on, na giot sitenggeton ni dongan sabagas ni raja do; roti dohot parbatu on di angka naposo ni raja i, jana aek ni anggur on di angka na loja di halongonan ma on.”

³ Dung i disapai raja i ma tusia, “Di dia si Mefiboset pahompu ni tuanmi?” “Laing di Jerusalem do ia,” ning si Ziba mangalusi, “harana pos do rohania na giot paulahon ni halak Israel ma saonnari tusia harajaan ni si Saul, ompungnia i.”

⁴ Dung i didok raja i ma tu si Ziba, “Gabe ho ma nampuna sude sinadongan ni si Mefiboset i.” “Hupatulus ma sude parenta ni raja i,” ning ia mangalusi. “Sai lomo ma nian tongtong roha ni raja i mida au!”

Si Daud dohot si Simei

⁵ Di na lalu si Daud di Bahurim, ruar ma sada bayo sian huta i, jana di na mur donok ia, diburai ia ma si Daud. Si Simei goarna anak ni si Gera na sian kahanggi ni si Saul.

⁶ Dipungka si Simei ma mandangguri si Daud dohot angka naposonia i dohot batu, haru pe nian dihaliangi parangannia dohot angka parpangkat i si Daud.

⁷ Diburai si Simei ma ia, didok ma, “Morot! Morot ho! Sibunu jolma! Parjahat!

⁸ Dibuat ho ma antong harajaan ni si Saul. Na dilehen Tuhan do harajaanmi tu anakmu si Absalom. Saonnari pe anso mago ho, pambunu!”

⁹ Didok si Abisai anggi ni si Joab, anak ni si Zeruya i ma tu raja i, “Biasi dipadiar raja i anjing na mate i mamurai raja i? Paloas ma au, anso hugotap rungkungna i!”

¹⁰ Tapi didok raja i ma tu si Abisai dohot si Joab angkangna i, “Ulang antoi hamu. Padiar hamu sajo ma ia mamurai au. Harana betak na Tuhan do na marsuru ia ise ma na patut manyapai ia sanga na hara ni aha dibaen ia songon i?”

¹¹ Dung i didok si Daud dope tu si Abisai dohot tu sude naposonia i, “Salang anakku sandiri giot mamunu au do; biasi pola longang hamu marnida pangalaho ni halak Benyamin on? Tuhan do marsurusa mamurai hara ni i ulang hahua hamu ia jana padiar ma songon i mamurai ia.

¹² Betak na parrohahonon ni Tuhan do pardangolankon jana pasupasuonNia au gonti ni bura i.”

¹³ Dung i dipatorus si Daud dohot angka parpangkat i ma pardalananna, jana si Simei pe sarupa do hipas ni pardalannia dohot halahi manopi-nopi dolok i, dipupu ia mamurai dohot mandanggurkon batu dohot tano.

¹⁴ Ma loja sajo raja i dohot sude parangannia i di na lalu halahi di Batang aek Jordan, jadi gabe maradian disi ma halahi.

Si Absalom di Jerusalem

¹⁵ Jadi di hatiha i ma si Absalom dohot sude halak Israel na mangihutkon ia masuk tu Jerusalem, jana dohot do si Ahitofel.

¹⁶ Dung marsuo si Husai halak Arki dongan ni si Daud na burju i dohot si Absalom, pio-pio ma si Husai, “Horas ma raja i! Horas ma raja i!”

¹⁷ Tapi disapai si Absalom ma tusia, “Di dia do haburjuonmu tu si Daud donganmi? Biasi nada diihutkon ho ia?”

¹⁸ Dialusi si Husai ma, “Bia ma pambaen ni i! Anggo au mamihak tu halak na nipili ni Tuhan do, na nipili ni angka halak on, dohot sude halak Israel. Ia do nampuna au jana ia do ihutkononku.

¹⁹ Boti muse, ise dope he lakna na giot sioloanku anggo nada anak ni tuanku? Songon na dung huoloi amang ni raja i, laing songon i do oloanku raja i saonnari.”

²⁰ Dung i didok si Absalom ma tu si Ahitofel, “Paboa ma sanga aha sipatupaonta.”

²¹ Dialusi si Ahitofel ma, “Kehe ma raja i mandapotkon angka rading na nitadingkon ni amang ni raja i manjago bagas godang i, jana rap modom ma dohot halahi. Jadi gabe botoon ni Israel ma sude marhite pangalaho i, na dung dietong ni amanta hamu do musuna raja i. Jadi gabe mur barani ma sude angka na mangihut tu daulat i.”

²² Jadi, dipature ma di si Absalom bandar di ginjang ni tarup ni bagas godang na hornop i. Jadi di jolo ni mata ni halak sude, masuk ma si Absalom tu bagasan bandar i jana modom ma ia dohot rading ni amangnia i.

²³ Anggo di hatiha i, sude sipaingot ni si Ahitofel dijagit do i songon dia hata ni Debata sandiri; si Daud bope si Absalom mangihut do di angka sipaingotnia.