2 SAMUEL 15 - BIBEL JAMITA NA DENGGAN

Si Absalom mambaen sangkap paraloan

¹ Dung i diparade si Absalom ma disia sandiri kareta dohot kudo rap dohot lima pulu halak pandonganinia.

² Ganop ari disi ngot manyogot jongjong ma si Absalom di topi dalan na di lambung ni pintu horbangan ni bagas godang i. Sandok halak na giot mangaduhon parkaro tu raja i, dipio si Absalom jolo jana disapai ia, “Sian marga dia do ho?” Jana muda dialusi halakna i, ‘Sian marga on sanga marga i,’

³ gabe didok si Absalom ma, “Sapanjang uhum, tigor do nian ho, tapi bia ma baenon, nada adong wakil ni raja i na laho manangihon parkaromu.”

⁴ Laing ditamba ia muse, “Sugari au ma antong na gabe hakim! Ganop halak na adong parsalisianna sanga tuntutanna, tarbaensa ma ro tu au jana tigor ma baenonku i.”

⁵ Muda adong halak na giot manungkap tu adopan ni si Absalom, disurduhon ia ma tangannia lalu ditogu ia ma halakna i jana diumma ia.

⁶ Sai songon i ma dibaen si Absalom tu ganop halak Israel na giot mambaen parkarona tu raja i, jana songon i ma dibaen si Absalom laho mambuat roha ni halak Israel.

⁷ Dung salpu opat taon, didok si Absalom ma tu Raja Daud, “Amang, paloas ma au jolo kehe tu Hebron laho patulus janjingku tu Tuhan.

⁸ Harana dompak na di Gesur na di Siria i au maringanan, marjanji do au tu Tuhan mandok, muda dipaloas Tuhan au mulak tu Jerusalem, angkon kehe do au maribadat tuSia di Hebron.”

⁹ Dialusi raja i ma, “Antong kehe ma ho.” Dung i kehe ma si Absalom tu Hebron.

¹⁰ Tapi painte so i na dung disuru ia humani do angka suruannia tu sude marga ni Israel maroban tona, “Muda dibege hamu sora ni sarune, pio-pio ma hamu mandok, ‘Madung gabe raja si Absalom di Hebron!’ ”

¹¹ Adong do dua ratus halak na mandongani si Absalom tu Hebron. Nada adong diboto halahi taringot tu tahi na giot manggaori i jana nada adong dihagangguhon roha ni halahi di na kehe i.

¹² Jadi dompak na manghaulkon haul si Absalom, laing disuru ia muse ma utusan tu kota Gilo laho marpio si Ahitofel, i ma sada sian panuturi ni Raja Daud. Jadi songon i ma antong mur margogo parkumpulan laho mangalo raja i jana mur mabahat ma angka na mangihut tu si Absalom.

Maporus ma si Daud sian Jerusalem

¹³ Dung i ro ma sada halak na maroban barita paboahon tu si Daud, “Madung mamihak halak Israel tu si Absalom.”

¹⁴ Dung i didok si Daud ma tu sude naposonia na adong di Jerusalem, “Beta mangungsi hita. Sada on noma dalan anso malua hita sian si Absalom. Ro ne ma ia. Ompoti be ma anso ulang sanga dapot ia hita, jana ditaluhon dohot podang, gabe hona bunu lalu sude halak kota on!”

¹⁵ “Denggan rajanami,” ning halahi mangalusi, “Rade do hami patuluskon sanga aha pe giot ni raja i.”

¹⁶ Jadi kehe ma raja i didongani sude pangisi ni bagasna maradu pagawena, asing ni radingnia sisampulu halak na ditadingkon laho manjago bagas godang i.

¹⁷ Di na mardalan raja i dohot sude na mandongani ia manadingkon kota i, maradian ma halahi di lambung ni bagas na parpudi.

¹⁸ Jongjong ma sude pagawe ni raja i di lambungnia di na mamolus angka tentara pangawal ni raja i marbaris. Songon i muse tentara sionom ratus halak (halak Kreti dohot halak Pleti) na mangihutkon ia sian Gat, laing marbaris ma di jolonia.

¹⁹ Marnida i, gabe didok raja i ma tu si Itai na mamimpin tentara sionom ratus halak i, “Biasi dohot dope ho rap dohot hami. Gumonan ma ho mulak jana rap dohot raja na imbaru i. Angke halak na asing do ho, na mangungsi sian na dao sian luatmu sandiri.

²⁰ Nada sadia lolot dope ho dung dison, nada patut giot suruonku ho dohot mimbarimbar rap dohot hami. Au sandiri nada huboto dope sanga na giot tu dia au kehe. Mulak ma hamu jana oban ma sude angka donganmu sabangso i – sai holong nian roha ni Tuhan tu ho jana sai ibo do rohaNia tu ho.”

²¹ Tapi dialusi si Itai ma, “Na huparsangapi, mangasahon Tuhan na mangolu i bope hara ni hosa ni raja i, sanga na tu dia pe raja i kehe, laing dohot do au, haru pe na gabe hamatean na ro baenon ni i.”

²² “Antong denggan,” ninna si Daud mangalusi. “Torus ma mardalan!” Jadi mardalan ma si Itai rap dohot sude pasukannia dohot dongan sabagas ni halahi.

²³ Mangarar be ma rayat i tangis di parkehe ni angka tentara ni si Daud manadingkon kota i. Dung i ditaripari raja i ma anak ni Batang aek Kidron, diihutkon sude tentarania i lalu mardalan ma halahi, mandapotkon halongonan.

²⁴ Laing dohot do disi Malim Zadok dohot Malim Abyatar maradu sude halak Levi na maroban Poti Parjanjian ni Tuhan i. Dipayakkon ma Poti Parjanjian i jana nada diangkat dope painte so sude rayat i manadingkon kota i.

²⁵ Dung i didok raja i ma tu si Zadok, “Paulak ma mangulahi Poti Parjanjian i tu kota i. Muda na lomo do roha ni Tuhan tu au, paloasonNia do au mulak marnida Poti Parjanjian i dohot inganan parmiananNia i mangulahi.

²⁶ Tapi anggo na so lomo be antong roha ni Tuhan i tu au, marguru di hagiotNia ma di au.”

²⁷ Dung i didok raja i muse ma tu si Zadok, “Piohon ma si Ahimaas anakmi dohot si Jonatan anak ni si Abyatar i jana mulak ma hamu sonang tu kota.

²⁸ Paintehon ma au di lambung ni angka panariparan ni aek na di halongonan i lopus hujagit barita sian hamu.”

²⁹ Dung i dioban si Zadok dohot si Abyatar ma Poti Parjanjian i mulak tu Jerusalem jana tinggal disi ma halahi.

³⁰ Dung salpu i, dibuka si Daud ma sipatunia. Manangkok ma ia dohot halahi sude lalu tangis di Dolok Zetun, jana martujung-tujung ulu ni halahi tanda ni arsak ni roha.

³¹ Di na dipaboa tu si Daud na dohot muse si Ahitofel rap dohot si Absalom, martangiang ma si Daud, songon on, “O ale Tuhan, sugari disundati Ho ma nian sipaingot ni si Ahitofel!”

³² Di na lalu si Daud tu ambubu ni dolok i, tu inganan paribadatan ni halak tu Tuhan, dialo-alo dongannia na burju ma ia, i ma si Husai halak Arki. Masibak do pakean ni si Husai jana ulunia pe dibaen abuan.

³³ Didok si Daud ma tusia, “Muda dohot do ho, gabe boban ma ho di au.

³⁴ Hape tarurupi ho do au, sugari mulak ho tu kota. Jana dokkon ma tu si Absalom, na giot oloanmu ia burju, songon pangoloimu di amangnia na salpu i. Songon i noma dalanna baenonmu anso tarbaen ho mangalo sude sipaingot ni si Ahitofel.

³⁵ Si Zadok pe dohot si Abyatar laing disi do. Paboa ma tu halahi sandok na nibegemu di bagas godang.

³⁶ Si Ahimaas anak ni si Zadok pe dohot si Jonatan anak ni si Abyatar i, diihutkon halahi do amangna, laing disi muse do halahi. Angkon suruhononmu ma angka dakdanak i tu au laho palaluhon sandok barita na tarpalagut ho.”

³⁷ Jadi mulak ma si Husai dongan ni si Daud i tu Jerusalem, pas di parlalu ni si Absalom tu kota i.