2 SAMUEL 11 - BIBEL JAMITA NA DENGGAN

Si Daud dohot si Batseba

¹ Somalna sai di musim bunga do angka raja kehe marporang. Jadi dung salpu taon baru di taon i disuru si Daud ma si Joab kehe mamorangi rap dohot angka donganna parpangkat dohot sude tentara ni Israel i; dung i ditaluhon halahi ma halak Amon jana dihobuk halahi ma kota Raba. Tapi anggo si Daud, tinggal do di Jerusalem.

² Sanoli andospotang, dung ngot si Daud sian na modom, kehe ma ia tu tarup ni bagas godang na hornop i. Diida ia ma sian i sada anakboru na topet maridi, jana sun jeges ni anakboru i.

³ Dung i disuru sapai si Daud ma sanga na ise anakboru i, jana didok halak ma, “Nada he si Batseba boru ni si Eliam, dadaboru ni si Uria halak Het i do i?”

⁴ Disuru alap si Daud ma anakboru i, jana dung ro ia tu bagas godang, rap modom ma si Daud dohot ia. (Na baru patupahon upacara paias diri dope si Batseba dung ias bulannia.) Dung i mulak ma ia tu bagasnia.

⁵ Dung adong sadia honok, mamungka ma denggan pamatang ni si Batseba, jana ditongos ia ma barita taringot tusi tu si Daud.

⁶ Manigor ditongos si Daud ma parenta tu si Joab songon on, “Suru ma si Uria halak Het i, mandapotkon au.” Dung i disuru si Joab ma si Uria mandapotkon si Daud.

⁷ Di na ro si Uria mangadop tu si Daud, disapai raja i ma tusia sanga na horas do si Joab dohot pasukan ni Israel, dohot sanga songon dia pardalan ni porang i.

⁸ Dung i didok si Daud ma tu si Uria, “Antong mulak ma ho jolo tu bagasmu anso maradian ho santongkin.” Dung kehe si Uria sian bagas godang i, ditongos si Daud ma silua tu bagas ni si Uria i.

⁹ Hape inda mulak si Uria tu bagas, modom di jolo ni pintu ni horbangan ni bagas godang i do ia rap dohot angka pangawal ni raja i.

¹⁰ Dipaboa halak ma i tu si Daud. Jadi gabe disapai ia ma tu si Uria, “Na baru mulak dope ho sian pardalanan na dao, hape biasi nada mulak ho tu bagasmu?”

¹¹ Dialusi si Uria ma, “Marporang dope tentara ni Israel dohot Juda, jana didongani Poti Parjanjian ni Tuhan do halahi; si Joab panglimanami i dohot angka dongannia na marpangkat-pangkat marbandar di padang-padang i do. Patut ma he songon au mulak tu bagas jana mangan, minum lalu modom dohot dadaboruniba? Hara ni hosa ni raja i dohot hosaniba, nada giot baenonku na songon i!”

¹² Dung i didok si Daud ma, “Tuk ma i, laing maradian ma jolo ho dison sadari on jana ancogot manyogot hupaloas ma ho kehe.” Jadi laing di Jerusalem ma si Uria di na sadari i. Ancogotna i diontang si Daud ma ia mangan.

¹³ Dung i mangan ma ia jana dilehen bahat inumon lopus mabuk ia. Tapi bornginna i pe nada mulak si Uria tu bagasnia, tapi modom di bagasan bilik ni pangawal bagas godang i do ia di ginjang ni ulosnia.

¹⁴ Ancogotna i dibaen si Daud ma surat tu si Joab, jana ditongoskon ia ma i dioban si Uria.

¹⁵ Songon on ma suratna i, “Baen ma si Uria di jolo situtu, di parporangan na boratna i, dung i mundur ma ho anso mate ia.”

¹⁶ Jadi taran manghobuk kota i si Joab, disuru ia ma si Uria kehe tu inganan na tangkas diboto ia dijago musu i marabis-abis.

¹⁷ Jadi di na ruar tentara ni musu i sian kota i mangalo parangan ni si Joab, mate ma sanga na piga-piga halak parangan ni si Daud, dohot muse ma si Uria disi.

¹⁸ Dung i disuru si Joab ma utusannia tu si Daud laho paboahon pardalan ni porang i.

¹⁹ Diparentahon ia ma tu suruannia i, “Dung dibege raja i barita taringot tu pardalan ni porang on,

²⁰ betak muruk raja i jana disapai tu ho, ‘Biasi antong songon i donokmunu tu kota i? Nada he diboto hamu na ingkon do panaon ni musu i hamu sian angka tembokna i?

²¹ Na dung lupa dehe hamu na hona bunu si Abimelek anak ni si Gideon i di Tebes? Inda he hara ni na didanggur ni sada anakboru ia dohot batu panggilingan ni topung sian ginjang ni tembok i? Antong, biasi do songon i donokmunu tu tembok i?’ Jadi muda disapai raja i songon i, dokkon ma, ‘Si Uria pe pangawal ni raja i, dohot do mate!’ ”

²² Dung i kehe ma na disuru i mandapotkon si Daud paboahon sanga aha na niparentahon ni si Joab i tusia.

²³ Didok suruan i ma, “Gumogo do alonami jana ruar do halahi sian kota i laho mangalo hami di padang-padang i. Tapi hami sosak do halahi mangulahi tu pintu horbangan ni kota i.

²⁴ Dung i dipana halahi ma hami sian ginjang ni tembok ni kota i jana mate do sanga na piga halak angka tentara ni raja, jana dohot do si Uria mate.”

²⁵ Didok si Daud ma tu suruan i, “Papos ma roha ni si Joab jana dokkon ma tusia anso ulang pola lebak dihilala ia, angke na so tardok hian do sanga ise na giot mate anggo di bagasan parporangan. Dokkon ma tusia anso dipadalan ia paraloan na gumogo dope maradopkon kota i lopus tunduk kota i.”

²⁶ Dung tarbege tu si Batseba na dung marujung halaklahinia i, marsiluluton ma ia.

²⁷ Tapi dung abis ari-ari marsiluluton i, disuru alap si Daud ma anakboru i tu bagas godang jana gabe dadaborunia. Nada sadia honok, sorang ma sada anaknia. Tapi nada jop roha ni Tuhan di pangalaho ni si Daud i.