1 SAMUEL 9 - BIBEL JAMITA NA DENGGAN

Si Saul marsuo dohot si Samuel

¹ Adong ma sada halak na mora jana na marsahala sian Marga Benyamin, goarna si Kis. Masuk tu horong Bekorat do ia, i ma dangka ni Marga Afiah. Amangnia si Abiel jana ompungna si Zeror.

² Adong do anak ni si Kis, goarna si Saul doli-doli na jogi jana na tongam. Nada adong sahalak pe di sandok Israel na jumogi sian ia. Laing na ginjang muse antong ia, olat ni abarania do pardosdosan ni halak Israel.

³ Sanoli mago ma da sanga na piga halode ni si Kis. Jadi gabe didok si Kis ma tu si Saul, “Oban ma sahalak hatoban i jana jalahi ma angka halode i.”

⁴ Jadi didalani si Saul ma dohot pangoloi i partoran Efraim dohot tano Salisa, tapi nada padumpang dohot halode i. Dung i dipatorus halahi ma mardalan tu tano Sahalim, tapi nada adong muse disi halode i. Dijalahi halahi muse do di luat ni Benyamin, tapi nada padumpang.

⁵ Dung lalu halahi di tano Zup, didok si Saul ma tu hatoban i, “Beta ma hita mulak ale, ulang-ulang sak an dope roha ni amanta manyarihon hita ulang pado angka halode i.”

⁶ Dialusi hatoban i ma, “Painte jolo! Adong do di kota on sada halak naposo ni Debata. Na sangap situtu do ia dibaen halak hara ni sude hatania na tutu situtu tarjadi. Beta ma hita tusi, betak na paboaonnia do tu hita sanga na di dia halode i.”

⁷ Didok si Saul ma, “Muda kehe hita tusi, aha ma silehenonta disia? Bohal na taoban madung abis, jana na so adong do bagi ahanta silehenon di ibana.”

⁸ Dialusi hatoban i ma, “Topet dope adong sada hepeng perakku. Hulehen ma i disia anso ra ia paboahon tu hita inganan ni angka halode i.” (

⁹ Najolo, muda adong sian tonga-tonga ni bangso Israel na giot manyapai hasurirangon ni Tuhan, dohononnia ma songon on, “Beta ma hita tu pangaligi,” harana di hatiha i pangaligi do digoari panurirang.)

¹⁰ “Denggan ma i na nidokmi!” ning si Saul mangalusi hatobanna i. “Beta ma hita kehe!” Dung i kehe ma halahi tu inganan ni naposo ni Tuhan i.

¹¹ Taran manangkok halahi di tor laho tu kota i, marsuo ma halahi dohot angka bujing-bujing na giot tu sumur laho manimba aek. Jadi disapai halahi ma angka bujing-bujing i, “Adong dehe pangaligi di kota on?”

^12-13 “Olo, adong,” ning angka bujing-bujing i mangalusi, “apala on dope ia mardalan manjoloi hamu. Sugari hipas hamu, betak na tarkojar hamu dope ia. Na baru ro dope ia tu kota dibaen giot manghaulkon haul sadari on halak di ginjang ni tor i. Anggo kehe hamu saonnari, dapot hamu dope ia painte so kehe ia manangkok tu dolok i laho mangan. Nada mangan angka na diontang anggo so jolo ro ia, harana angkon jolo pasupasuonnia do haul i. Kehe ma hamu saonnari, dapot hamu dope ia disi.”

¹⁴ Jadi didalani si Saul ma dohot pangoloina i tu kota i, jana di na masuk halahi tu horbangan, diida halahi ma si Samuel mardalan mandapotkon halahi di pardalananna laho tu inganan paribadatan i.

¹⁵ Sadari painte so i dilehen Tuhan do tona tu si Samuel,

¹⁶ “Ancogot manyogot tarsongonon arina, suruonKu do sahalak sian Marga Benyamin mandapotkon ho. Miahi ma ia gabe raja di bangsongKu Israel. Paluaonnia ma bangsongKi sian halak Pilistin. Madung Huida sitaonon ni bangsongKu jana madung Hubege partangis ni halahi mangido tolong.”

¹⁷ Dung diida si Samuel si Saul, didok Tuhan ma tusia, “On ma ibana halak na Hudokkon i tu ho. Ia ma na giot mamarenta bangsongKu.”

¹⁸ Laing dipadonok si Saul ma tu si Samuel di lambung ni pintu ni horbangan i jana disapai ia ma, “Santabi amang, di dia dehe bagas ni pangaligi i?”

¹⁹ Dialusi si Samuel ma, “Au do pangaligi i. Pajolo hamu ma tu inganan paribadatan i, harana mangan rap dohot au do hamu anggo sadari on. Ancogot manyogot pe hualusi sude sapa-sapamunu i, dung i tola ma hamu mulak.

²⁰ Anggo taringot tu angka halode na mago i tolu ari na salpu, ulang pola sak rohamunu, harana madung dapot i. Boti muse, na ummarga di sude Israel, i do na giot lehenon tu ho dohot tu koum ni amanta.”

²¹ Dialusi si Saul ma, “Sian Marga Benyamin do au, marga na ummenek di Israel jana hami na sabagas ma na so mararti di marga i. Jadi biasi didokkon amang tu au na songon i?”

²² Dung i dipiohon si Samuel ma si Saul dohot pangoloina i masuk tu sada bilik na godang jana dipatama ia ma juguhan ni halahi di juluan di jolo ni angka undangan bahatna adong do hira-hira tolu pulu halak.

²³ Dung i didok si Samuel ma tu silompa panganon, “Parade ma juhut na hupasahat nangkin tu ho, simpanonmu.”

²⁴ Dung i dibuat pangalompa i ma pilian sian juhut ni hae-hae, lalu diparade ma i di jolo ni si Saul. Didok si Samuel ma, “On ma bagian na hupaasing di ho anso panganonmu di hatiha on rap dohot angka undangan. Pangan ma.” Jadi mangan ma antong si Saul. Jadi rap mangan ma si Saul di ari i rap dohot si Samuel.

²⁵ Dung salpu i, manuat ma halahi sian inganan paribadatan i laho masuk tu kota i. Dibaen ma podoman ni si Saul di tarup ni bagas i,

²⁶ lalu modom ma ia. Di na bincar mataniari, dipiohon si Samuel ma si Saul na di tarup i, ning ia ma, “Ngot ma ho, beta anso hutaruhon ho.” Ngot ma si Saul, lalu rap kehe dohot si Samuel.

Dimiahi si Samuel gabe raja si Saul

²⁷ Dung lalu halahi di topi ni kota i didok si Samuel ma tu si Saul, “Suru ma pangoloimi mardalan parjolo sian hita.” Jadi kehe ma pangoloi i jana didok si Samuel ma mangulahi, “Maradian ma jolo santongkin dison, giot paboaonku tu ho tona ni Debata.”