1 SAMUEL 6 - BIBEL JAMITA NA DENGGAN

Dipaulak Poti Parjanjian i

¹ Dung adong pitu bulan honokna Poti Parjanjian i di Pilistin,

² dipiohon halak Pilistin ma angka malim dohot angka parelmu jana disapai halahi ma, “Bia do baenonta Poti Parjanjian ni Tuhan i? Muda tapaulak tu ingananna humani, aha muse baenonta siluana tongosonta dope?”

³ Jadi ning halahi ma mangalusi, “Ulang paulak hamu sajo songon i anggo Poti Parjanjian ni Debata ni Israel i, tapi angkon marangkup silua do i laho manobus dosamunu. Jadi muda songon i, malum ma hamu, jana botoonmunu ma sanga hara ni aha umbaen na sai torus diuhumi Debata ni Israel i hamu.”

⁴ “Aha ma silua silehenonnami tuSia?” ning angka pamimpin i manyapai. Dialusi angka malim i ma, “Lima sere na himpal songon baro, dohot lima sere na himpal songon monci sarupa dohot bilangan ni raja ni Pilistin i. Inda he baro dohot monci do na mandondoni hamu sude, rayat bope raja?

⁵ Jadi angkon baenonmunu do tiruan ni baro dohot monci na mangganas di luatmunu on. Songon i ma baen hamu pasangapkon Debata ni Israel i. Betak antahonNia ma manguhum hamu dohot angka debata maradu tanomunu.

⁶ Aha he gunana jogal rohamunu songon raja bope halak Mesir najolo? Ulang hamu lupa di na niparloja ni Debata halahi, lopus muba roha ni halahi gabe dipaloas halahi halak Israel i morot sian Mesir.

⁷ Antong, pasingkop hamu ma sada padati na imbaru dohot dua lombu na pasusuhon, jana na so unjung dope hona hudahuda. Pasang hamu ma lombu na dua i di padati i jana iring hamu ma anak ni lombu i mulak tu barana.

⁸ Dung i buat hamu ma Poti Parjanjian ni Tuhan i, panaek hamu ma i tu ginjang ni padati i jana payakkon hamu ma di lambung ni poti na marisi barang-barang sere silehenonmunu i tuSia na gabe songon silua partobus ni dosamunu i. Padiar hamu ma mardalan sandiri padati i.

⁹ Parrohahon hamu ma pardalanna i; muda mardalan adop luatna i sandiri do, i ma tu kota Bet-Semes, i ma tandana bahaso Debata ni halak Israel i do na parohon hamamago na jorbut i tu hita. Tapi muda nada kehe tusi, botoonta ma na so sian Debata ni Israel haroroan ni hasusaan i, tapi na ro songon i sajo do i.”

¹⁰ Mangihut tusi ma jolma i; ditangkup halahi ma dua lombu panyusuan, dipasang ma i tu padati i, anggo anak ni lombu i dikurung ma di bara.

¹¹ Dung i dipanaek ma Poti Parjanjian i tu padati i, songon i muse poti na marisi monci sere dohot tiruan ni baro i.

¹² Mamolus ma antong lombu i tu Bet-Semes; marmoak ma lombu i lalu torus mardalan so pola manyirpang tu siambirang sanga tu siamun. Torus do raja ni halak Pilistin na lima i paihut-ihut lombu i lopus tu batas ni Bet-Semes.

¹³ Hatiha manyabi gandum do halak Bet-Semes di hatiha i di rura. Marnida haroro ni Poti Parjanjian i marjop ni roha ma halahi mangaligisa.

¹⁴ Maradian ma padati i di lambung ni sada batu na godang di ladang ni si Josua, sada halak sian Bet-Semes. Dikampak halak kota i ma papan ni padati i lalu disambol halahi ma lombu na dua i baen haul situtungon di Tuhan.

¹⁵ Dung i dipaijur angka halak Levi ma Poti Parjanjian ni Tuhan i dohot poti na marisi barang-barang sere i, dipayakkon halahi ma di ginjang ni batu na godang i. Dung i dihaulkon halak Bet-Semes ma angka haul na nitutungan dohot angka haul na asing tu Tuhan.

¹⁶ Marnida sudena i, mulak ma raja ni Pilistin silima halak i tu Ekron laing di na sadari i.

¹⁷ Marhite na songon i madung ditongos halak Pilistin haul panobus dosa tu Tuhan di halak na mangingani kota na lima na niparenta ni raja Pilistin na lima i. I ma angka kota: Asdod, Gasa, Askelon, Gat dohot Ekron.

¹⁸ Adong sian kota i na martembok adong na so martembok. Ganop kota ma mangirim sada be baro sere dohot sada monci sere. Batu na godang inganan hapayahan ni Poti Parjanjian ni Tuhan i dibaen halahi, i ma na gabe tanda ni na masa i. Lopus tu sadari on pe laing di ladang ni si Josua halak Bet-Semes i do batu i.

¹⁹ Tapi hara ni na ditungkir ni halak Bet-Semes tu bagasan Poti Parjanjian ni Tuhan i, gabe hona bunu do dibaen Tuhan sian halahi pitu pulu halak. Gabe marsiluluton ma rayat i hara ni na nipadondonkon ni Tuhan sitaonon na songon i godang tu halahi.

Poti Parjanjian di Kiryat-Jearim

²⁰ Dung i didok halak Bet-Semes ma, “Ise ma he na tarbaen tahan di adopan ni Tuhan, Debata Na Badia i? Tu dia ma ulaning taruhononta Poti i anso dao sian hita?”

²¹ Dung i disuru halahi ma utusan mandapotkon halak Kiryat-Jearim maroban tona songon on, “Madung dipaulak Tuhan Poti Parjanjian ni Tuhan i. Ro ma hamu jana paimbar hamu ma tu inganan munu i.”