1 SAMUEL 5 - BIBEL JAMITA NA DENGGAN

Poti Parjanjian di tonga-tonga ni halak Pilistin

¹ Dung dirampas halak Pilistin Poti Parjanjian ni Debata, dioban halahi ma i sian Eben-Haeser tu kota ni halahi, di Asdod.

² Dioban halahi ma disi Poti i masuk tu bagas ni debata ni halahi, si Dagon, jana dipayakkon ma i di lambung ni patung ni debata i.

³ Tapi ancogotna i manyogot-nyogot, diida halak Asdod ma na dung unggal patung Dagon i tungkap tu tano, di jolo ni Poti Parjanjian ni Tuhan i. Jadi gabe diangkat halahi ma patung i jana dipasuang halahi ma tu ingananna humani.

⁴ Tapi ancogotna i manyogot dope diida halahi ma na dung unggal mangulahi patung i di jolo ni Poti Parjanjian i. Anggo on maponggol ma ulu dohot tangan ni patung i dua-dua jana payak ma i di lambung ni pintu; hum pamatang ni patung i noma na tinggal. (

⁵ I ma dalanna lopus tu sadarion, anggo angka malim ni Dagon dohot sude na manyomba tusi di Asdod, sai dilangkai halahi do pintu ni bagas pamelean ni Dagon i jana nada didege i.)

⁶ Dibaen Tuhan i ma uhum na borat tu halak Asdod jana dibaen ma halahi maoto. Diuhumi ma halahi sude dohot halak na adong di na humaliang huta i, marhite na parohon baro tu pamatang ni halahi.

⁷ Marnida na masa i, didok halahi ma, “Na hona uhum ni Debata ni Israel do hita on dohot Debatanta Dagon, ulang tapaloas be lumolot Poti Parjanjian i di hita on.”

⁸ Jadi gabe dipiohon halahi ma raja ni halak Pilistin na lima i anso marlagut, lalu disapai halahi ma, “Bia do Poti Parjanjian ni Debata ni Israel i baenonta?” Dialusi angka raja-raja i ma, “Paimbar hamu ma i tu kota Gat.” Jadi gabe dipaimbar ma Poti i tu kota Gat, i ma sada kota ni halak Pilistin na asing.

⁹ Tapi di na lalu Poti i disi, diuhum Tuhan ma kota i muse jana masa ma hasonggoton na godang situtu. Hona uhum ma halak kota i na poso sanga na matobang hona ma na baro-baroon na martubuan di pamatang ni halahi.

¹⁰ Gabe ditaruhon ma Poti Parjanjian i tu Ekron, kota ni halak Pilistin na asing muse. Disi lalu Poti i disi, mangarar ma halak kota i, didok halahi, “Na giot mamunu hita sude do umbaen na dioban Poti Parjanjian ni Debata ni Israel i tusi.”

¹¹ Jadi gabe dipiohon halahi ma sude raja ni Pilistin anso marlagut, didok halahi ma, “Paulak hamu ma da Poti Parjanjian ni Israel i tu ingananna humani anso ulang hona bunu hita dohot sisolkotta.” Masa ma hagunturon godang di kota i sude, angke hona uhum na borat situtu do halahi dibaen Debata.

¹² Angka halak na so mate, hona ma na baro-baroon i, jadi gabe mangangguhi ma halahi tu angka debata ni halahi mangido tolong.