1 SAMUEL 30 - BIBEL JAMITA NA DENGGAN

Porang mangalo halak Amalek

¹ Dung dua ari, mulak ma si Daud dohot parangannia i tu Ziklag. Dung lalu disi, didapot halahi ma na dung mangaroro halak Amalek tu Juda Selatan dohot mamorangi Ziklag.

² Sahalak pe nada adong dibunu halahi. Tapi disurbu halahi sude kota i jana dipatorus halahi mardalan maroban angka dadaboru, dakdanak dohot halak kota i na deba nari.

³ Ditaban halahi muse do isi ni bagas ni si Daud,

⁴ dohot anak buania dohot ma disi dadaborunia na dua i, si Ahinoam dohot si Abigail.

⁵ I noma marsak ni si Daud dohot paranganna i, gabe tangis ma halahi nada marnamantak lopus gale-gale.

⁶ Giot marmara tutu do si Daud, dibaen sun do marsakna parangan ni si Daud i hara ni na agoan anak dohot dadaboru. Jadi gabe giot didangguri halahi do si Daud dohot batu. Jadi targogot situtu ma si Daud, tapi laing dipatogu Tuhan Debatania mangulahi rohania.

⁷ Dung i didok si Daud ma tu Malim Abyatar anak ni si Ahimelek i, “Oban ma jolo tuson efod i!” Jadi dioban si Abyatar ma efod i tusia.

⁸ Dung i marsapa ma si Daud tu Tuhan, “Angkon kojaronku do ulaning garombolan pangaroro i? Tarkojar au dope halahi?” Dialusi Tuhan ma, “Olo, kojar ma! Dapot ho dope i jana paluaonmu ma angka na tartaban i.”

⁹ Jadi kehe ma si Daud dohot parangannia sionom ratus halak i. Di na lalu halahi tu Batang aek Besor, tinggal ma deba sian halahi disi.

¹⁰ Dipatorus si Daud ma pardalananna rap dohot opat ratus halak; tapi na dua ratus nari i tinggal disi noma hara ni lojana, nada tolap be manaripari Batang aek Besor i.

¹¹ Di pardalanan i marsuo ma parangan ni si Daud i dohot sada dakdanak halaklahi ni Mesir di padang i, lalu dioban halahi tu si Daud. Hapengani ma pola tolu ari dakdanak i na so mangan dohot minum. Jadi dilehen halahi ma ia mangan dohot minum,

¹² songon i kue ara dohot dua kue kismis. Dung mangan, mulak ma ia margogo; hape antong na so mangan do ia dohot minum tolu ari ma lolotna!

¹³ Dung i disapai si Daud ma tusia, “Ise do tuanmu jana na sian dia do ho?” Dialusi dakdanak i ma, “Anggo au halak Mesir do, hatoban ni halak Amalek. Na ditadingkon ni tuanku do au tolu ari na salpu hara ni na marnyae au.

¹⁴ Na kehe do hami mamorangi Luat Kreti na di Selatan ni Juda dohot Marga Kaleb, jana hami surbu do Ziklag.”

¹⁵ Dung i disapai si Daud ma tusia, “Ra do ho patuduhon dalan tu au tu inganan ni garombolan i?” Alusnia, “Ra do au, asalkan ma marjanji tuan i mangasahon goar ni Debata, paboa na so bunuon ni tuan i au sanga pasahaton ni tuan i au tu tuanku humani.”

¹⁶ Dung i dipatuduhon ia ma tu halahi dalan tu inganan ni garombolan i. Marserak do di hatiha i garombolan i di sude inganan i, angka mangan, minum dohot marpesta godang do halahi hara ni bahatna barang na hona rampas na nibuat ni halahi sian Luat Pilistin dohot Juda.

¹⁷ Di na laho torang ari ancogotna i, diroro si Daud ma halahi jana marporang ma lopus borngin. Asing ni siopat ratus halak doli-doli na maporus mangalombut unto, sahalak pe nada adong na malua musu i.

¹⁸ Tulus do tarpalua si Daud sasude na dung dirampas ni halak Amalek i, dohot ma disi dadaborunia na dua halak i;

¹⁹ bagi na aha nada adong na mago. Sude dakdanak halaklahi dohot dadaboru dohot sude barang na hona rampas na nibuat ni halak Amalek i, dibuat si Daud mangulahi.

²⁰ Tamba ni i, laing dirampas si Daud dope sude biri-biri dohot pahan-pahanan. Diiring parangan ni si Daud ma sude angka pahan-pahanan i di jolo ni sude barang na hona rampas i. Didok halahi ma, “On ma taban-taban ni si Daud!”

²¹ Dung i mulak ma si Daud tu sidua ratus halak na so tarbaen i be mangihutkon ia hara ni lojana, jana na nitadingkonnia di topi ni Batang aek Besor i. Dialo-alo halahi ma si Daud dohot parangannia i, jana didapotkon si Daud ma halahi laho manjalangisa.

²² Tapi sian tonga-tonga ni parangan ni si Daud i na dohot mangihutkon ia adong do na jahat jana na mangiburu. Didok halahi, “So na dohot angka jolma on, jadi nada tola halahi manjagit sanga aha sian barang na hona rampas on. Hum anak ni halahi sajo ma dohot dadaboru ni halahi na tola buaton ni halahi.”

²³ Tapi dialusi si Daud ma, “Hamu angka donganku, ulang baen hamu na songon i taringot tu bagi aha na nilehen ni Tuhan di hita! Inda he na dung dijagohon Ia hita jana dilehen Ia hamonangan maralohon pangarampasi i?

²⁴ Jadi sada halak pe nada tola adong manjagit usul i! Sudena angkon dapotan bagian do, sarupa be songon halak na dohot marporang.”

²⁵ Dung i dibaen si Daud ma i gabe sada aturan, jana dipadalan do i di Israel lopus saonnari.

²⁶ Di na mulak si Daud tu Ziklag, ditongoskon ia ma deba sian barang na dirampas i tu angka pamimpin ni Juda na adong di angka kota inganan haimbar-imbarannia dohot parangannia, didok ia ma, “On ma silua di hamu sian barang na hona rampas na hami buat sian musu ni Tuhan.”

²⁷ Angka on ma kota i: Betel, Rama na di bagian Selatan ni Juda, Jatir,

²⁸ Aroer, Sifmot, Estemoa,

²⁹ Rakal, laing kota ni halak Jerahmeel do i, angka kota ni halak Keni,

³⁰ Horma, Kor-Asan, Atak dohot Hebron.

³¹ Sandok kota haporusan ni si Daud dohot anak buania i manjagit silua do sudena i sian ia.