1 SAMUEL 26 - BIBEL JAMITA NA DENGGAN

Dijua si Daud mangulahi mamunu si Saul

¹ Sanoli ro ma angka halak sian Zip mandapotkon si Saul di Gibea paboahon tusia na topet martabuni si Daud di Dolok Hakhila di topi ni Halongonan Juda.

² Jadi manigor kehe ma si Saul rap dohot tolu ribu halak tentara na dumenggan di Israel mandapotkon Halongonan Zip laho manjalahi si Daud.

³ Marbandar ma si Saul di topi dalan na di lambung ni Dolok Hakhila i. Habegean ma di si Daud na di halongonan i, na niihutkon ni si Saul ia lopus tu halongonan.

⁴ Jadi disuru ia ma pamata-matai jana tangkas ma diboto ia na disi do si Saul.

⁵ Manigor kehe ma si Daud tu parbandaran ni si Saul jana dapot ia ma bandar ni si Saul dohot si Abner anak ni si Ner i. Tar tu bagasan do bandar ni si Saul i, jana humaliangna i ma tentarania.

⁶ Dung i disapai si Daud ma si Ahimelek halak Het i, dohot si Abisai, anggi ni si Joab. (Si Zeruya do inang ni halahi), “Ise do na puluk masuk rap dohot au tu bagasan bandar ni si Saul i?” Dialusi si Abisai ma, “Au ma i!”

⁷ Jadi manyilmuk ma si Daud dohot si Abisai borngin i tu bagasan bandar i jana diida halahi ma si Saul hatiha modom di tonga-tonga ni parbandaran i, pantik tombakna tu tano di lambung ni ulunia. Si Abner dohot paranganna marmodoman humaliang si Saul.

⁸ Dung i didok si Abisai ma tu si Daud, “Madung dipasahat Debata di borngin on musumu tu ho. Paloas ma hupantikkon ia tu tano i dohot tombaknia i sandiri, anso hupangabis ia santiham hubaen, nada pola jabat dua noli baenonku!”

⁹ Tapi didok si Daud ma, “Ulang hahua ia! Pasti do hona uhum baenon ni Tuhan halak na mambaen jahat tu raja na nipiliNia.

¹⁰ Mangasahon Debata na mangolu i, huboto do na giot bunuon ni Tuhan i sandiri sanoli on si Saul, betak sanoli on muda dung dapot hatihana, sanga muda mate di parporangan ia.

¹¹ Sai diantahi Tuhan ma nian au mamunu raja na nipili ni Tuhan i! Tombakna i ma dohot gendina i buat, anso kehe hita!”

¹² Dung i dibuat si Daud ma tombak dohot gendi i sian lambung ni ulu ni si Saul, lalu kehe halahi. Sahalak pe nada adong na marnida i sanga na mamboto na masa i, sanga pe na tarsunggul, angke diparo Tuhan do tu halahi sude parmodomon na sinok.

¹³ Dung i taripar ma si Daud tu bariba ni rura i lopus tu ambubu ni dolok i, jana gabe dumao ma antarania dohot parbandaran ni si Saul i.

¹⁴ Dung i pio-pio ma si Daud tu si Abner dohot tentara ni si Saul i, “Abner! Dibege ho do tu au on?” Pio-pio muse ma si Abner, “Ise dehe na marsurahi i?”

¹⁵ Dialusi si Daud ma, “Ho dehe na gumogo di Israel, Abner? Biasi nada dijagoi ho tuanmu, raja i? Baru masuk dope sada halak tu parbandaranmunu i laho mamunu tuanmi.

¹⁶ Nada manjadi ho mandalankon karejomu, Abner! Mangasahon Tuhan na mangolu i, sapatutna do nian dimatehon hamu sude, angke nada dijagohon hamu tuanmunu na nipili ni Tuhan i. Ligi ma! Ma di dia he tombak ni raja i? Ma di dia gendi na di lambung ni ulu ni raja i nangkin?”

¹⁷ Ditandai si Saul do sora ni si Daud jana disapai ia ma, “Ho dehe i, amang Daud?” Dialusi si Daud ma, “Olo, rajanami.”

¹⁸ Didok ia muse dope, “Biasi dope laing dikojar raja i au? Hasalaan dia do na hubaen?

¹⁹ Tangihon jolo rajanami elek-elekhon. Sugari sura Tuhan na mangelek raja i anso mamunu au, sada haul pe nihaulkon tuSia, mombun ma rimasNia tu au. Tapi sugari sura jolma na manyosoi raja i jolma na tutu, sai hona bura ni Tuhan ma i! Hara ni pangalaho ni halahi, gabe hona usir ma au sian tano na nijanjihon ni Tuhan jana disuru morot tu luat na asing disi ma au angkon mamele tu angka debata na asing.

²⁰ Ulang ma antong padiar au hona bunu di tano na asing, dao sian Tuhan. Aha ma he gunana ro raja ni Israel laho mambunu au songon halak na mambunu manuk harangan di dolok-dolok?”

²¹ Dung i dialusi si Saul ma, “Ma sala na hubaen i. Mulak ma ho anakku, Daud! Nada baenonku be na jahat tu ho, dibaen madung dipadiar ho au mangolu napotangin. Na bodo ma antong pangalahongku. Na dung tutu situtu do au hape lilu.”

²² Tapi dialusi si Daud ma, “Indon do tombak ni raja i, suruhon ma sahalak tentarami ro tuson mangalapsa.

²³ Sai na pasupasuon ni Tuhan do ganop halak na burju jana na tigor. Angke haru pe dipasahat Tuhan raja i sadari on tu au, tapi na so ra do au mambaen jahat maradopkon raja na nipili ni Tuhan.

²⁴ Antong, songon raja i na hupadiar mangolu di ari sadari on, sai songon i ma nian dijagohon Tuhan au jana dipalua sian sude parmaraan!”

²⁵ Dung i didok si Saul ma tu si Daud, “Tuhan ma mamasumasu ho, anakku! Sai mardohar ma ho di bagasan sude karejomu!” Dung i dipatorus si Daud ma pardalanannia, jana si Saul pe mulak ma tu bagasna.