1 SAMUEL 24 - BIBEL JAMITA NA DENGGAN

Si Daud padiarkon mangolu si Saul

¹ Sian i ma si Daud kehe tu Luat En-Gedi jana martabuni di liang-liang.

² Di na baru mulak dope si Saul sian parporangan mangalo halak Pilistin, dijagit ia ma barita na dung di parhorsihan na di lambung En-Gedi si Daud.

³ Manigor dipili si Saul ma tolu ribu tentara na dumenggan sian sude Israel, lalu kehe ma i manjalahi si Daud dohot parangannia i di Habincaran ni Dolok Batu Hambeng Harangan.

⁴ Jadi lalu ma si Saul di lambung ni angka bara ni hambeng di topi ni dalan. Adong muse do disi sada liang jana masuk ma si Saul tusi laho tu aek na godang. Hape nian laing di liang i muse do topet si Daud dohot parangannia i martabuni tar dumao tu bagasan.

⁵ Dung i didok parangan ni si Daud i ma tusia, “On ma hatiha hadenggananna di tuan i! Inda he na dung didok Tuhan do tu tuan i, ‘PasahatonKu ma musumu tu ho, baen ma sanga na aha giotmu tusia!’ ” Dung i manyilmuk ma si Daud tu inganan ni si Saul jana sip-sip ma ia manggotap saotik sian topi-topi juba ni si Saul i.

⁶ Tapi dung salpu, songon na sala do tu pangkilalaannia dung dibaen ia songon i.

⁷ Didok ia ma tu parangannia i, “Sai Tuhan ma manjagohon ulang jabat tarbaen au na jahat maradopkon rajangku na nipili ni Tuhan i. Saotik pe na so tola do parkancitanku ia, dibaen raja na nitodo ni Tuhan do ia!”

⁸ Songon i ma dielek si Daud parangannia i, jana nada dipaloas ia halahi mangalo si Saul. Jongjong ma si Saul jana ditadingkon ia ma liang i laho patoruskon pardalanannia.

⁹ Si Daud pe ruar muse ma sian liang i jana pio-pio ma ia sian pudi ni si Saul, “Ale rajanami!”

¹⁰ Manaili ma si Saul tu pudi jana tungkap ma si Daud mamparsangapi lalu didok ia, “Biasi ditangihon raja i hata-hata ni halak na mandok na giot agoonku raja i?

¹¹ Saonnari diida raja i sandiri ma nangkin di bagasan liang i madung dipasahat Tuhan raja i tu au. Na dung dielek-elek do au laho mamunu raja i tapi nada ra au. Hualusi do, na so ra au mamparkanciti rajangku na nipili ni Tuhan.

¹² Ligi ma amang, ligi ma gotap-gotap ni baju ni raja i na hutiop on! Satutuna tarbunu au do nian raja i, tapi hum na saotik on sajo do hugotap. Jadi torang do na so adong rohangku mambaen na jahat sanga na giot mangago. Hape diayak-ayak raja do au haru pe nian na so adong saotik pe salangku maradopkon raja i.

¹³ Sai Tuhan ma na mamutuskon sanga ise do sian hita na marsala! Sai Tuhan ma na mambaloskon pambaenan ni raja i tu au tapi anggo au saotik pe nada hancitan raja i baenonku.

¹⁴ Diboto raja i do pandohan ni umpama narobi songon on, ‘Hum halak na jahat do na mambaen hajahatan.’ Jadi hara ni i, nada hancitan raja i baenonku.

¹⁵ Diparrohahon raja i ma jolo au on na giot bunuon ni raja ni Israel! Ligi ma au on na nikojarnia i! Anjing na mate sajo do au, hum songon sada hutu sajo.

¹⁶ Tuhan ma na gabe hakim antara ni raja i dohot au. Sai dipareso Ia ma parkaro on, jana Ia ma mangondihon dohot na paluahon au sian tangan ni raja i.”

¹⁷ Dung sidung si Daud na pajojorkon hata i, didok si Saul ma, “Tutu dehe i, anakku si Daud ho?” Lalu tangis ma ia.

¹⁸ Jadi didok ia ma tu si Daud, “Ho do na tutu jana au do na sala. Hajahatonku maradopkon ho madung dibaloskon ho dohot na denggan.

¹⁹ Madung dipatidahon di ari sadarion na denggan do hape rohamu tu au, angke nada dibunu ho au haru pe na dung dipasahat Tuhan au tu tanganmu.

²⁰ Jarang do dapot halak na padiarkon musuna malua boti! Antong, sai dipasupasu Tuhan ma ho hara ni angka na nibaenmu maradopkon au sadari on!

²¹ Saonnari pos ma rohangku, ho do na gabe raja di Israel jana sai tongtong do togu harajaan Israel di toru ni tanganmu.

²² Saonnari janjihon ma mangasahon Tuhan paboa na so timpaskononmu pomparanku jana nada sesaonmu goar ni pangisi ni bagasku!”

²³ Dung i marsumpa ma si Daud laho patuluskon songon i. Dung i mulak ma si Saul tu bagasnia, tapi anggo si Daud dohot parangannia i mulak ma tu inganan partabunianna.