1 SAMUEL 23 - BIBEL JAMITA NA DENGGAN

Dipalua si Daud kota Kehila

¹ Di sada ari adong ma na paboahon tu si Daud na ro halak Pilistin mangaroro tu kota Kehila mangarampas gandum na baru digotil.

² Dung i disapai ia ma tu Tuhan, “Angkon kehe dehe au mangalo halak Pilistin i?” ning ia. “Olo,” ninna Tuhan mangalusi, “Alo ma halahi jana palua ma Kehila.”

³ Tapi didok parangan ni si Daud i ma tusia, “Salang dison, di Juda on ma pola santak biarta; mur ma angkon kehe hita mangalo tentara ni Pilistin di Kehila.”

⁴ Jadi gabe mangido panogu-noguon ma si Daud mangulahi sian Tuhan, jana dialusi Tuhan ma, “Ulang gamang hamu! Roro hamu ma tu Kehila, harana giot pasahatonKu do tentara ni Pilistin i tu hamu.”

⁵ Jadi kehe ma si Daud dohot parangannia i tu Kehila mangalo dohot mamunu bahat halak Pilistin dohot mangarampas pahan-pahanan ni halahi. Songon i ma dibaen si Daud paluahon halak kota i.

⁶ Di na kehe si Abyatar anak ni si Ahimelek maporus mandapotkon si Daud lalu didongani ia ma si Daud tu Kehila, dioban ia muse do Efod.

⁷ Dung dipaboa tu si Saul na di Kehila si Daud, ning rohania ma, “Ma dipasahat Debata si Daud tu au. Ma hona jorat ia di na masuk ia tu kota na martembok jana na marpintu horbangan i.”

⁸ Jadi diarahon si Saul ma tentarania anso kehe tu Kehila laho manghobuk si Daud rap dohot parangannia i.

⁹ Hape na dung tarboto do tu si Daud na martahi na jahat si Saul tusia. Jadi gabe didok ia ma tu Malim Abyatar, “Oban ma efod i tuson.”

¹⁰ Jadi didok si Daud ma, “Tuhan, Debata ni Israel, madung hubege na giot ro si Saul tu Kehila laho mangaroncohon kota on hara ni au naposoMon.”

^11-12 “Tutu dehe barita na hubege i? O Tuhan Debata ni Israel, paboa ma jolo tu au.” Dialusi Tuhan i ma, “Olo, na giot ro ma si Saul.” Dung i disapai si Daud muse, “Pasahaton ni halak kota Kehila on dehe au dohot paranganki tu si Saul?” Dialusi Tuhan i ma, “Olo.”

¹³ Jadi manigor morot ma si Daud dohot parangan i hira-hira onom ratus halak sian Kehila jana mimbarimbar ma halahi sian inganan na sada tu inganan na asing. Dung dibege si Saul na dung luncat si Daud sian Kehila, disundati ia ma maksudnia laho mamorangi si Daud.

Si Daud di luat partoran

¹⁴ Dung i maringanan di liang ni dolok na di Parhorsihan Zip noma si Daud, disi ma ia martabuni. Sai marpupu do ia dikojar si Saul, tapi nada dipasahat Tuhan ia tu raja i.

¹⁵ Tapi haru songon i pe laing mabiar do si Daud, hara ni niet ni si Saul na sai giot mamunu ia. Di sada hatiha, di Hores na di Parhorsihan Zip do si Daud.

¹⁶ Didapotkon si Jonatan ma ia tusi laho patoguhon haporsayaannia bahaso sai na ondihonon ni Debata do ia.

¹⁷ Didok si Jonatan ma tusia, “Ulang ho mabiar, indangkan na lalu ho madabu tu tangan ni amanta. Torang do diboto amanta, ho do gontinia na gabe raja ni Israel jana au ma juguk di torumu.”

¹⁸ Dung i mamudun janji parale-aleon ma si Daud dohot si Jonatan di adopan ni Tuhan. Dung salpu i mulak ma si Jonatan tu bagasnia, tapi anggo si Daud laing tinggal do di Hores.

¹⁹ Dung i adong ma sanga na piga halak sian Zip mangadop tu si Saul di Gibea na mandok, “Di hami on do martabuni si Daud di bagasan ni angka liang na di lambung ni Hores, di Dolok Hakhila sabola Selatan ni Parhorsihan Juda.

²⁰ Hami boto do na gogo sajo roha ni raja i laho manangkup ia; jadi ro ma raja i tu hami on. Hami jamin ma i, tartangkup raja i do i.”

²¹ Dialusi si Saul ma, “Sai dipasupasu Tuhan ma hamu hara ni burjumunu tu au!

²² Kehe ma hamu jana pastihon hamu ma mangulahi; tangkas ma pareso hamu sanga na di dia si Daud jana ise na marnida ia disi. Anggo hubege, na malo situtu do ia.

²³ Jadi tangkas ma pareso hamu sanga liang dia na jungada dipake ia inganannia martabuni, dung i ulahi hamu ma ro tuson laho paboahon tu au. Disi ma rap kehe au dohot hamu, jana muda laing di luat i do ia antong, musti hujalahi, haru lopus husarsar sude Juda!”

²⁴ Jadi kehe ma halahi mulak tu Zip manjoloi si Saul. Di hatiha i di Parhorsihan Maon di rura na lungun na di Luat Selatan ni Parhorsihan Juda do si Daud dohot parangannia i.

²⁵ Ro ma si Saul dohot tentarania i giot manjalahi si Daud, hape dipaboa halak ma pangalaho i tu si Daud, jadi gabe kehe ma ia tu dolok batu na di Parhorsihan Maon jana disi ma ia maringanan. Dung diboto si Saul na songon i, manigor dikojar ia ma si Daud.

²⁶ Mardalan di lambung dolok sabola on ma si Saul dohot tentarania i, hapengani si Daud dohot parangannia sabola adu. Diompoti si Daud ma laho maporus sian si Saul na dung mamungka manghobuk laho manangkup halahi.

²⁷ Tapi ompot ma ro sada halak suruan mangadop tu si Saul mandok, “Tumibu ma sugari mulak raja i! Ma ro halak Pilistin mamorangi tanonta!”

²⁸ Gabe diantak si Saul ma na mangkojar si Daud, lalu kehe ma ia marporang mangalo halak Pilistin. I ma dalanna umbaen margoar inganan i Dolok Panyirangan.