1 SAMUEL 21 - BIBEL JAMITA NA DENGGAN

Maporus si Daud sian si Saul

¹ Jadi kehe ma si Daud mandapotkon Malim Ahimelek di Nob. Tarsonggot ma si Ahimelek mandapotkon si Daud tu ruar jana disapai ia ma, “Biasi ro ho tuson sasada ho?”

² Dialusi si Daud ma, “Na disuru ni raja i do au jana nada tola paboaon karejo on sanga na tu ise pe. Jadi madung hutonai paranganku mandapoti au di sada inganan.

³ Santabi, saonnari na giot marsapa do au, aha do sipanganon na adong di ho amang? Lehen ma di au lima roti sanga bagi aha pe na adong dison.”

⁴ Jadi ninna malim i ma, “Nada adong di au anggo roti na somal, hum roti haul sajo do; tola do i buatonmu, asal ma na so baru marcampur paranganmi.”

⁵ Dialusi si Daud ma, “Tontu nada adong songon i dikarejohon halahi. Sai tongtong do muda markarejo hami, dijago paranganki do anso ias halahi, nian hum karejo na somal sajo do i; mur ma karejo na marhadohoan songon on!”

⁶ Dung i dilehen malim i ma roti haul i tu si Daud, angke hum roti na dung dihaulkon tu Debata do adong disia, jana dibuat ma i sian langgatan anso digonti dohot roti na imbaru. (

⁷ Topet muse do hape disi di ari i si Doeg halak Edom, kapala ni parmahan ni si Saul laho patuluskon sada aturan ni ugamo.)

⁸ Dung i marsapa ma si Daud tu si Ahimelek, “Adong dehe disimpan amang tombak sanga podang na bolas pakeonku? Gabe mopop sajo do parkehengku dibaen parenta na sian raja i, gabe nada sanga be mambuat podangku sanga sinjata na asing pe.”

⁹ Dung i dialusi si Ahimelek ma, “Husimpan do podang ni si Goliat na nibunumi di Rura Harangan; di pudi ni efod i do podang i, dibungkus dohot abit. Muda giot ho, buat ma, angke hum i do sinjata na adong dison.” Didok si Daud ma, “Nada adong be podang na jumeges di sandok luat on, lehen ma i tu au!”

¹⁰ Laing di na sadari i do si Daud kehe maporus sian si Saul, lopus lalu ia tu si Akhis raja ni Gat.

¹¹ Dipaboa angka pagawena i ma tu si Akhis, “Inda he si Daud, raja di halahi? Inda he ia do na nitortoran ni angka dadaboru lalu marendei, ‘Si Saul mamunu marriburibu musu, tapi si Daud mamunu marpulu ribu!’ ”

¹² Manggangu ma angka hata i tu pikiran ni si Daud jana gabe mabiar situtu ma ia mida Raja Akhis.

¹³ Jadi gabe dipauba si Daud ma pangalahonia di jolo ni halak na bahat. Di na niuji ni halahi laho manahan ia, dijomahi ia pintu horbangan ni kota i jana dipadiar ia ma maderder dedenia i lalu tu janggutnia i.

¹⁴ Dung i gabe didok si Akhis ma tu angka pagawenia i, “Na so diida hamu dehe na rintik bayo i? Biasi dioban hamu i tuson?

¹⁵ Na hurang dope lakna na rintik humaliang hami, umbaen na niobanmunu muse sada nari na rintik tu bagaskon?”