1 SAMUEL 19 - BIBEL JAMITA NA DENGGAN

Si Daud diayak-ayak si Saul

¹ Didok si Saul ma tu si Jonatan anaknia i dohot tu sude pagawenia na giot bunuonnia si Daud. Tapi na holongan do roha ni si Jonatan tu si Daud,

² jadi gabe didok ia ma tu si Daud, “Sai giot bunuon ni damang do ho; jadi jago ma ho! Martabuni ma ho ancogot manyogot di inganan na buni jana disi ma ho tinggal.

³ Kehe pe au tu padang-padang i jana jongjong pe au di lambung ni amanta di lambung ni partabunianmi. Jadi manghobari pe hami taringot tu ho jana paboaonku ma tu ho pangkataionnami i.”

⁴ Dung i dihatahon si Jonatan ma angka na denggan salaho tu si Daud tu si Saul, “Amang, ulang ma antong mardosa ho maradophon si Daud naposomi. Harana nada adong hasalaan dibaen ia tu amang, balikna do, na dung bahat do na denggan dibaen ia tu amang.

⁵ Ma pola martaru hosa ia di na mamunu si Goliat, jana dilehen Tuhan do hamonangan na godang tu Israel markite-hite ia. Diida amang sandiri do na masa i, jana jop do roha ni amang di hatiha i. Jadi biasi ma saonnari giot pusaon ni amang halak na so marsala i jana giot bunuon ni amang si Daud so adong harana?”

⁶ Gabe torang ma roha ni si Saul hara ni hata ni si Jonatan i, jana marsumpa ma ia mangasahon goar ni Tuhan bahaso na so bunuonnia be si Daud.

⁷ Dung salpu i dipiohon si Jonatan ma si Daud, lalu dicaritohon ia ma sude pangkataion i. Dung i dioban ia ma si Daud tu si Saul, jana dioloi si Daud ma raja i songon na salpu i.

⁸ Dung i masa muse ma porang mangulahi dohot halak Pilistin. Diroro si Daud ma halahi jana talu sude, jana marlojongi.

⁹ Di sada ari juguk-juguk ma si Saul di bagasna maniop-niop tombak di tanganna jana si Daud hatiha marhasapi. Ompot ma susur tondi na jahat na nisuru ni Tuhan i tu si Saul.

¹⁰ Giot dipantomkon si Saul ma si Daud tu dingding i dohot tombakna i. Tapi marhusor ma si Daud, gabe pantik ma tombak i tu dingding i. Marlojong ma si Daud palua dirina.

¹¹ Laing di borngin i disuru si Saul ma piga-piga halak tu bagas ni si Daud laho manjago dohot laho mamunu si Daud manyogotna i. Tapi didok si Mikal dadaborunia i ma tusia, “Muda nada kehe ho borngin on, ancogot manyogot bunuonna ma ho.”

¹² Dung i dipaijur si Mikal ma si Daud sian jandela, jana marlojong ma si Daud paluahon dirina.

¹³ Dung i dibuat si Mikal ma gana-ganaan Terafim lalu dipayakkon ia ma i di podoman ni si Daud. Dung i dibaen ia ma sabola uluna i bantal sian imbulu ni hambeng, lalu ditutupi ia muse ma i dohot ulos.

¹⁴ Jadi di na ro suruan ni si Saul laho manangkup si Daud, didok si Mikal ma, “Marnyae do si Daud.”

¹⁵ Tapi disuru si Saul ma halahi mangulahi tusi anso diligi mata ni halahi sandiri si Daud. Diparentahon ia, “Oban hamu ma ia tuson dohot podomanna i, anso hubunu.”

¹⁶ Jadi masuk ma na disuru i tu bagasan kamar i, hapengani patung do na payak di podoman i dohot bantal imbulu ni hambeng sabola uluna i.

¹⁷ Disapai si Saul ma tu si Mikal, “Biasi paoto-otoonmu au songon on? Ditolong ho ma hape malua musungku!” Dialusi si Mikal ma, “Bunuonnia do au pandoknia anggo inda hutolong ia.”

¹⁸ Dung malua si Daud, kehe ma ia tu bagas ni si Samuel di Rama, lalu dipajojor ia ma sudena na nibaen ni si Saul i tusia. Dung i rap kehe ma si Daud dohot si Samuel tu Nayot jana tinggal disi ma halahi.

¹⁹ Tapi dipaboa ma tu si Saul na tinggal di Nayot si Daud di lambung ni Rama.

²⁰ Jadi gabe disuru si Saul ma sanga na piga halak suruannia laho manangkup si Daud. Hape diida halahi ma sarombongan panurirang na manortori jana na rap marsurak-surak, na diuluhon ni si Samuel. Jadi gabe digohi Tondi Ni Debata ma angka suruan ni si Saul i, jana gabe dohot muse ma halahi manortori bope marsurak-surak.

²¹ Dung lalu barita i tu si Saul, disuru ia muse ma angka suruan na asing jana halahi pe laing dohot ma manortori dohot marsurak-surak. Patolunolihon disuru si Saul ma angka suruanna jana laing tarjadi ma na songon i dohot tu halahi.

²² Jadi hara ni i, gabe si Saul noma kehe tu Rama. Disi lalu di sumur na godang na di Seku, disapai ia ma sanga na di dia si Samuel dohot si Daud, jana dipaboa halak ma tusia na di Nayot halahi.

²³ Jadi dipatorus ia ma tusi, tapi ia pe digohi Tondi Ni Debata muse ma, gabe manortori dohot marsurak-surak sapanjang na mardalan i tu Nayot.

²⁴ Dung lalu disi, ditanggali ia pakeannia jana manortor ma ia dohot marsurak-surak di jolo ni si Samuel, lopus tinggang tu tano marsaemara sadari i lopus bornginna i. (On ma mula ni pandohan, “Na gabe panurirang dehe dohot si Saul?”)