1 SAMUEL 18 - BIBEL JAMITA NA DENGGAN

¹ Dung sidung si Saul dohot si Daud na manghobar-hobari i, lohot ma roha ni Jonatan tu si Daud, lalu holong ma rohania tu si Daud songon dirinia sandiri.

² Jana mamungka sian ari i nada dipatola be ia mulak tu bagas ni simatobangnia.

³ Jadi disumpahon si Jonatan ma angkon marale-ale dohot si Daud salolot-lolotna, hara ni holong ni rohania di si Daud.

⁴ Dibuka si Jonatan ma baju juba na nipakenia i lalu dilehen ia tu si Daud, songon i dohot baju porangnia dohot podangnia, sior dohot bobatnia.

⁵ Sai monang do si Daud marporang sanga na tu dia pe disuru si Saul ia kehe. Jadi hara ni i diangkat si Saul ma ia gabe pamimpin ni tentarana jana jop do roha ni sude parangan maradu angka hatoban ni si Saul mida si Daud.

Mangiburu si Saul tu si Daud

⁶ Di na mulak si Daud dung ditaluhon ia si Goliat halak Pilistin i, marbaris ma angka parangan i masuk tu bagasan kota, ruar ma angka dadaboru sian sude kota ni Israel laho mangalo-alo Raja Saul. Marende-ende na riang ma halahi jana manortori mamalu rapano dohot hasapi.

⁷ Lalu marmoga-moga laing marendei ma angka anakboru i songon on, “Si Saul mamunu marribu-ribu musu, tapi si Daud mamunu marpulu ribu.”

⁸ Pabege-bege i, sun ma muruk ni si Saul. Gabe didok ia ma, “Na dung marpulu ribu ma hape dietong na mate dibaen si Daud, hape anggo au hum marribu-ribu sajo do. Ujungna jabatan raja i pe tusia noma!”

⁹ Mamungka sian ari i, sai mangiburu ma ia tu si Daud.

¹⁰ Ancogotna, di bagasna do topet si Saul maniop tombakna jana si Daud marhasapi songon na somal. Ompot ma susur tu si Saul tondi na jahat na nisuru ni Debata, gabe mangamuk ma ia songon halak na rintik.

¹¹ “Hupantikkon ma si Daud on tu dinding i!” ning rohania, lalu dipantomkon ia tombak i jabat dua noli tu si Daud, tapi sai tarciletkon si Daud antong.

¹² Diida si Saul ma bahaso na nidonganan ni Tuhan do si Daud, hape anggo ia sandiri ditadingkon Tuhan do. Jadi gabe mabiar ma ia maradopkon si Daud.

¹³ Jadi gabe dipadao ia ma si Daud sian humaliang bagas godang i jana dibaen ma ia gabe pamimpin ni saribu halak tentara. Jadi songon i ma si Daud sai mamimpin parangannia di sandok parporangan.

¹⁴ Manjadi do sude karejonia, angke didongani Tuhan do ia.

¹⁵ Di na niida ni si Saul sai na marpupu mardohar do si Daud, mur mabiar muse ma ia tu si Daud.

¹⁶ Tapi holong do roha ni sandok Israel dohot Juda tu si Daud angke ia do pamimpin na bahat pambaenanna.

Marbagas si Daud dohot boru ni si Saul

¹⁷ Ditahi roha ni si Saul ma anso dibunu halak Pilistin si Daud di bagasan porang anso ulang ia sandiri mamunusa. Jadi di sada ari didok si Saul ma tu si Daud, “Hupatunang ma borungku siangkaan i dohot ho, asal ma dipatuduhon ho habaranionmu marporang di Tuhan.”

¹⁸ Dialusi si Daud ma, “Ise ma he au on, jana aha ma he astuan ni damang di Israel, anso gabe babere ni raja i au?”

¹⁹ Tapi dung dapot hatihana di si Merab laho pasahaton tu si Daud, dipabagas ma anak boru i dohot si Adriel sian Mehola.

²⁰ Tubu ma holong ni roha ni si Mikal boru ni si Saul na asing tu si Daud. Di na tarbege i tu si Saul, jop ma rohania.

²¹ Didok ia ma di bagasan rohania, “Huarihon ma si Mikal tu si Daud, anso tarjorat si Daud jana bolas bunuon ni halak Pilistin.” Jadi paduanolihon didok si Saul ma tu si Daud, “Saonnari bolas ma ho gabe baberengku.”

²² Jadi disuruhon ia angka pagawenia anso di na buni didokkon halahi tu si Daud songon on, “Holong do antong roha ni raja i mida ho jana songon i muse do dohot sude pagawena, jadi on ma hatihana na tumbuk di ho laho mambuat boru ni raja i.”

²³ Tapi di na palaluhon hata i halahi tu si Daud, dialusi ia ma, “Na mura-mura do lakna diambang hamu gabe babere ni raja? Halak na pogos do au boti na so masuk kira!”

²⁴ Dipaboa angka pagawe i ma alus ni si Daud i tu si Saul,

²⁵ jana disuru si Saul ma halahi mandok tu si Daud, songon on, “Hum saratus do sibur-sibur ni halak Pilistin dipangido roha ni raja i songon bolina, i ma na songon palalu hosom tu musu ni raja i.” (On ma sangkap ni si Saul laho pasahatkon si Daud tu halak Pilistin.)

^26-27 Dipalalu angka pagawe ni si Saul i ma tona i tu si Daud, jana jop ma roha ni si Daud na giot gabe babere ni raja i. Jadi hara ni i, painte so salpu hatiha na ditontuhon, kehe ma ia dohot parangannia tu Luat Pilistin. Dibunu ia ma dua ratus halak Pilistin, lalu dibuati halahi sibur-siburna i jana dipasahat halahi ma i tu si Saul sada pe nada adong hurangna. Dung i dipabagas si Saul ma si Mikal tu si Daud.

²⁸ Songon i ma torang diida si Saul, na nidonganan ni Tuhan do anggo si Daud jana dihaholongi si Mikal borunia i.

²⁹ Jadi gabe mur mabiar ma ia tu si Daud jana goyak rohania paida-idasa salolot mangolu ia.

³⁰ Ganop ro tentara ni Pilistin mamorangi, sai manjadi do si Daud ulang pado angka parangan ni si Saul na asing i. Jadi mur tarbonggal ma si Daud.