1 SAMUEL 16 - BIBEL JAMITA NA DENGGAN

Dimiahi si Daud gabe raja

¹ Dung adong sadia honok mangkuling ma Tuhan tu si Samuel, “Sadia honok nari ho marsak patunda ni si Saul i? Nada he na dung Hutulak do i gabe raja ni Israel? Saonnari buat ma miak zetun jana kehe ma ho tu Betlehem, mandapotkon sada halak na margoar si Isai, dibaen madung Hutodo sada halak sian angka anaknia i na gabe raja.”

² Tapi disapai si Samuel ma, “Bia dehe pambaenku disi. Muda tarbege pangalaho i tu si Saul, pasti bunuonnia au!” Dialusi Tuhan ma, “Oban ma sada lombu jara-jara jana dokkon ma tu rayat i, umbaen na ro pe ho tusi na laho manghaulkon haul tu Tuhan do.

³ Dung i ontang ma si Isai tu acara parhaulan i. Hupaboa pe muse sanga aha na giot sibaenonmu. Sanga ise na Hupatuduhon tu ho, angkon i do miahanmu gabe raja.”

⁴ Dibaen si Samuel ma songon na nidok ni Tuhan i. Disi lalu ia di Betlehem, dialo-alo angka pamimpin ni kota i ma ia tarsonggot be jana disapai halahi ma, “Na maroban hahorasan dehe ulaning haroro ni ompu i?”

⁵ Dialusi si Samuel ma, “Olo, tutu do i. Na giot manghaulkon haul tu Tuhan do na huharohon. Jadi paias hamu ma dirimunu anso tarbaen hamu dohot di na marhaul i.” Si Isai pe dohot angka dakdanakna i laing dohot ma disuru ia paias dirina be, jana diontang ia tu parhaulan i.

⁶ Dung marlagut halahi jana diida si Samuel ma si Eliab anak ni si Isai i, marpikir ma ia, “On ma pasti na nipili ni Tuhan.”

⁷ Tapi didok Tuhan ma tu si Samuel, “Ulang marguru ho di ginjang ni pamatang dohot di jogi ni rupana; nada i por ni rohangKu. Nada songon parsuhat ni jolma parsuhatKu. Anggo jolma siida rupa do, tapi anggo Au marnida roha do.”

⁸ Dung i dipiohon si Isai ma si Abinadab anaknia i lalu disuru ia mangadop tu si Samuel. Tapi didok si Samuel ma, “Ia pe nada dipili Tuhan.”

⁹ Dung i disuru si Samuel ma si Sama ro, tapi didok si Samuel ma, “Ia pe nada dipili Tuhan.”

¹⁰ Songon i ma margonti-gonti disuru si Isai anaknia na pitu i mangadop tu si Samuel, tapi didok si Samuel ma tusia, “Nada halahi na nipili ni Tuhan.”

¹¹ Dung i marsapa si Samuel tusia, “On dehe sude anakmi?” Dialusi si Isai ma, “Adong dope tinggal sianggian i, tapi topet do marmahan biri-biri ia saonnari.” Didok si Samuel ma, “Suru ma mamiohon ia, angke nada haulkononta dope haul i painte so ro ia.”

¹² Jadi disuru pio si Isai ma anakna i. Hapengani sada doli-doli na jogi do ia jana na togar, boti matana jeges. Dung i didok Tuhan ma tu si Samuel, “On ma ibana, miahi ma!”

¹³ Manigor dibuat si Samuel ma miak zetun jana dimiahi ia ma si Daud gabe raja di jolo ni angka angkangnia i. Laing di hatiha i manigor digohi Tondi Ni Tuhan ma si Daud. Mamungka sian ari i dohot tu ari na mangihut sai didongani Tondi Ni Tuhan ma ia. Dung i mulak ma si Samuel tu Rama.

Si Daud di bagas godang ni si Saul

¹⁴ Dung i ditadingkon Tondi Ni Tuhan ma si Saul, jana diparkanciti tondi na jahat na nisuru ni Tuhan ma ia.

¹⁵ Jadi gabe didok angka hatobannia ma tusia, “Hami boto do, tondi na jahat do na nisuru ni Tuhan mamparkanciti raja i.

¹⁶ Muda tumbuk do di roha ni raja i, rade do hami manjalahi sada halak na malo marhasapi. Muda hatiha ro tondi na jahat i mamparkanciti raja i, malo ma halakna i mamiltik hasapina i, dung i gabe togar ma hilalaon ni raja i mangulahi.”

¹⁷ Dung i didok si Saul ma tu halahi parenta on, “Jalahi hamu ma sada halak na malo marmusik jana oban hamu ma tuson.”

¹⁸ Umbege i, didok sada halak hatobannia i ma, “Adong do anak ni si Isai na sian kota Betlehem na malo marmusik. Na barani do i jana sada parangan na burju. Boti muse na togap jana na malo mandok hata, jana didongani Tuhan do ia.”

¹⁹ Jadi disuru si Saul ma suruannia tu si Isai maroban tona songon on, “Suru ma anakmu si Daud na manjagoi angka biri-birimi mangadop tu au.”

²⁰ Dung i dibuat si Isai ma halode, dibobani ia ma i dohot sada anak ni hambeng, roti dohot kantongan kulit na gok anggur. Dilehen ia ma i sude tu si Daud anso dipasahat tu si Saul.

²¹ Songon i ma parro ni si Daud mandapotkon si Saul jana gabe pangoloina. Holong sajo do roha ni si Saul disia jana dibaen ma ia gabe sioban sinjata.

²² Dung i manongos tona ma si Saul tu si Isai, “Jop do rohangku mida si Daud. Paloas ma ia totop dison mangoloi au.”

²³ Mamungka sian i, ganop susur tondi na jahat i tu si Saul, dibuat si Daud ma hasapinia jana dipiltik ia ma i. Gabe sumonang ma pangkilalaannia jana togar mangulahi, dibaen madung ditadingkon tondi na jahat i ia.