1 SAMUEL 10 - BIBEL JAMITA NA DENGGAN

¹ Dung i dibuat si Samuel ma tanduk na marisi miak zetun, lalu diduruskon ia ma i tu ulu ni si Saul jana diumma ia si Saul lalu didok ia, “Madung dipabangkit Tuhan ho gabe raja ni bangsoNa Israel. Parentaonmu ma bangsoNa i jana ondihononmu halahi maradopkon angka musu ni halahi.” On ma tandana di ho, paboa na dung dipili ni Tuhan ho gabe raja di bangsoNia:

² Dung kehe ho manadingkon au di ari sadari on, marsuo ma ho dohot dua halak bayo di lambung kuburan ni si Rahel di Zelsah na di Luat Benyamin. Pabotohonon ni halahi ma tu ho, “Ma dapot angka halode na nijalahanmi. Nada sak be roha ni amangmu saonnari taringot tu angka pahan-pahanan i, tapi sai dipupu ia ma mambaen nasa na tarbaen ia anso dapot ho.”

³ Didok si Samuel dope, “Sian i mardalan ma ho torus lalu tu hayu haruaya na di Tabor. Adong ma disi tolu halak bayo na giot mandapotkon ho. Na giot kehe tu Betel do halahi laho manghaulkon haul tu Debata. Na sada manogu tolu anak ni hambeng, na sada maroban tolu kamata roti jana sahalak nari maroban kantongan kulit na marisi anggur.

⁴ Tabion ni halahi ma ho jana lehenonna ma di ho dua roti, na angkon sijagitonmu.

⁵ Dung salpu i angkon kehe do ho tu dolok ni Debata na di Gibea, inganan parbandaran ni halak Pilistin. Di pintu masuk laho tu kota i, marsuo ma ho dohot panurirang sarombongan na manuat sian langgatan na di ginjang dolok i. Manortori do halahi jana marsurak-surak, mamalu gambus, rapano, suling dohot hasapi.

⁶ Di hatiha i muse ma ho rajaan ni Tondi Ni Tuhan jana ihutkononmu ma tortor dohot surak ni halahi i, jana dilehen ma di ho roha na imbaru lopus gabe asing.

⁷ Muda tulus na songon i, baen ma sanga aha na didok rohamu denggan, angke didongani Debata do ho.

⁸ Dung salpu i angkon kehe do ho tu Gilgal jana painte ma disi pitu ari. Ro pe au laho manghaulkon haul situtungon dohot haul haluaan, lalu paboahon tu ho sanga aha na angkon sibaenonmu.”

⁹ Disi kehe si Saul manadingkon si Samuel, dijagit si Saul ma roha na imbaru sian Debata. Jana sude pangalaho na nipajojor ni si Samuel tusia, tulus muse ma i laing di na sadari i.

¹⁰ Di na lalu si Saul dohot pangoloinia di Gibea, ro ma panurirang sarombongan mandapotkon halahi. Laing di hatiha i muse ma dirajai Tondi Ni Debata si Saul, diihutkon ia ma tortor dohot surak-surak ni angka panurirang i.

¹¹ Diida angka jolma na mananda ia hian ma sian najolo pangalahonia i, gabe marsisapai ma na sada tu na asing, “Aha dehe na masa tu anak ni si Kis i? Na gabe panurirang muse dehe si Saul?”

¹² Jadi disapai halak na maringanan disi ma, “Bia do lakna taringot tu angka panurirang na asing i – pandokmunu ise lakna amang ni halahi?” I ma mula ni pandohan ni umpama on, “Na gabe panurirang muse dehe si Saul?”

¹³ Dung sidung si Saul na manortor dohot na marsurahi, kehe ma ia tu langgatan na di ginjang ni tor i.

¹⁴ Diida tulang ni si Saul ma ia dohot pangoloinia i lalu disapai ma halahi, “Na sian dia dehe hamu?” Dialusi si Saul ma, “Manjalahi halode na mago i do hami, jadi dung nada dapot hami be, kehe ma hami mandapotkon si Samuel.”

¹⁵ “Jana aha do didok ia tu hamu?” ning tulangna i manyapai.

¹⁶ Dialusi si Saul, “Pandoknia anggo angka halode i madung dapot.” Tapi nada dicaritohon si Saul tu tulangnia i na dung dimiahi si Samuel ia gabe raja.

Dipili si Saul gabe raja

¹⁷ Jadi dipiohon si Samuel ma rayat ni Israel anso marlagut tu adopan ni Tuhan di Mispa,

¹⁸ jana didok ia ma tu halahi, “On ma na nidok ni Tuhan, Debata ni Israel, ‘Madung Huoban hamu ruar sian Mesir dohot sian sude bangso na asing na paporsuk-porsuk hamu.

¹⁹ Madung Hupalua hamu sian ragam ni parkancitan dohot pardangolan, hape saonnari madung ditulak hamu Au Debatamunu, harana dipangido hamu do anso Hutodo sada raja di hamu. Antong anggo songon i, marlagut ma hamu di jolongKu, Tuhanmu, mangihutkon horong dohot margamunu.’ ”

²⁰ Dung i disuru si Samuel ma marga i sude ro tu jolo, jana hona ma Marga Benyamin.

²¹ Di na disuru ro tu jolo marhorong-horong sian Marga Benyamin i, hona ma horong ni si Matri. Ujungna ro ma tu jolo angka halaklahi na sian horong ni si Matri i, jana hona ma si Saul anak ni si Kis. Dung i dijalahi halahi ma si Saul, hape nada tarida ia.

²² Jadi sapa-sapa ma angka jolma i tu Tuhan, “O Tuhan, na dung dison dehe halakna i?” Dialusi Tuhan ma, “Martabuni do ia di balik ni barang-barang.”

²³ Jadi manigor dialap halahi ma si Saul sian i, jana dioban ma ia tu tonga-tonga ni rayat i. Jadi jongjong ma ia di tonga-tonga ni halahi jana ia ma na guminjang; anggo halak na asing hum olat ni abarania do.

²⁴ Dung i mandok hata ma si Samuel tu rayat i, “Ligi hamu ma halak na nitodo ni Tuhan, nada adong bandinganna sian hita sudena.” Marsurak ma sude bangso i, “Horas ma di raja i!”

²⁵ Dung i dipatorang si Samuel ma tu bangso i taringot tu hak dohot sipatupaon ni raja, lalu disuratkon ia ma i di buku na disimpan di inganan na badia. Dung i disuru si Samuel ma sude bangso i marmulahan tu bagasna be.

²⁶ Si Saul pe mulak ma tu bagasnia di Gibea, na nidonganan ni piga-piga halak na barani boti na dung dionjar ni Tuhan rohana mandongani si Saul.

²⁷ Tapi adong do sanga na piga halak na jahat mandok, “Jolma na songon on ma he na marguna di hita?” Dipamenek halahi ma si Saul jana nada mangalehen silua halahi tusia. Tapi dipaula so diboto ia do i.