YUDAS 1 - Kitta' Passitallikang Bau KAREBA BAJI'

Barasallang 1-2

¹ Battu ri Yudas, ata ri Isa Almase na urang siana'na Yakobus. Mange ri iyai turikeo' injo, turikamaseang lalang ri Allataala Amma na takkatuho tujunna Isa Almase.

² Barakka', dame salehangang na pangamaseang minahang ri kau.

Hukkungang mange risikonjo guru palusu 3-16

³ Urang siana' mala'biri'ku, rihattu attoje'-toje'ku apparri-parri ngukiri mange ri kau passala rikasalamakang pa'juluanta, nakke assimpole turisuro langukiri mange ri kau na appiu'rangi ri kau, solanna kau tulusu apparri-parri laa'bitantang rikatappakang numaeng ripabattu injo mange risikuanna tau tappa'.

⁴ Saba' kaissekangi rie' tau maraeng maeng antama' sa'bu-sa'bu ritangnga-tangngamu, iamo intu tau sallomo ritantuang larihukkung. Iyai injo tau gele tappa' ri Allataala tuappalingka sala injo barakka' Allataalata laappakasannang ri hawa napasuna to'jua, na lasangkali se're-se'renna Tukahasa na Karaengta, Isa Almase.

⁵ Mingka, manna injo maeng muissekimu iangase'na injo na gele pole mubata-batai, nakke a'ra' appiu'rangi ri kau ma'nassana toje'i Karaeng lapakasalama'i umma'Na battu ri tana Massere, mingka maeng injo lapakamate ngase'i sikuanna tau gele injo tappa' ri Ia.

⁶ Appakonjo todo'i sikuanna malaeka' gele injo tunru' ripassanggaang kakahasaannai, mingka labokoi tampa' pammariannai, ritahangi ri Allataala surangang rante tide' la'busu'na lalang ri lino kakalammangang sa'genna rihattu pangadelang riallo bakka' injo.

⁷ Appakonjomu, Sodom surang Gomora na sikonjo kota maraenganna, nulalang rita'ra assimpole lageokangi kabalerang inni surang a'bojai kasannangang nugele siratang, maeng latanggommu passissa api tide' tappu'na laa'jari pappiu'rangi mange risikuanna tau.

⁸ Manna appakonjoi, sikuanna tau paso'na-so'na inni lapakarammasa todo' batangkalenna na latua-tuai kakahasaanna Allataala surang latadeai sikonjo nula'biri ri suruga.

⁹ La'bipa pole ponggaha malaeka', Mikhael, lalang rise're passisalapahangang surangang Ibilisi ripassala batangkale matena Musa, gelei barani laadeli Ibilisi injo surangang ripau pattua-tua, mingka lakua, Bisannabali Karaeng angga'gara ri kau!

¹⁰ Mingka, iyai injo tuattua-tuai mange risikuanna nugele laisseki. Iyai injo nusangga laissekinna jua lalang ri naha-nahanna assimpolei binantang nutide' injo akkala'na. Injomo nua'jari passabakang kamateang mange ri iyai.

¹¹ Silakamo mange ri iyai, saba' iyai minahangi ripa'lalangang nulapa'lalangi injo Kain na kanara languppa passahalang iyai laapantama'i kalenna lalang rikalinguang assimpole Bileam rihattu riolo, na mate ngase'i kanara pamarontakang assimpole Korah.

¹² Iyaimo inni karammasang lalang ripasse're-se'reang passikamaseammu, saba' iyai gelei siri' a'bala'-balala na sangga kalenna jua lapariati; iyai injo assimpolei salihu' nugele ngerang bosi, nuallajang lairi' anging; iyai injo assimpolei poong kaju rihattu pambuana gelei ambua, poong kaju ta'bu'buki injo surang aka'na na mate.

¹³ Iyai injo assimpolei bombang bakka', nuappakaa'busa nudaa battu ri kalennai to'jua; iyai injo assimpolei bintoeng kalari-lari, numange ri ia sadiamu tampa' ri lino kalammang situli-tulinna.

¹⁴ Henokh, pinangka' makatuju battu ri Adam, maeng todo'i assare panjanjang ri allo riboko passala ri iyai, lakua pauna, ”Sitoje'na Karaeng rie'mu larurung assa'bu-sa'bu tau tangkasa'Na,

¹⁵ langadeli sikuanna tau. Ia laassare hukkungang risikuanna tau daa sipa'na saba' sikonjo panggeokang daa nulageokangi injo na saba' sikonjo pau daa nulapau injo sikuanna tau doraka nudaa injo sipa'na mange ri Karaeng.”

¹⁶ Iyai injo tau a'moro-moro surang a'nganro ripassala passareanna, tallasa assituru' hawa napasuna, mingka babana appasulu'i pau bura na iyai injo tau a'bali'-ballang languppa passahalang.

Pappiu'rangi laappakajarre' katappakang 17-23

¹⁷ Mingka kau, urang siana' mala'biri'ku, u'rangilalo apa nuriolo maeng ripau mange ri kau battu risikonjo suro-surona Karaengta, Isa Almase.

¹⁸ Saba' iyai maeng appau mange ri kau, ”Rilakala'busanna jammang larie' patua-tua laattallasa laturuki hawa napasu daana.”

¹⁹ Iyai injo tuappa'besere, iyai injo rupatau lino tugele ngampunnai Nyaha.

²⁰ Mingka kau, Urang siana' mala'biri'ku, pakaterasai kalemmu rate ripappoongang katappakammu nukaminang si'nong injo na ngera dowaangiko lalang ri Nyaha Tangkasa.

²¹ Katuho appakonjoi kalemmu lalang ripangamaseang Allataala na attajang dalle' ri Karaengta, Isa Almase, tujunna tallasa mannannungang.

²² Pappijanjangangi pangamaseammu mange ri iyai tubata-bata injo,

²³ pakasalama'laloi iyai lalang ta'ra mualle passa ngase'i battu ri api. Na pappijanjangangi pa'rikodommu nulapinahang injo todo' malla' mange ri tau maraeng, mingka kalikkingangi pakeannai numaeng larammasi injo ripassabakang sikonjo a'ra' rikadorakaang.

Panongko' 24-25

²⁴ Mange ri Ia, tukahasa injo akkatuho solanna andako tatto'ro na Ia todo'mo laerangko tide' rammasa'na na surangang karannuang bakka' ri a'rakang kala'biranNa.

²⁵ Iamo Allataala tuse're injo, Pappakasalama'ta patteteang ri Isa Almase, Karaengta, mange ri Iamo kala'birang, kabakkakang, kagassingang na kahasa rigelenapa sikonjo jammang na konni-konnina surang sa'genna situlusu'na. Aming.