YAKOBUS 5 - Kitta' Passitallikang Bau KAREBA BAJI'

Pappiu'rangi mange ri tau kalumannyang 5:1-6

¹ Jari, konni-konnina kau tau kalumannyang intu, ammarrangiko na apparauiko rikamarasaiang lamuuppa injo!

² Kakalumannyangammu botto'mu, na pakeammu lakanrei bu'bu'!

³ Bulaeng surang salakamu ta'garammu, na ta'gara'namo a'jari passa'bi laa'bali ri kau na lalakanre assimmu assimpole api. Kau maeng appasse're kakalumannyangang rihattu seppa'namo jammang kala'busang.

⁴ Sitoje'na maeng kalangngerammu sa'ra kariu' bakka', kanara sahala'na tuanduru injo hassele ri kokommu gelei musareangi, na pa'nganroinna tuanduru injo hassele ri kokommu ambattumu mange ri tolinna Karaeng risibatu lino.

⁵ Kau maeng tallasa lalang rikala'bi-la'biang na a'rannu-rannu ri lino, kau maeng mupakasannangi atimu rihattu seppa'namo jammang panyumbeleang.

⁶ Kau maeng assare hukkungang, la'bipa pole muno tau naba na ia gelei akkulle a'bali ri kau.

Sabbara lalang rikasissaang 5:7-11

⁷ Injomo saba'na, Urang siana', sabbarako sa'genna larapi' hattu pariekanna Karaeng! Sitoje'na pakoko intu attajangi hassele nulohe anggaranna battu ri kokonna na ia sabbarai sa'genna turung bosi.

⁸ Kau parallu todo'ko sabbara na parallui mupakasa'ga' atimu, saba' pariekanna Karaeng gelemu sallo!

⁹ Urang siana', akolalo a'husa-husa na assipassala, solanna andaiko ri hukkung. Sitoje'na rie'mu Hakking injo ammenteng ri a'rakang babaang.

¹⁰ Urang siana', pinahangi ta'ra tallasa'na sikonjo nabbi numaeng injo a'bisara ripassabakang arengna Karaeng. Na anteekamua kamarasaiang surang kasabbarannai.

¹¹ Sitoje'na ditte ri are'i iyai injo tau sunggu, iamo intu iyai tusabbara injo; maeng mulangngeremu passala kasabbaranna Ayub na maeng muisse'mu apa nulapasadiaang Karaeng rikala'busanna mange ri ia, saba' Karaeng sanna' rassii pa'rikodongang na pangamaseang.

Passala risapatta, na pangera dowaang tujunna tau garring 5:12-20

¹² Mingka numakase're, Urang siana', akolalo assapatta passabakang suruga iyareka passabakang lino iyareka passabakang manna maraenganna pole. Ampa io, parallui mupau io, ampa gele parallui mupau gele, solanna andako lataba hukkungang.

¹³ Ampa rie' se're tau ri kau assinsara, baji'mu ia ngera dowaang! Ampa rie' se're tau rannu baji'mu ia akkelong-kelong!

¹⁴ Ampa rie' se're tau ri kau garring, baji'mu ia akkeo' tutoa-toa jamaah, solanna iyai injo lapangera dowaangi surang lajammu'i minnya' lalang arenna Karaeng Isa.

¹⁵ Patteteang ripangera dowaang ansulu'i injo battu rikatappakang, Karaeng lapakasalama'i na lapakagassingi tau garring inni. Na ampa ia maengi anggeokang kadorakaang, injo ripakalappasamu kadorakaanna.

¹⁶ Injomo saba'na, paralluko assianiang kadorakaang surang assipangera-ngera dowaangiko, solanna gassingko battu rigarrimmu. Pangera dowaanna tau naba intu, sanna' bakka' kahasana na rie' hassele'na.

¹⁷ Elia injo rupatau samara to'juai assimpole ditte, na ia attoje'-toje'i ngera dowaang, solanna andai turung bosi, na toje'i bosi injo gelei turung ri tana talluntaung annambulang sallona.

¹⁸ Jari ia ngera dowaangi pole na langi' injo appaturungi bosi na tana injo appatimbo lamung-lamung.

¹⁹ Urang siana'ku, ampa rie' ri kau tua'lili battu rikanabaang na rie' se're tau lapakangu'rangi,

²⁰ piissekilalo ma'nassana inai lapakangu'rangii tau a'bua' injo kadorakaang battu rigeo' linguna, ia lapakasalama'i tau injo battu rikamateang na nongko'i lohe kadorakaang.