YAKOBUS 4 - Kitta' Passitallikang Bau KAREBA BAJI'

Napasu daa na pa'bahaangang surangang lino inni 4:1-10

¹ Battu ri antee mae ammumba passisala pahangang na pa'beserang injo ri kau? Gelejua ammumbai battu ri napasu daamu nurie' injo lalang ri kalemmu?

² Mukaa'raki ngase'i, mingka gele muuppai, jari munoko; siriatiko, mingka gelei muuppa numukuangang injo, jari a'besereko na a'lagaiko. Geleko nguppa manna se're saba' gelemu ngera dowaang.

³ Iyareka ngera dowaangi juako, mingka geleiko nguppa manna se're kanara salana pangera dowaangmu, saba' numuera injo a'ra'i lamupakala'busu siba'lalonna laappakasannang napasu daamu.

⁴ Oe kau, tau gele intu mallang! Gelepaika muisse' ma'nassana pa'bahaangang surangang lino inni iamo intu ribaliangi Allataala? Jari, inai jua a'ra' a'jari bahaanna lino inni, injo ia lapaa'jari bali kalenna ri Allataala.

⁵ Akolalo rapangi ma'nassana Kitta' Tangkasa tide' alasanna laappau, ”Allataala langaiki surangang ripanyannung patteteang Nyaha Tangkasa lataro injo Allataala lalang ri kalenta!”

⁶ Mingka barakka' pangamaseang nulapassareang injo Allataala mae ri ditte, la'bi bakkakang battu ri injo. Kanara injo Ia lapaui, ”Allataala a'bali tau tampo, mingka ngamaseangi tau tuna ati.”

⁷ Kanara injo tunru'laloko ri Allataala, na baliangi Ibilisi, jari ia laallari battu ri a'rakammu!

⁸ Seppakilalo Allataala, na Ia seppa' mange ri kau. Tangkasi limammu, oe tau doraka intu! Na pakatangkasalaloi atimu, oe kau tau a'rua-rua intu atina!

⁹ Ngu'rangiko rikapanrakammu, pa'risi na apparaulaloko; sibaji'na pagegemu musambei surangang parau na kate'neammu surangang kapa'risang.

¹⁰ Pakatuna kalemmu ri a'rakanna Karaeng, na Ia laappakala'biri ri kau.

Akolalo appitina ri tau 4:11-12

¹¹ Urang siana'ku, akolalo assipitina! Inai jua lapitina urang siana'na iyareka laadeli, ia assalla hukkung na laadeli; na ampa kau ngadeli hukkung, injo kau gelemo tuanggeokang hukkung, mingka hakkinna.

¹² Se're jua Tua'bua' hukkung na tua'jari hakking, iamo intu Ia tukahasa appakasalama' na appakamate. Mingka inaiko, sa'genna kau a'ra' ngadeli riparammu rupatau?

Akolalo kaluppai Karaeng lalang naha-nahammu 4:13-17

¹³ Jari, konni-konnina, oe kau tuappau intu, ”Allo inni iyareka mintara kambe laa'lampakang mange ri kota anu, na konjomange kambe laammari sitaung sallona na laa'danggang surang languppa sahala”,

¹⁴ sitoje'na kau gelei muisse' apa laa'jari mintara. Apa battuanganna tallasa'mu? Tallasa'mu intu assimpolei ambu nusinampe' jua kajanjangang maeng injo lannya'i.

¹⁵ Siratanna kau parallu appau, ”Ampa Lakaa'raki Karaeng, kambe laattallasa na laanggeokang appakonni na appakontu.”

¹⁶ Mingka konni-konina kau mupakala'biri kalemmu lalang rikatampoang na sikuanna kala'birang appakonjo gelei naba.

¹⁷ Jari, ampa rie' se're tau laisse'i appaanteekamua laanggeokang nubaji', mingka ia gelei lageokang, injo ia dorakai.