YAKOBUS 3 - Kitta' Passitallikang Bau KAREBA BAJI'

Kadorakaang kanara lila 3:1-12

¹ Urang siana'ku, andalalo lohe tau ri kau a'ra' a'jari anrong guru; saba' muisse' ngase'i ma'nassana laa'jari anrong guru ditte lariadeli assituru' passuka' nula'bi bakkakang.

² Saba' ditte ngase' salaki lalang rilohe passala; inai gele minang anggeokang nusala battu ripappauna, iamo tau sangka', tuakkulle injo todo' lakahasai sibatu kalenna.

³ Ditte appipakei sa'mang mange ri baba jarang, solanna jarang injo tunru'i riditte, ri appakonjona akkulle todo'i rikahasai sibatu kalenna.

⁴ Na janjangisai kappala a'lolo' injo, manna injo sanna' bakka'na na lapololo'i anging ka'bu, mingka akkulle lakahasai guling nusanna' ki'di' assituru' a'ra'na juru mudina.

⁵ Appakonjo todo'i lila, manna injo se'rei bageang ki'di' ribatangkale, mingka akkullei appakatampo rilohe passala nubakka'. Pariatisai, rompo' luara injo akkullei ritunu battu ri api nusanna' ki'di'na.

⁶ Lila intu api todo'i; lila assimpolei se're lino risipa' daa na ngalle se're tampa' ri alla'na sikonjo bageang batangkalenta assimpole se're nuakkulle appakapanra' risibatu batangkale na anrammasi rikatallasanta, na lila injo ripabola'i ri api naraka.

⁷ Iangase'na binantang lambara, jangang-jangang, surang binantang a'leme' na binantang ri tamparang akkullei ripakanarang na maeng ripakanarammu ri rupatau.

⁸ Mingka gele rie' manna se're tau akkulle appakanarang lila; ia se'rei nuboang, nugele akkulle rikahasai, na rassii rasung appakamate.

⁹ Battu ri lila ditte appakala'biri Karaeng na Ammanta; na battu ri lila todo' ditte attadea rupatau nuripaa'jari injo assituru' rupanna Allataala.

¹⁰ Battu ri baba se're ansulu'i barakka' na pattadea. Urang siana', passala inni, gelei akkulle a'jari.

¹¹ Makala akkullei a'lo'loro ere la'ba na ere pai' battu rise're timbula'?

¹² Urang siana'ku, makala ma'ringi poong kaju ara akkulle ambua zaitun na poong anggoro akkulle ambua ara? Appakonjo todo'i timbula' ere pai' injo gelei akkulle a'lo'loro ere la'ba.

Pangisse' battu ri suruga 3:13-18

¹³ Inai ri kau anralang pangisse'na na rie' pappahanna? Sibaji'na lalang rita'ra tallasa naba ia lapappijanjangangi panggeokanna assituru' ripangisse' nubattu injo rikalumuang ati.

¹⁴ Ampa ri kau rie' sipa' siriati na kalemmu to'jua mupariati, akolalo a'la'bi'-la'biri na akolalo a'bura-bura a'bali rikanabaang.

¹⁵ Injo gele pangisse' nubattu ri suruga, mingka nubattu jua ri lino inni, battu rinapasu daana rupatau inni, nubattu ri setang.

¹⁶ Saba' ri antee mae rie' siriati na kaparalluang kale-kale a'bakka' ri injo rie' kajujaang na sikonjo rupanna panggeokang daa sipa'na.

¹⁷ Mingka pangisse' nubattu ri suruga makase're si'nongi, sitarrusu'na langai dame inni, lumu nyahai, katuru'-turukangi, rassi pangamaseang na lohe nubaji' lageokang, gelei mile tau assituru' nukajanjangang injo jua na gelei munape'.

¹⁸ Na hassele'na nubattu injo rikanabaang ripatahurui lalang rikadameang mange ri iyai tungerang injo dame.