YAKOBUS 2 - Kitta' Passitallikang Bau KAREBA BAJI'

Akolalo mile-mile tau 2:1-13

¹ Urang siana'ku, assimpole tau tappa' mange ri Isa Almase, Karaeng mala'biri'ta, andalaloi geokang katappakang injo lalang rimile-mile tau assituru' nukajanjangang injo jua.

² Saba', ampa rie' se're tau minahang antama' ripasse're-se'reammu surangang ammake sinsing bulaeng na ballo pakeanna na rie' todo' se're tau kaasi-asi ammake pakeang daa.

³ Na ngalikiko ri tau ballo injo pakeanna na appauiko: ”Mange ri ia, ri tampa' baji' inniki attolong!”, na mange ri tau kaasi-asi injo kau mupaui: ”Ammentengko konjomange!” iyareka: ”Attolongko ri lapara inni riampi' bangkengku!”

⁴ Gelejua ripangeokang appakonjomu a'bua'moko passisalaang lalang ri atimu na a'geo' assimpoleko hakking surangang pikkirang daa sipa'na?

⁵ Urang siana' mala'biri'ku, pilangngerilalo! Gelejua Allataala mile sikuanna tau rirapang injo kaasi-asi ri lino inni na lapaa'jari ngase'i kalumannyang rikatappakang surang tulanguppa dahuang ri Pakkaraengang Allataala numaeng latallikang injo mange risikuanna tau ngamaseang mange ri Ia?

⁶ Mingka kau maeng ngase'moko attua-tua ri tau kaasi-asi. Gelejua tau kalumannyang intumo anja'ja' na anrakalang ri kau mange ri pangadelang?

⁷ Gelejua iyai injo attua-tua mange ri Areng la'biri, numaeng lapaa'jari injoko anunna Allataala?

⁸ Mingka ampa kau appalampa hukkung makase're nurie' injo ta'ukiri lalang ri Kitta' Tangkasa: ”Kamaseangi parammu rupatau assimpole mukamaseanna kalemmu”, baji'i injo panggeokammu.

⁹ Mingka, ampa mile-mileko tau assituru' nukajanjangang injo jua, a'bua'moko intu kadorakaang, na ripassabakang hukkung injomo a'jari kaissekang ma'nassana kau anggeokang nusala.

¹⁰ Saba' inai jua minahang risikonjo hukkung, mingka ampa rie' se're bageang nugele lapinahang, a'battuangi sala ngase' juai.

¹¹ Saba' Ia tuappau injo, ”Ako assangkili”, Ia appau todo'i, ”Ako muno.” Jari, ampa geleko assangkili mingka munoko, injo gelejuako ngalleangang ri hukkung injo.

¹² Appaulaloko na a'geo'laloko assimpole sikuanna tau lariadeli ri hukkung nuassare injo kalappasang mange ri tau.

¹³ Saba' pangadelang tide' injo pangamaseanna laripitabaiyangi mange ri tau tide' injo pangamaseanna. Mingka pangamaseang inni laambetai ri pangadelang.

Katappakang gele injo lapinahang panggeokang tide' jua matu-matunna 2:14-26

¹⁴ Apamo matu-matunna, Urang siana', ampa rie' se're tau appau ma'nassana ia rie' tappa'na, mingka gelei lapappijanjangang ripanggeokanna? Akkulle juaika katappakang injo appakasalama' ri ia?

¹⁵ Ampa rie' se're urang siana'mu bura'ne iyareka bahine gele rie' pakeanna na kalara'i ri kanre allo-allona,

¹⁶ na apa matu-matunna ampa rie' se're tau ri kau appau, ”A'lampamako, makelaloko pakeang pappakabambang ri kalemmu na nganrelaloko sa'gemmu bassoro!”, mingka gelei assare mange ri ia apa nuparallu ri batangkalenna?

¹⁷ Appakonjo todo'i passala'na katappakang injo: Ampa katappakang injo gelei lapinahang panggeokang, katappakang injo matei.

¹⁸ Mingka ma'ringi rie' tau appau, ”Ri kau rie' katappakang na ri nakke rie' panggeokang”, nakke laappihali ri ia, ”Pappijanjanganglalo mae ri nakke katappakammu injo ampa tide' panggeokang, na lakupappinjanjangangi mange ri kau katappakangku battu risikonjo panggeokangku.”

¹⁹ Gelejua tappa'ko ma'nassana se're jua Allataala? Injo baji'i! Mingka manna pole sikonjo setang tappa'i ripassala injo na malla'i.

²⁰ Oe rupatau kumbala, a'ra'juako konni-konnina muakui ma'nassana katappakang inni ampa gelei lapinahang panggeokang iamo injo katappakang tide' matu-matunna?

²¹ Gelejua Abraham, ammanta, ripa'naba assituru' sikonjo panggeokanna, rihattunna ia lataro Ishak, ana'na, rate ri mejang passidakkaang koro'bang?

²² Mujanjangi ma'nassana katappakang injo anjamai surangang sikonjo panggeokanna na saba' ripanggeokanna injo katappakang a'jari sangka'.

²³ Ri appakonjona, a'rupamu kitta' appau injo, ”Jari tappa'mu Abraham mange ri Allataala, na passala injo rirekengi mange ri ia assimpole kanabaang.” Kanara injomo, Abraham riare'i: ”Bahaang Allataala.”

²⁴ Jari muisse'i ma'nassana rupatau inni ripa'nabai kanara ripanggeokanna na gele sangga kanara katappakang.

²⁵ Gelejua appakonjo todo'i Rahab, bandarang injo, ripa'nabai assituru' panggeokanna, rihattunna ia lasa'bu sikuanna tau risuro injo lalang ri saponna, ampai lapalappasa ngase' a'molong ripa'lalangang maraeng.

²⁶ Saba' assimpole batangkale ampa tide' nyahana injo matei, appakonjo todo'i katappakang injo ampa gelei lapinahang panggeokang injo matei.