YAHYA 9 - Kitta' Passitallikang Bau KAREBA BAJI'

Tau buta minang riampana rilaherang 9:1-14

¹ Rihattu a'lampanamo Isa, Ia anjanjangi se're tau buta minang riampana rilaherang.

² Akkuta'nangi ana'-ana' gurunNa mange ri Ia, ”Guru, inaimo anggeokang kadorakaang, tau inni to'jua iyareka tau toana, sa'genna ia buta rilahereng?”

³ Appihali Isa, ”Gele ia na gele todo' tau toana, mingka solanna sikonjo jama-jamaanna Allataala ripappijanjangangi lalang ri kalenna.

⁴ Ditte parallui rigeokang jamaanna Tuassuro injo ri Nakke, ampa rie' juapa matanna allo; kalarie' bangngi sa'genna gelemo rie' manna se're tau akkulle anjama.

⁵ Rihattu rie'Ku juapa lalang ri lino inni, Nakkemo sinara'na lino.”

⁶ Sungka'na maemmo lapau ngase' Isa, appe'rui naung ri tana, na a'bua'i jammeng battu ri pe'runa, maeng injo laalle na lapadompolo ri matanna tau buta injo sumpae'

⁷ na appaui mange ri ia, ”A'lampamoko, solori kalemmu ri kollang Siloam.” Siloam battuanna: ”Turisuro.” A'lampa toje'mu tau injo mange lasolori kalenna ampai muliang na akkullemu anjanjang matanna.

⁸ Mingka limbo-limbona surang sikuanna tau maraengang, laisse' injoi riolo assimpole paera-era, appau, ”Gelejua ia inni, tau sanging attolong injo ngera-ngera?”

⁹ Rie'mo tau appau, ”Toje'i, ia inni.” Rie' pole tau appau, ”Gele, mingka ia assintappai tau injo.” Tau injomo appau, ”Baa toje'i, nakkemo inni.”

¹⁰ Jari lakuaimo mange ri ia, ”Anteekamua matammu akkulle ambula'?”

¹¹ Pappihalinna, ”Tau riareng injo Isa a'bua' jammeng, lapadompoloi ri matangku na appaui mae ri nakke: A'lampamoko mange ri kollang Siloam na solori kalemmu. Jari a'lampa toje'a mange konjo na sungka'i maeng kusolori kalengku, akkullemu anjanjang matangku.”

¹² Jari akkuta'nang ngase'mu mange ri ia, ”Ia ri antee mae?” Pappihalinna, ”Nakke gelei kuisse.”

¹³ Jari iyai laerangi tau buta injo sumpae' mange ri tau Farisi injo.

¹⁴ Ri allo hattunna Isa a'bua' jammeng na lapakaambula'i matanna tau injo, iamo intu allo Passambajangang.

¹⁵ Injomo saba'na tau Farisi injo akkuta'nangi pole mange ri ia, anteekamua matanna akkulle ambula'. Pappihalinna, ”Ia appadompolo jammeng ri matangku, maeng injo kusolori kalengku, na konni-konnina akkullema anjanjang.”

¹⁶ Jari rie'mo sibageang tau Farisi injo appau, ”Tau injo gelei battu ri Allataala, saba' Ia gele lakatutui allo Passambajangang.” Sibageang pole appau, ”Makala anteekamua se're inni tau doraka akkulle a'bua' tanra nugele samara appakonjo?” Jari ammumbamu passisala pahangang ri iyai.

¹⁷ Jari lakuaimo isse' mange ri tau maeng injo buta, ”Na kau, apa panguppamu ripassala'na Ia, saba' lapakaambula'i matammu?” Pappihalinna, ”Ia se'rei nabbi.”

¹⁸ Mingka ponggaha Yahudi injo gele tappa' ma'nassana sumpae' butai na ampamu akkulle anjanjang, sa'genna iyai lakeo'i tau toana

¹⁹ na akkuta'nang ngase'i, ”Ana'mu inni, numupau injo ma'nassana ia butai rianakang? Ampa pade' appakonjoi, anteekamua ia konni-konnina akkulle anjanjang?”

²⁰ Jari appihalimu tau toana, ”Nutaisse' iamo intu ma'nassana ia inni ana'ba na ia butai rianakang,

²¹ mingka anteekamua ia konni-konnina akkulle anjanjang, injo gelei taisse', na inai lapakaambula'i matanna, injo gele todo'i taisse'. Pakkuta'nangang tommoi mange ri ia, saba' ia bakka'mu, na akkullemu appau lasa'bii kalenna.”

²² Appau appakonjoi tau toana, kanara mallakinna ri ponggaha Yahudi injo, saba' ponggaha Yahudi injo maemmu assamaturu' ma'nassana inai laani Isa assimpole Almase, laripela'i dere.

²³ Injomo saba'na tau toana appau, ”Ia bakka'mu, pakkuta'nangang tommoi mange ri ia.”

²⁴ Jari iyai makapinruannamo lakeoki tau buta injo sumpae' na appaui mange ri ia, ”Paui silambusu'na ri a'rakang Allataala; kambe taisse'i ma'nassana tau injo rie' kadorakaanna.”

²⁵ Pappihalinna, ”Apa tau injo rie' dorakana, gele kuisse'; mingka se're passala nukuisse', iamo intu ma'nassana nakke sumpae' buta, na konni-konnina akkullema anjanjang.”

²⁶ Akkuta'nang ngase'mu isse' mange ri ia, ”Apa lageokang mange ri kau? Anteekamua ta'ranna Ia lapakaambula' matammu?”

²⁷ Pappihalinna, ”Maemmu kupau mange ri kaui, na kau gele mupilangngeri; ngura kau a'ra'i mulangngere pole? Barang a'ra' todo'ko a'jari ana' gurunNa?”

²⁸ Laerang pattua-tuai iyai appau mange ri ia, ”Kau ana' gurunnako tau injo mingka kambe ana' gurunnakang Musa.

²⁹ Kambe taisse'i ma'nassana Allataala maengi appaui mange ri Musa, mingka passala'na Ia injo kambe gele taisse' battu ri antee mae assala'na.”

³⁰ Appihali tau injo mange ri iyai, ”Lannasa todo'a, kaui gele muisseki ri antee mae Ia battu, na Ia maemmu lapakaambula' matangku.

³¹ Ditte riisse'i ma'nassana Allataala gele appilangngeri tau rie' kadorakaanna, passangadinna tau lambusu na tau anggeokang injo ria'ra'Na.

³² Battu riolopa sa'genna allo inni gele minang rie' kalangngerang ma'nassana rie' tau appakaambula' mata ri tau rianakang buta.

³³ Ampa pade' tau injo gele battu ri Allataala, tantumu Ia tide' pakkullena.”

³⁴ Pappihalinnai mange ri ia, ”Kau inni rianakangko lalang rikadorakaang na kau a'ra' langajara ri kambe?” Jari lasuroimu ansulukang.

³⁵ Lalangngere Isa ma'nassana ia risuro ansulukang ri tau lohe injo. Maeng injo Ia assiuppai tau maeng buta injo na appaui, ”Tappa'juako mange ri Ana' Rupatau?”

³⁶ Pappihalinna, ”Inai, Karaeng? Solanna nakke tappa' mange ri Ia.”

³⁷ Appaui Isa mange ri ia, ”Kau gele sangga mujanjanna jua; mingka Iamo appau mange ri kau, Iamo injo!”

³⁸ Pauna, ”Nakke tappa', Karaeng! Ia joppa'i nyomba ri Isa.”

³⁹ Jari appaui Isa, ”Nakke rie' antama' ri lino langadeli, solanna inai jua gele anjanjang, akkullei anjanjang, na solanna inai jua anjanjang, laa'jari butai.”

⁴⁰ Pau-pau injo lalangngere ri tau Farisi lohe rie' ri injo jari akkuta'nang ngase'mu mange ri Ia, ”Apa kambe pole inni buta todo'kang?”

⁴¹ Appihali Isa mange ri iyai, ”So'di pade' kaui buta, kau tide' kadorakaammu, mingka kanara mukuainna: Anjanjangkang, jari tulusu rie' kadorakaammu.”