YAHYA 7 - Kitta' Passitallikang Bau KAREBA BAJI'

A'lampai Isa mange ri Yerusalem langanre-nganre ri sapo ta'ata' taha kaju 7:1-13

¹ Rimaenna injo Isa a'lingka-lingkai a'lili' ri Galilea, saba' Ia gelei a'ra' a'lili' ri Yudea, saba' ri injo lohe ponggaha Yahudi tulusu a'ra'i lahuno Isa.

² Rihattu injo seppa'mu allo panganre-nganreanna tau Yahudi inni ri sapo ta'ata' taha kaju.

³ Jari appauimu uranna siana' Isa mange ri Ia, ”A'lampako battu ri tampa' inni na mangeko ri Yudea, solanna ana'-ana' gurumMu lajanjang todo'i sikonjo panggeokang laMugeokang injo.

⁴ Saba' gele rie' manna sitau a'bua' panggeokang ri tampa' tassa'bu-sa'bu, ampa a'ra'i ripakala'biri ri a'rakanna tau lohe. Ampa pade' Kau a'ra' a'bua' nuappakonjo, pappijanjangangi kalemMu mae ri tau lohe.”

⁵ Saba' manna urang siana'Na gelei tappa' mange ri Ia.

⁶ Jari appihali Isa mange ri iyai, ”Gelepai larapi' hattungKu, mingka ri kaui tulusu larie' hattu.

⁷ Lino inni gele akkulle liking mange ri kaui, mingka ia likingi mae ri Nakke, saba' Nakke assa'bi passala ri ia ma'nassana sikonjo jamaanna nudaa.

⁸ A'lampamoko mange ripassua'-suarang injo. Nakke gelea laa'lampa mange konjo, saba' gelepai larapi' hattungKu.”

⁹ Appakonjomu pauNa mange ri iyai, na Ia ammari todo'i ri Galilea.

¹⁰ Mingka rihattu a'lampainnamo urang siana'Na mange ripassua'-suarang injo, manna Ia a'lampa todo'i mange konjo, gele lapappiissekang kalenNa.

¹¹ Sikonjo ponggaha Yahudi labojai Isa ripassua'-suarang injo na lakua, ”Ri anteei mae Isa?”

¹² Ritangnga-tangngana tau lohe injo kalanggerangi bisi'-bisi' ripassala'na Isa. Rie' tau appau, ”Ia tau baji'.” Mingka rie' todo' tau appau, ”Gele, Ia appakalingui lohe tau.”

¹³ Gele rie' manna se're tau barani appau lambusu ripassala'na Isa saba' mallakinna mange ri ponggaha tau Yahudi injo.

Passa'bina Isa ripassala kalenNa 7:14-24

¹⁴ Rihattu attangnganamo passua'-suarang injo, Isa antama'i ri Sapo Allataala ampai ngajara ri injo.

¹⁵ Manna ponggaha Yahudi Injo lannasa ngase' na appaui, ”Anteekamua tau inni anralang konjo pangisse'na nagelejuai appilajara!”

¹⁶ Appihali Isa mange ri iyai, ”AjarangKu gele nubattu ripangisse' kale-kaleKu jua, mingka nubattu ri Tuassuro injo ri Nakke.

¹⁷ Inai jua a'ra' lageokangi a'ra'Na, lalaisse'i apa ajarangKu inni nubattu ri Allataala, iyareka Nakke appau nubattu ri kalengKu to'jua.

¹⁸ Inai jua appau-pau nubattu ri kalenna to'jua, ia a'bojai kala'birang tuju kalenna, mingka inai jua a'boja kala'birang mange ri Ia ri tuassuro injo ri ia, ia nabai na tide' nugele naba ri ia.

¹⁹ Gelejua Musa maengi assare hukkung Tora' mange ri kau? Mingka gele rie' manna se're tau ri kau lageokangi hukkung Tora' injo. Ngura Nakke muparri-parri a'ra' lamuhunoi?”

²⁰ Appihali tau lohe injo, ”Ladongkokiko setang! Inaimo apparri-parri lalahunoKo?”

²¹ Appihali Isa mange ri iyai, ”Se're jua panggeokang Kugeokang na kaliru ngase'ko.

²² Jari, Musa lapattantui solanna assunnakiko – sitoje'na sunna' injo ripakaramulana gele nubattu ri Musa, mingka assala'na nubattu ripuwa-puwata – na manna kaui pole risunna'ko ri allo Passambajangang!

²³ Ampa rie' se're tau risunna' ri allo Passambajangang, solanna andai riadeli assituru' hukkung nulapabattu injo Musa, ngura kukukiko mae ri Nakke, kanara Nakke appakagassing tau garring ri allo Passambajangang.

²⁴ Akolalo appassala assituru' rinukajanjangang injo jua, mingka adelilalo lalang rikaadelang.”

Passisala pahangang ripassala pa'assalanna Isa 7:25-36

²⁵ Maenna injo lohemo tau Yerusalem appau, ”Gelejua Ia inni tau a'raki injo lahunoi?

²⁶ Mingka janjangi, Ia laloasai a'bisara na iyai gele juai appau manna sipali' mange ri Ia. Barang ponggahata baji'mu laisse'na ma'nassana Iamo Almase?

²⁷ Mingka ripassala'na tau inni ditte baji' riisse'na battu ri antee mae pa'assalanNa, mingka pariekanna Almase gele rie' tau laisse'i battu ri antee mae pa'assalanNa.”

²⁸ Rihattu ngajara'na Isa ri Sapo Allataala, appau bakka'i, ”Tantu muissekingKu na muisse' todo'i battu ri antee mae pa'assalangKu; mingka Nakke rie' mae konni gele battu ria'ra' kalengKu, mingka Nakke risuro ri Allataala tunaba gele injo muisseki.

²⁹ Nakke Kuisse'i, saba' Nakke rie' mae konni battu ri Allataala na Allataalamo assuro ri Nakke.”

³⁰ A'naha-nahaimu lalajakkali Isa, mingka gele rie' manna se're tau lauppai lakaraha Isa, saba' gelepai larapi' hattunNa.

³¹ Mingka ritangngana tau lohe injo rie' lohe tutappa' mange ri Allatalla na lakuai, ”Ampa rie'mu Almase, barang laloheangang lapaa'jari nugele samara na nulapaa'jari injo Allataala inni?”

³² Tau Farisi allangngere injo ribisi'-bisi'na tau lohe rinua'jari injo ripassala'na Isa, na kanara injomo imang ponggaha injo surang tau Farisi injo assuroi risikonjo pajaga ri Sapo Allataala lajakkalai Isa.

³³ Jari lakua Isa, ”Siso'di' kalemamo hattungKu larie' assurang-surang kau na maeng injo Nakke laa'lampa mange ri Tuassuro injo ri Nakke.

³⁴ La'bojaiko ri Nakke, mingka gelea akkulle muuppai, saba' geleiko akkulle ambattu mange ri tampa' pammariangKu.”

³⁵ Injomo saba'na allagarimu ponggaha Yahudi injo, lakua, ”Laa'lampai antee mae, sa'genna ditte gele akkulle lariuppa? Barang nulakuangang injo Isa lamange ri tau rieki injo ammari ri tanana tau dere intu, ri tau Yunani injo, langajara tau Yunani?

³⁶ Barang nulakuangang injo ri pauNa: Laa'bojaiko ri Nakke, mingka gelea akkulle muuppai, na: Geleiko akkulle ambattu mange ri tampa' pammariangKu?”

Ere poong katallasang 7:37-44

³⁷ Ri allo kateppusanna, iamo intu rimata passua'-suarang injo, ammentengi Isa na appau bakka'i, ”Inai jua tirere, baji'i battu mae ri Nakke na nginungi!

³⁸ Inai jua tappa' mae ri Nakke, assimpole nulapau injo ri Kitta' Tangkasa: Battu lalang ri atina lanyo'lo'i eremata attallasa.”

³⁹ Nulakuangang injo Isa iamo intu Nyaha Allataala nulalatarima injo sikuanna tau tappa' mange ri Ia; saba' Nyaha Allataala injo gelepai rie', saba' Isa gelepai ripakala'biri.

⁴⁰ Rie' sikura tau ri tau lohe appilangngeri injo pau-pau inni, appau, ”Ia inni toje'i nabbi nularie' injo.”

⁴¹ Rie' tau maraeng appau, ”Ia inni Almase.” Mingka rie' todo' tau maraeng appau, ”Gele! Almase gele battu ri Galilea!

⁴² Gelejua Kitta' Tangkasa appau ma'nassana Almase battui rilo'lo'ranna Daud na battu ri desa Betlehem, tampa' pammarianna Daud riolo.”

⁴³ Jari ammumbamu passisala pahangang ri tau lohe injo ri kanarana Isa.

⁴⁴ Rie'mo sikura tau ri iyai injo a'ra'i lajakkala Isa, mingka manna se're tau gele rie' tubarani latetengi.

Isa risa'bii ri Nikodemus 7:45-52

⁴⁵ Maeng injo muliangimu sikonjo pajaga ri Sapo Allataala mange risikonjo imang ponggaha surang tau Farisi, na rikuta'nangi, ”Ngura gele muerangi Isa?”

⁴⁶ Pappihalinna pajaga injo, ”Gelepa minang rie' tau appau assimpole tau injo!”

⁴⁷ Jari appauimu tau Farisi injo mange ri iyai, ”Barang manna kau laajara sala todo'ko?

⁴⁸ Barang rie' se're risikonjo ponggaha injo tappa' mange ri Ia, iyareka rie' se're tau Farisi injo?

⁴⁹ Mingka tau lohe inni gele laisse' hukkung Tora', mate laalle ngase'i pua!”

⁵⁰ Nikodemus, sala se'renna battu ri iyai, nuriolo maemmu battu mange ri Isa, appau mange ri iyai,

⁵¹ ”Apa hukkung Tora'ta assare hukkungang mange rise're inni tau, rigelenapa rilangngere pauna na rigelenapa riisse' apa geo' sala maeng lageokang?”

⁵² Appihali ngasekimu, ”Barang kau tau Galilea todo'ko? Paressai Kitta' Tangkasa lamuisse'i ma'nassana gele rie' nabbi battu ri Galilea.” [

Bahine assangkili 7:53–8:11

⁵³ Maeng injo muliang ngase'mu mange ri saponnai,