YAHYA 5 - Kitta' Passitallikang Bau KAREBA BAJI'

Appakagassingi tau garring ri allo Passambajangang ri kollang Betesda 5:1-18

¹ Rimaenna injo rie' se're allo passua'-suaranna tau Yahudi inni, na Isa a'lampai mange ri Yerusalem.

² Ri Yerusalem riampi'na Babaang Jimbala rie' se're kollang, lalang bisara Ibrani riare'i Betesda; rie' lima dego-degona

³ na ri dego-dego lima injo lohe tau garring tinro-tinro: rie' tau buta, tau kempang na tau pesu'. [Iyai injo latajangi pata'ke'bo'na ere ri kollang injo.

⁴ Saba' a'hattu-hattui naung malaeka'na Karaeng Allataala ri kollang injo na lapake'bo'i erena; inai jua tau kaminang riolo naung ri kollang injo ampa maemmu ta'ke'bo' erena, a'jari molei garrinna, manna garring apa jua.]

⁵ Ri injo rie' se're tau tallumpulomu karua taunna garring.

⁶ Rihattu lajanjanna Isa tau injo tinro-tinro ri injo na saba' Ia latarrusui ma'nassana ia sallomu assinsara assimpole injo, jari appaui Isa mange ri ia, ”A'ra'ko gassing?”

⁷ Pappihalinna tau garring injo mange ri Ia, ”Karaeng, gele rie' tau lapanaunga ri kollang injo rihattu pakaramulanamo ta'ke'bo' erena, na ampa kodong laa'dangka-dangkama mange ri kollang injo, rie'mo tau maraeng naung lapilombaia.”

⁸ Lakuamo Isa mange ri ia, ”Ambaungko, angka'i tappere'mu na a'lingkako.”

⁹ Rihattu injo jua molemu garrinna tau injo ampai laangka' tappere'na na a'lingkai. Mingka allo injo hattu Passambajanganna tau Yahudi.

¹⁰ Injomo saba'na, sikonjo ponggahana tau Yahudi inni appaui mange ri tau bau injo mole garrinna, ”Allo inni hattu Passambajangang, jari gelei akkulle muangka' tappere'mu.”

¹¹ Mingka, ia appihali ri iyai, ”Tau lapakamole injo garringku, appau mae ri nakke: Angka'i tappere'mu na a'lingkamoko.”

¹² Akkuta'nang ngasekimu ri ia, ”Inaimo tau appau injo ri kau: Angka'i tappere'mu na a'lingkamoko?”

¹³ Mingka tau bau injo ripakagassing gele laisse' inai lapakamole garrinna, saba' Isa tide'mu ritangnga-tangngana tau lohe ri tampa' injo.

¹⁴ Maeng injo Isa assiuppai tau injo lalang ri Sapo Allataala ampai appau mange ri ia, ”U'rangi, kau molemu garrimmu; ammonomo'ko anggeokang kadorakaang muliang, solanna andai a'jari nula'bi sarroang ri kau.”

¹⁵ Ansulukangi tau injo, ampai lalagara mange risikonjo ponggaha tau Yahudi ma'nassana Isamo lapakagassingi.

¹⁶ Injomo saba'na, ponggaha tau Yahudi injo a'ra'i lasissa Isa, saba' Ia lageokangi passala injo ri allo Passambajangang.

¹⁷ Mingka Ia appaui mange ri iyai, ”AmmangKu anjamai sa'genna allo inni, jari Nakke anjama todo'.”

¹⁸ Injomo saba'na, ponggaha tau Yahudi injo pela' a'ra'mu pole lalahuno Isa, gele sangga rikanara lapa'tide'na jua allo Passambajangang injo, mingka pole kanara rilapauna ma'nassana Allataala injo AmmanNa na ri appakonjona lapassinrapangi kalenna Allataala.

Isa lasa'bii kalenNa 5:19-47

¹⁹ Jari appihali Isa mange ri iyai, ”Sitoje'na Nakke appau mange ri kaui, Ana' tide' pakkullena laanjama se're passala battu ri kalenNa to'jua, ampa Ia gele lajanjang ta'ra jamana AmmanNa; saba' apa nulajama Amma, injo todo' lajama Ana'.

²⁰ Saba' Amma ngamaseang Ana' na Ia lapappijo'jokangi mange ri Ana' sikonjo jamaanNa, na Ia lapappiijo'jokang todo'i pole mange ri Ana' sikonjo jama-jamaang nula'bi bakkakang battu rijamaa-jamaang injo, sa'genna takkajannakiko.

²¹ Saba' assimpole Amma appakaambaung sikuanna tau mate na lapakaattallassai muliang, appakonjo todo'i Ana' lappakaattallasa inai jua Ia lakaa'raki.

²² Amma gele ngadeli manna ri inai jua, mingka maeng lapassareang ngase'mu pangadelang injo mange ri Ana',

²³ solanna sikuanna tau ngali' ri Ana' assimpole ngali'na ri Amma. Inai jua gele ngali' ri Ana', ia gele todo'i ngali' ri Amma, Tuassuro injo ri Ia.

²⁴ Sitoje'na Nakke appau mange ri kaui: Inai jua lapilangngeri pauKu na tappa'i mange ri Ia Tuassuro injo ri Nakke, ia languppai tallasa mannannungang na gele languppa hukkungang, saba' ia a'lette'mu battu rikamateang antama' rikatallasang.

²⁵ Sitoje'na Nakke appau mange ri kaui: Larie' hattunna narie'mu ma'nassana sikuanna tau mate laallangngere pau Ana' Allataala, na iyai tuappilangngeri injo ri Ia, laattallasai.

²⁶ Saba' assimpole Amma rie' tallasa lalang ri kalenNa, appakonjo todo'i rilasareanNa Ana' rie' tallasa lalang ri kalenNa.

²⁷ Ia maeng assare kahasa mange ri Ia langadeli, saba' Iamo Ana' Rupatau.

²⁸ Akolalo lannasa ripassala injo, saba' larie' hattunna ma'nassana sikuanna tau rie' lalang ri kuburu laallangngere sa'ranNa,

²⁹ na iyai tumaeng injo anggeokang nubaji' laansulu'i na laattallasai muliang ritallasa mannannungang, mingka iyai tumaeng injo anggeokang nudaa attallasai larisare hukkungang.

³⁰ Gelea akkulle anggeokang manna se're ria'ra' kalengKu to'jua, Nakke langadeli assituru' surangang apa Kulangngere, na pangadelangKu adelei, saba' Nakke gelei Kuturuki a'ra' kalengKu, mingka a'ra'Na Tuassuro injo ri Nakke.

³¹ Ampa Nakke assa'bi ripassala kalengKu to'jua, injo gelei toje' passa'biKu;

³² rie' tumaraeng assa'bi ri Nakke na Kuisse'i ma'nassana passa'bi lasareang injo Allataala ripassala Nakke injo toje'i.

³³ Kau maengiko assuro tau mange ri Yahya na ia maeng assa'bi ripassala katojekang;

³⁴ mingka Nakke gelejuai parallu passa'bi battu ri rupatau, mingka Nakkemo appau ripassala inni, solanna kaui ripakasalama'.

³⁵ Yahyamo intu sulo a'bola'mu na assaui na kaui sinampe' juai a'ra' mujanjangi saunna.

³⁶ Mingka ri Nakke rie' se're passa'bi nula'bi paralluang battu ripassa'bina Yahya, iamo intu sikonjo jama-jamaang lapassareangi Amma mae ri Nakke, solanna Kugeokang. Jamaang injomo Kugeokang konni-konnina, na iamo injo assare passa'bi ri Nakke ma'nassana Amma assuro ri Nakke.

³⁷ Amma Tuassuro injo ri Nakke, Iamo maeng assa'bi ri Nakke. Kaui gele minang mulangngere sa'ranNa, manna tappaNa gele minang mujanjangi,

³⁸ na pauNa gele tuli ammari lalang ri kaui, saba' geleiko tappa' mange ri Ia ri Tulasuro injo.

³⁹ Kau musalidiki sikonjo Kitta' Tangkasa, saba' pa'ngare'mu ma'nassana lalang ri injo languppaiko tallasa mannannungang, mingka manna appakonjo iangase'na Kitta' Tangkasa injo assare passa'bi mae ri Nakke,

⁴⁰ geleko a'ra' battu mae ri Nakke languppa tallasa injo.

⁴¹ Nakke gelejua parallu rikangalikang battu ri rupatau.

⁴² Mingka ripassala'mu, Kuisse'i ma'nassana lalang ri atimu gele rie' pangamaseang mange ri Allataala.

⁴³ Nakke rie' mae lalang arenna AmmangKu na kaui gele narima ri Nakke; ampa tau maraeng rie' saba' ri arenna to'jua, tantu baji' mutarimainna.

⁴⁴ Anteekokamua tappa', kau tusanging a'boja intu kangalikang ri tau maraeng na geleiko a'boja kangalikang nubattu ri Allataala tide' injo ruana?

⁴⁵ Ako sala pa'ngare' ma'nassana Nakkemo lamaressa ri kau ri a'rakanna Amma; tulamaressa injo mange ri kau iamo intu Musa, ya Musa tumange injoko ri ia appabora pattajalliang.

⁴⁶ Saba' ampa tappa'ko mange ri Musa, tantu latappa'mu mae ri Nakke, saba' ia maengi laukiri passala ri Nakke.

⁴⁷ Mingka ampa geleko tappa' rinulaukiri injo, anteekokamua latappa' rinuKupau injo?”