YAHYA 4 - Kitta' Passitallikang Bau KAREBA BAJI'

Pa'bisaraang surang bahine Samaria 4:1-42

¹ Rihattu laisse'na Isa ma'nassana lohemo tau Farisi maeng lalangngere ma'nassana Ia nguppai surang la'bi loheang lario ana' gurung battu ri Yahya

² – manna injo Isa gele anrio tau, passangadinna ana'-ana' gurunNa jua, –

³ Ia labokoimu tana Yudea na muliangi mange ri Galilea.

⁴ Mingka Ia parallui laa'molong ri tana Samaria.

⁵ Jari ambattumu rise're kota ri Samaria, nuriare' Sikhar riampi'na tana lasareang injo Yakub riolo mange ri Yusuf, ana'na.

⁶ Ri injo rie' buhung riare' buhung Yakub, Isa sanna' mangnganna kanara derena a'lingka, injomo saba'na Ia attolongi ri biring buhung injo. Hattu injo barang tette' sampuloruamu ri allona.

⁷ Gele sallo rie'mo se're tau bahine Samaria a'ra' lanye'ro' ere ri buhung injo. Appaui Isa mange ri ia, ”Sarea eremu.”

⁸ Ana'-ana' gurunNa a'lampai mange ri kota laammalli kanre.

⁹ Appaui tau bahine Samaria injo mange ri Ia, ”Ditte tau Yahudi, ngura Ditte ngera ere ri nakke, se're tau Samaria?” (Saba' tau Yahudi injo gele a'ra' assurang-surang tau Samaria.)

¹⁰ Appihali Isa mange ri ia, ”So'di injo muisse'i passala nubattu ri Allataala na inai Tau appau injo mange ri kau, Sarea ere inung! Attantu langeramu mange ri Ia na Ia laassare ere attallasa mange ri kau.”

¹¹ Lakuamo tau bahine Samaria injo mange ri Ia, ”Karaeng, tide' se'ro'Ta na anralangi buhung inni; battu ri anteeKi mae languppa ere attallasa injo?

¹² Makala bakkakang Kau battu ri Yakub puwa-puwaba, tau assare injo buhung mae ri kambe na maeng todo'i nginung ere battu ri buhung inni, ia surang ana'-ana'na na binantang kalahakianna?”

¹³ Appihali Isa mange ri ia, ”Inai jua nginung ere inni, injo ia latirere juapai,

¹⁴ mingka inai jua nginung ri ere nulaKusareang injo mange ri ia, injo gelemu latirere situlusu'na. Sibale'na ere nulaKusareang injo mange ri ia, laa'jari ere attimbula' lalang ri kalenna, nutarru'-tarrusu a'lo'loro sa'genna ambattu ritallasa mannannungang.”

¹⁵ Lakuamo tau bahine Samaria injo mange ri Ia, ”Karaeng, sarea ere injo, solanna gelema latirere na gele todo'ma parallu mae konni langalle ere.”

¹⁶ Appaui Isa mange ri ia, ”A'lampamoko, keo'i bura'nemmu na maeko konni.”

¹⁷ Appihali bahine injo, ”Nakke tide' bura'nengku.” Lakuamo Isa mange ri ia, ”Naba paumu ma'nassana tide' bura'nemmu,

¹⁸ saba' kau rie'mo lima maeng mubura'neang, na nurie' injo ri kau konni-konnina, gele bura'nemmu. Lalang ri passala inni nabai paumu.”

¹⁹ Lakuamo bahine injo mange ri Ia, ”Karaeng, konni-konnina kuisse'mu ma'nassana Ditte se're nabbi.

²⁰ Puwa-puwaba nyombai rate ri bonto inni, mingka Ditte appau ma'nassana Yerusalemmo tampa'na tau inni lanyomba.”

²¹ Lakuamo Isa mange ri ia, ”Tappa'moko mae ri Nakke, idong, larie' hattunna ma'nassana kau lanyomba Amma, gele ri bonto inni na gele todo' ri Yerusalem.

²² Kau nyomba mange rinugele muisse', kambe nyombakang mange rinutaisse' injo, saba' kasalamakang nubattu ri tau Yahudi.

²³ Mingka larie' hattunna na konni-konnina rie'mu ma'nasana sikuanna tau naba injo ta'ranna nyomba, injo lanyombai Amma lalang ri nyaha si'nong surang katojekang; saba' Amma labojai sikuanna tau nyomba appakonjo injo ri Ia.

²⁴ Allataala intu Nyaha Tangkasa na inai jua nyomba ri Ia, parallui lasomba Allataala lalang ri Nyaha Tangkasa surang katojekang.”

²⁵ Appihali bahine injo mange ri Ia, ”Kuisse'i ma'nassana larie'i Pappakasalama' turiare' injo todo' Almase; ampa Iamo rie', Ia lapappiissekangi sikuanna mae ri kambe.”

²⁶ Lakuamo Isa mange ri ia, ”Nakkemo inni, tau appau-pau injo mange ri kau.”

²⁷ Rihattu injo riekimu ana'-ana' gurunNa na lannasi ngase'mu ma'nassana Ia allagarai surang se're tau bahine Samaria. Mingka tide' manna se're tau akkuta'nang, ”Apa mukaa'raki? Iyareka, Apa Rilagara surang bahine intu?”

²⁸ Bahine injo labokoi bengkina ri injo ampai a'lampa mange ri kota na lapau-paui mange risikuanna tau rie' ri injo,

²⁹ ”Maeko, janjangimu tau appau injo mae ri nakke iangase'na numaeng injo kugeokang. Barang Iamo injo Almase?”

³⁰ A'lampa ngasekimu ansulukang kota ampai mange ri Isa.

³¹ Rihattu injo ana'-ana' gurunNa lakeo'i Isa, lakua, ”Guru, nganremuKi.”

³² Mingka, appaui Isa ri iyai, ”Ri Nakke rie' kanre nugele muisseki.”

³³ Injomo saba'na, allagarimu ana' gurunNa, ”Rie' barang tau lapangerangangi kanre mange ri Ia lalakanre?”

³⁴ Appaui Isa ri iyai, ”KanreKu iamo intu anggeokang a'ra'na Allataala Tuassuro injo ri Nakke na Kupa'maengi jamaanNa.

³⁵ Gelejua mukua: Patambulampa ampai hattu panduru hassele? Mingka Nakke appau ri kaui: Janjangimu risiappumui na tangarai koko bae gandong didi injomo na baji'mu ribingala.

³⁶ Konni-konnina pabingala injo maemmu latarima sahala'na na ia lapasse'rei hassele'na mange ritallasa tide' tappu'na, jari palamung na pabingala assurang-surangi te'ne.

³⁷ Saba' lalang ripassala inni nabai pauna tupanrita injo: Se're tau a'lamung na tau maraeng a'bingala.

³⁸ Nakke assuro ri kaui laa'bingala apa nugele mukaresoi; sikuanna tau maraeng akkareso na kaui battu langalle hassele karesonai.”

³⁹ Lohemo tau Samaria ri kota injo a'jari tappa' ri Isa kanara pau-pau passa'bina tau bahine injo, ”Ia lapaui mae ri nakke iangase'na numaeng injo kugeokang.”

⁴⁰ Rihattu ambattunamo tau Samaria lohe injo mange ri Isa, laerai mange ri Ia, solanna Ia ammari ri iyai; na Ia ammari toje'i ri injo ruangallo sallona,

⁴¹ Kanara pauNa, la'bi lohemo pole tau a'jari tappa',

⁴² na appau ngasekimu ri tau bahine injo, ”Tappa'makang, mingka gelemo kanara rinumupau-pau injo, saba' kambemo maeng talangngere pauNa na taisse'mu ma'nassana Ia toje'mo Pappakasalama' ri lino inni.”

Muliangi mange ri Galilea 4:43-45

⁴³ Sungka'i ruangallomo, a'lampai Isa battu ri injo na mangei ri Galilea,

⁴⁴ saba' Isa maemmu lapappissa'biang ma'nassana se're inni nabbi gele rikangalikang ri kampong assala'na.

⁴⁵ Sungka'namo Ia ambattu ri Galilea, lohemo tau Galilea injo laruppa'i Isa, saba' iyai maemmu lajanjang sikonjo nulageokang Isa rihattunna passua'-suarang Pa'lappasang ri Yerusalem, saba' iyai minahang todo'i ripassua'-suarang Pa'lappasang injo.

Isa appakagassing ana' pagahe ri sapo karaeng 4:46-54

⁴⁶ Maenna injo Isa muliangi pole mange ri Kana ri Galilea, ri injomo Ia maeng appaa'jari anggoro battu ri ere. Ri Kapernaum rie' se're pagahe ri sapo karaeng, garring sarro ana' bura'nena.

⁴⁷ Sungka'na ia lalangngere ma'nassana Isa rie'i battu ri Yudea lamange ri Galilea, ia a'lampai mange lapiuppai Isa na ngera tulungi, solanna Ia mange ri saponna na lapakagassingi ana'na, saba' ammadammu ana'na.

⁴⁸ Lakuamo Isa mange ri ia, ”Ampa geleko anjanjang tanra-tanra na kajariang mara'-maraeng, geleko tappa'.”

⁴⁹ Appaui pagahe ri sapo karaeng injo mange ri Ia, ”Karaeng, mangemoko lassiri rigelenapa mate ana'ku.”

⁵⁰ Lakua Isa mange ri ia, ”Muliammoko, attallasa juai ana'mu!” Tau injo tappa'i ri pappauna Isa mange ri ia, jari muliammu.

⁵¹ Rihattu attangnga lalanna juapa riekimu atanna pagahe ri sapo karaeng lapiuppai na ngerangi kareba ma'nassana attallasai muliang ana'na.

⁵² Injomo saba'na, ia akkuta'nangi mange ri iyai tette' sikura ana' injo pakaramulai mole garrinna. Pappihalinna, ”Suhangngi ritette' se'rena allo tide'mu bambanna.”

⁵³ Jari lau'rangimu ammanna ana' injo ma'nassana rihattu injomo Isa appau ri ia, ”Attallasa juai ana'mu.” Jari ia na sikonjo bija-bijanna tappa'i mange ri Isa.

⁵⁴ Iamo injo tanra-tanra makapinruang lapaa'jari Isa rihattu mulianna battu ri Yudea lamange ri Galilea.