YAHYA 3 - Kitta' Passitallikang Bau KAREBA BAJI'

Pa'bisaraanna Isa surangi Nikodemus 3:1-21

¹ Rie' se're tau Farisi riareng Nikodemus, se'rei ponggaha agama Yahudi.

² Ia mange laurang assijanjang Isa rihattu bangngina, na lakua, ”Guru, kambe taisse'i ma'nassana Kau rie' battu mae assimpole guru risuro ri Allataala; saba' gele rie' tau akkulle appaa'jari tanra-tanra assimpole numupaa'jari injo, ampa gelei larurung Allataala.”

³ Appihali Isa, ”Sitoje'na Nakke appau mange ri kau, ampa se're inni tau gele rilaherang muliang, ia gelei akkulle lajanjang Pakkaraengang Allataala.”

⁴ Lakua Nikodemus mange ri Ia, ”Anteekamua se're inni tau lama'ring rilaherang muliang, ampa toamu? Makala akkulle juapai antama' poleang ri pomponna idonna na rilaherangi muliang?”

⁵ Pappihalinna Isa, ”Sitoje'na Nakke appau mange ri kau, ampa se're inni tau gele rilaherang battu ri ere surang ri Nyaha Allataala, ia gele akkulle antama' lalang ri Pakkaraengang Allataala.

⁶ Apa nurilaherang ri rupatau, injo assipa' rupatau todo'i na apa nurilaherang ri Nyaha Tangkasa injo assipa' nyahai intu.

⁷ Andamoko lannasa, saba' Nakke appau mange ri kau: Kau parallu rilaherang muliang.

⁸ Anging intu ngiri'i ri antee-tee mae lakaa'raki, na kau mulangngere sa'ranna, mingka gele muisse' nubattu ri antee mae pariekanna iyareka antee mae lampana. Appakonjomu injo passala'na sikuanna tau rilaherang inni muliang battu ri Nyaha Tangkasa.”

⁹ Lakuamo Nikodemus mange ri Ia, ”Anteekamua lama'ring a'jari passala injo?”

¹⁰ Appihali Isa, ”Kau intu guru ri Israele na kau gele mupahang passala inni?

¹¹ Sitoje'na Nakke appau mange ri kau, kambe appau-paukang ripassala nutaisse' injo na assa'bikang ripassala numaeng injo tajanjang, mingka kau gele mutarima passa'biba.

¹² Geleko tappa', rihattungKu a'bisara mange ri kau ripassala nurie' injo ri lino inni, anteekokamua latappa', ampa Nakke a'bisara ri kau ripassala nurie' injo ri Suruga?

¹³ Gele rie' manna se're tau maeng nai' ri Suruga maraenganna Ia Tumaeng naung injo rie' mae battu ri Suruga, iamo intu Ana' Rupatau.

¹⁴ Na assimpole Musa appakalangkasa saa ri parang luara, appakonjo todo'i Ana' Rupatau parallu ripakalangkasa,

¹⁵ solanna sikuanna tau tappa' ri Ia nguppai tallasa mannannungang.

¹⁶ Saba' pammate lakamaseanNa Allataala assinna lino inni, sa'genna Ia lapassareammu Ana' sitau-tauNa, solanna sikuanna tau tappa' mange ri Ia gele lamate tulusu, mingka nguppai tallasa mannannungang.

¹⁷ Saba' Allataala lapassareangi Ana'Na antama' mae ri lino inni gele laassare hukkungang ri assinna lino inni, mingka solanna ripakasalama'i patteteang ri Ia.

¹⁸ Inai jua tappa' mange ri Ia, ia gele larihukkung; inai jua gele tappa', injo ia rie'mu lalang hukkungang, saba' ia gele tappa' mange ri Ana' sitau-tauna Allataala.

¹⁹ Iamo inni hukkung injo: Rie'mu Sinara injo antama' mae ri lino inni, mingka rupatau inni la'bi langaiang kalammang injo na sinara inni, saba' sikonjo panggeokanna sanging nudaa.

²⁰ Saba' inai jua anggeokang nudaa, likingi ri Sinara na gele a'ra' mange ri Sinara, solanna sikonjo panggeokang daana gele kajanjangang;

²¹ mingka inai jua anggeokang nunaba, ia battui mange ri Sinara, solanna a'jari kaissekang ma'nassana sikonjo panggeokanna lageokangi lalang ri Allataala.”

Passa'bina Yahya ri Isa 3:22-36

²² Rimaenna injo a'lampai Isa surang ana'-ana' gurunNa mange ri tana Yudea na ammari ngase'i konjomange na anrio tau.

²³ Mingka, Yahya anrio todo'i tau ri Ainon ri ampi'na kota Salem, saba' ri injo mange lohe ere. Na lohe todo' tau mangei lasuro rio kalenna,

²⁴ saba' rihattu injo Yahya gelepai ripantama' ri pattarungkuang.

²⁵ Jari rie'mo passisala pahangang ri ana'-ana' gurunna Yahya surang se're tau Yahudi passala ripanangkasi.

²⁶ Mangeimu ri Yahya na appaui mange ri ia, ”Guru, tau assurang injo kau ha'leang Balang Yordan na ripassala'Na kau maeng assare passa'bi, Ia anrio todo'i tau na sikuanna tau mange ngase'i ri Ia.”

²⁷ Appihali Yahya, ”Gele rie' manna se're tau akkulle ngalle manna siso'di' mange ri kalenna, ampa gele risareang battu ri Suruga.

²⁸ Kau akkulle todo'ko assare passa'bi ma'nassana nakke maeng appau: Gele nakke Almase, mingka nakke risuro riolonganNa.

²⁹ Tungampunnai bonting bahine, iamo intu bonting bura'ne; mingka bahaanna bonting bura'ne injo ammentengi riampi'na na lapilangngeri, sukku' te'nena appilangngeri sa'ra bonting bura'ne injo. Iamo injo kukate'nei, na konni-konnina sangka'i kate'neangku.

³⁰ Ia lapela' bakka', mingka nakke lapela' ki'di'.

³¹ Inai jua battu rate iamo intu kaminang rate risikuanna; inai assala'na battu ri lino, injo tulino intu na a'bisara tulinoi. Inai jua battu ri Suruga iamo intu kaminang rate risikuanna.

³² Ia assa'bi ripassala apa nulajanjang na nulalangngere injo, mingka gele rie' manna sitau lapitoli passa'biNa injo.

³³ Inai jua lapitoli passa'biNa, ia laakui ma'nassana nabai Allataala.

³⁴ Saba' inai risuro ri Allataala, Iamo appabattu pau Allataala, saba' Allataala lapassareangi Nyaha Tangkasa'Na gele rie' batasa'na.

³⁵ Amma ngamaseang Ana' na maeng lapassareang ngase'mu mange ri Ana'.

³⁶ Inai jua tappa' mange ri Ana', languppai tallasa mannannungang, mingka inai jua gele tappa' mange ri Ana', ia gele laanjanjang tallasa, passangadinna hukkunganna Allataala tulusu larie' ri ia.”