YAHYA 21 - Kitta' Passitallikang Bau KAREBA BAJI'

Isa lapappijanjangang kalenNa mange ri ana'-ana' gurunNa ri biring bonena tamparang La'ba Tiberias 21:1-14

¹ Maeng injo Isa lapappijanjangammu isse' kalenNa mange risikonjo ana' gurunNa ri biring bonena tamparang La'ba Tiberias na Ia lapappijanjangang kalenNa assimpole inni:

² Ri biring bone injo asse'reimu Simon Petrus, Tomas turiare' injo Didimus, Natanael battu ri Kana ri Galilea, ana'-ana'na Zebedeus na rie' pole rua ana' gurunNa maraeng.

³ Appaui Simon Petrus mange ri iyai, ”Nakke a'ra' lamange a'boja juku'.” Lakuaimo mange ri Petrus, ”A'lampa todo'kang assurangki.” A'lampa ngase'mu ampai nai' ri lopi, mingka ribangngi injo gele nguppai juku' manna sikaju.

⁴ Rihattu pakaramulanamo ngesala, rie'i Isa ammentengi ri biring bone; mingka ana'-ana' gurung injo gele laisseki ma'nassana Isa injo.

⁵ Appaui Isa mange ri iyai, ”Oe ana'-ana', rie' jua juku'mu?” Pappihalinnai, ”Tide'.”

⁶ Jari appaui Isa mange ri iyai, ”Tantangi lanra'mu risa'ri kananna lopimmu, languppako juku'.” Jari latantangi toje'mu lanra'na na gelemu lakulle labesoki pammate lohena juku' laalle.

⁷ Jari ana' gurung rikamaseang injo ri Isa appau mange ri Petrus, ”Karaeng injo.” Rihattu lalangngere'na Petrus ma'nassana Karaeng injo, jari ia larunrummu bajunna saba' gele a'baju, ampai a'lumpa naung ri tamparang la'ba injo.

⁸ Maeng injo ana'-ana' gurung maraeng injo mange todo'i ri lopi saba' iyai gelejuai dere battu ribiring bone, larie' juai barang sibilangang metere derena, na larenrengimamo lanra' rassi injo juku'.

⁹ Sungka'i ambattuimo anrai' ribonto, anjanjangimu api a'rukku' na ribahonna rie' juku' surang roti.

¹⁰ Appaui Isa mange ri iyai, ”Ngerangiko mae juku', nuampa intu muuppai.”

¹¹ Simon Petrus nai'i ri lopi ampai larenreng lanra'na anrai' ribonto, lohe juku' bakka': Sibilangang limampulo tallungkaju lohena, mannamamo appakonjo lohena, gelejuai lahangka lanra'na.

¹² Appaui Isa mange ri iyai, ”Maemoko na nganre ngesaliko.” Gele rie' ana'-ana' gurung injo barani akkuta'nang mange ri Ia, ”Kau inai?” Saba' laissekimu ma'nassana Iamo Karaeng.

¹³ Isa mange a'bora tangnga na ngalle roti ampai lapassareang mange ri iyai, appakonjo todo'i juku' injo.

¹⁴ Iamo injo rimakapintallunna Isa lapappijanjangang kalenNa mange ri ana'-ana' gurunNa rihattu maennamo attallasa muliang battu ritangnga-tangngana tau mate.

Kalahaki sikuanna jimbala'Ku 21:15-19

¹⁵ Rimaennamo nganre ngesali appaui Isa mange ri Simon Petrus, ”Simon, ana'na Yahya, apa kau ngamaseang mae ri Nakke la'bi battu ri iyai inni?” Pappihalinna Petrus mange ri Ia, ”Toje'i Karaeng, Ditte Riisse'i ma'nassana nakke ngamaseang ri Ditte.” Appaui pole Isa mange ri ia, ”Katuhoi jimbala'Ku.”

¹⁶ Appau makapinruannamo Isa mange ri Petrus, ”Simon, ana'na Yahya: Apa ngamaseang juako mae ri Nakke?” Pappihalinna Petrus mange ri Ia, ”Toje'i Karaeng, Ditte Riisse'i ma'nassana nakke ngamaseang ri Ditte.” Appaui Isa mange ri ia, ”Katuhoi jimbala'Ku.”

¹⁷ Makapintallunnamo Isa appau mange ri ia, ”Simon, ana'na Yahya, apa ngamaseang juako mae ri Nakke?” Pa'risimu nyahana Petrus saba' pintallummu Isa appau mange ri ia: ”Apa ngamaseang juako mae ri Nakke?” Na ia appaui mange ri Ia, ”Karaeng Ditte Riisse'i sikuanna, Ditte Riisse'i ma'nassana nakke ngamaseang ri Ditte.” Appaui Isa ri ia, ”Katuhoi jimbala'Ku.

¹⁸ Sitoje'na Nakke appau mange ri kaui: Rihattummu juapa lolo kau to'jua muarre' aja'mu na a'lingkako ri antee-tee jua mae mukaa'raki, mingka ampa toamoko, injo lamupajonjopai limammu na tau maraeng laarre'ko ampako laerang ri tampa' nugele injo mungai.”

¹⁹ Passala inni lapaui Isa lalapappiissekang laanteekamua ta'ranna lamate Petrus na laappakala'biri Allataala. Rimaenna appau appakonjo, Ia appaui mange ri Petrus, ”Minahangko ri Nakke!”

Suro-suro lakamaseang injo Isa 21:20-23

²⁰ Rihattu a'gilinna Petrus, ia lajanjangi ma'nassana suro-suro rikamaseang injo ri Isa attangngai minahang ri iyai, iamo intu ana' gurung rihattunna assurangi nganre attolong seppa'i ri Isa na tuappau injo, ”Karaeng, inai injo lalapassareangKi?”

²¹ Rihattunna lajanjangi Petrus ana' gurung injo, ia appaui mange ri Isa, ”Karaeng, anteekamua ri ia inni?”

²² Appihali Isa, ”Ampa Kukaa'raki, solanna ia tulusu attallasai sa'gengKu rie' pole, injo gele passilolongammu. Mingka kau: Minahangko ri Nakke.”

²³ Jari alla'bammu karebana risikonjo urang siana' injo ma'nassana suro injo gele lamate. Mingka Isa gele lapau mange ri Petrus ma'nassana suro injo gele lamate, mingka, ”Ampa Kukaa'raki solanna tulusu attallasai sa'gengKu rie' pole, injo gele passilolongammu.”

Panongko' pau 21:24-25

²⁴ Iamo suro assa'bi ripassala iangase'na inni na tungukiri injo na ditte ri isse'i ma'nassana nabai injo passa'bina.

²⁵ Lohe juapa passala maraeng numaeng lageokang Isa, mingka ampa iangase'na injo parallu riukiri tasse're-se're, kupikkiri barang manna sibatu lino inni gelei larua sikuanna kitta' nuparallu injo riukiri.