YAHYA 20 - Kitta' Passitallikang Bau KAREBA BAJI'

Isa attallasa muliang 20:1-10

¹ Ri allo makase'rena ri sijumaa injo, rahungkalejuapa. A'lampai Maria Magdalena mange ri kuburu injo na lajanjangi ma'nassana batu panongko'na kuburu injo rie'mo lasungkei.

² Ia allari-lari muliang na lapiuppai Simon Petrus na suro maraeng tulakamaseang injo Isa, na lakua mange ri iyai, ”Rie'mo tau laallei Karaeng battu ri kuburu'Na na kambe gele taisse' ri antee mae lapaonrangi.”

³ Jari a'lampai Petrus surang suro maraeng injo mange ri kuburu.

⁴ Ruaiya assurangi allari, mingka suro maraeng injo lassirang allari battu ri Petrus sa'genna ia riolo ambattu mange ri kuburu.

⁵ Ia a'dowa'i antamakang, na anjanjangi kaeng balasung tattaro ri tana; mingka gelei antama'.

⁶ Maeng injo ambattu tommo Simon Petrus na tarrusui antama' ri kuburu injo. Lajanjang todo'i kaeng balasung injo tattaro baji' ri tana,

⁷ na kaeng pallangga ulu injo gele tattaro riampi'na kaeng balasung injo, mingka ta'lappa' baji'i ri tampa' maraeng.

⁸ Maenna injo, antama' tommoi ana' gurung maraeng injo tula'bi riolo injo ambattu mange ri kuburu na ia lajanjangi na tappa'i.

⁹ Saba' sikonjomo sallona nagelepai lapahangi assinna Kitta' Tangkasa inni nulakua injo ma'nassana Ia laattallasai muliang battu rikamateang.

¹⁰ Maenna injo muliangimu suro rua injo mange ri sapo.

Lapappijanjangangi kalenNa Isa mange ri Maria Magdalena 20:11-18

¹¹ Mingka Maria ammentengi pantarang ri ampi'na kuburu injo na apparaui. Riapparauna ia a'dowa'i antama' ri kuburu injo,

¹² na kajanjangammu ri ia rua malaeka' Allataala makeang pute, se're injo attolongi rita'ra ulunNa na se'reang injo attolongi risa'ri ampi' ta'ra bangkeng ri tampa' batangkalenna Isa ripaonrang.

¹³ Appaui malaeka' injo mange ri Maria, ”Idong ngura apparauko?” Appihali Maria mange ri iyai, ”Rie'mo tau laalle Karaengku na gelei kuisse' ri antee mae lapaonrangi.”

¹⁴ Rimaenna appau appakonjo ia assaile mange riboko na lajanjangi Isa ammenteng ri injo, mingka ia gele laisse' ma'nassana Isamo injo.

¹⁵ Appaui Isa mange ri ia, ”Idong, ngura apparauko? Inai muboja?” Pa'ngare'na Maria tau injo paahung koko jua, jari lakuamo mange ri Ia, ”Karaeng, ampa ditte rialle batangkalenNa, paui mae ri nakke, ri antee mae Ia ripaonrang, solanna akkulle mange kualle.”

¹⁶ Appaui Isa mange ri Maria, ”Maria!” A'gilingi Maria na appaui mange ri Ia lalang bisara Ibrani, ”Rabuni!”, battuanganna Guru.

¹⁷ Lakua Isa mange ri ia, ”Ako a'bitantang tarrusu ri Nakke, saba' Nakke gelepa a'lampa mange ri Amma, mingka a'lampamoko mange ri sikonjo urangKu siana' na pau-paui mange ri iyai ma'nassana konni-konnina Nakke laa'lampa mange ri AmmangKu na Ammammu, mange ri AllataalaKu surang Allataalamu.”

¹⁸ A'lampai Maria Magdalena na lapau-paui mange risikonjo ana' gurung, ”Nakke maemmu kujanjang Karaeng!” Na injo pole ma'nassana Ia lapaui passala injo mange ri ia.

Lapappijanjangang kalenna Isa mange ri ana'-ana' gurunNa 20:19-23

¹⁹ Sungka'i bangngi ri allo makase'rena ri sijumaa injo asse'reimu ana'-ana' gurunNa ri se're tampa' na sikonjo babaanna lajoli jarre'i saba' mallakinna mange risikonjo tukahasana Yahudi. Rihattu injo rie'mu Isa na ammentengi a'bora tangnga na lakua, ”Dame salehangang ri kaui!”

²⁰ Ri maenna appau appakonjo, Ia lapappijanjangi limanNa surang la'beNa mange ri iyai. Rannu ngase'i ana' gurunNa rihattu lajanjanginna Karaeng Isa.

²¹ Jari lakuamo pole Isa, ”Dame salehangang ri kaui! Assimpole Amma assuro ri Nakke, assimpole todo'i injo konni-konnina Nakke assuro mange ri kaui.”

²² Rimaenna appau appakonjo, Ia latui' ngase'i na lakua, ”Tarimai Nyaha Tangkasa.

²³ Ampa kau allappasi kadorakaanna tau, lappasai intu kadorakaanna mingka ampa geleiko allappasi kadorakaanna tau, gele intu lappasa kadorakaanna.”

Lapappijanjangang kalenna Isa mange ri Tomas 20:24-29

²⁴ Mingka Tomas, se'rei suro-suro battu ri sampulo injo rua, turiareng injo Didimus, tide'i rihattunna lapappijanjangang kalenna Isa ri injo.

²⁵ Jari, lakuaimo suro-suro maraeng injo mange ri ia, ”Kambe maemmu tajanjang Karaeng!” Mingka appaui Tomas mange ri iyai, ”Rigelenapa kujanjang ta'ra paku ri limanNa na rigelenapa kuparo'jo' karamengku rita'ra paku injo surang rigelenapa limangku a'kojo' ri la'beNa, injo tide' sikali tappa'ku manna siso'di'.”

²⁶ Karua allo maenna injo ana'-ana' gurunna Isa asse'reimu isse' ri sapo injo na Tomas rie' tommoi assurangi. Rihattu ta'joli ngase'na babaang injo, rie'i Isa na ammentengi a'bora tangnga ri iyai na appaui, ”Dame salehangang ri kaui!”

²⁷ Maeng injo Ia appaui mange ri Tomas, ”Taro karamemmu ri inni, na janjangi limangKu, patanjo limammu na pantama'i ri la'beKu na andamoko pole gele tappa', mingka tappa'moko.”

²⁸ Appihali Tomas mange ri Ia, ”Io' Karaengku na Allataalaku!”

²⁹ Appaui Isa mange ri ia, ”Saba' kau maeng anjanjang ri Nakke, jari tappa'ko. Sukku' rannui tau gele injo minang anjanjang ri Nakke, mingka tappa'i.”

Tujunna Injili inni riukiri 20:30-31

³⁰ Toje'i sanna' lohe juapa tanra nugele samara nulapaa'jari Isa ri a'rakang matanna ana'-ana' gurunNa, nugele ta'ukiri lalang ri kitta' inni,

³¹ mingka sikonjo passala inni maemmu riukiri, solanna kaui tappa' ma'nassana Isamo intu Almase, Ana' Allataala, na solanna kanara tappa', kau nguppa tallasa lalang ri arenNa.