YAHYA 19 - Kitta' Passitallikang Bau KAREBA BAJI'

¹ Jari Pilatus laallei Isa na lasuro rabungi.

² Tantara injo nganangi se're songko' kakaraengang battu ri katinting na lapisongkokiangi ri ulunNa. Iyai appipakei mange ri Ia baju bakka' kamummu',

³ na a'lingka ngase'i mange ri a'rakang ampai appau, ”Sombangku, oe karaeng tau Yahudi!” Maeng injo latampilingi rupanNa.

⁴ Ansulukangi pole Pilatus na appaui mange ri iyai, ”Janjangi, kuerangi Isa ansulukang mange ri kaui, solanna muisseki ma'nassana tide' kuuppa ri Ia kasalaang manna se're.”

⁵ Jari ansulukangi Isa, make songko' kakaraengang battu ri katinting na make todo'i pakeang baju bakka' kamummu'. Jari appaui Pilatus mange ri iyai, ”Tangaramu tau intu!”

⁶ Sungka'i sikonjo imang ponggaha na pajaga injo lajanjangi Isa, a'gora bakkakimu, lakua, ”Salli'i Isa, salli'i Isa!” Appaui Pilatus mange ri iyai, ”Alle na salli'i Isa; saba' tide' manna se're kasalaang kuuppa ri Ia.”

⁷ Pappihalinna tau Yahudi injo mange ri ia, ”Kambe rie' hukkumba na assituru' hukkumba injo Ia parallu rihukkung mate, saba' Ia laare' kalenNa Ana' Allataala!”

⁸ Rihattunna lalangngere pau injo pela' malla'mu Pilatus,

⁹ jari ia muliangi antamakang lalang ri sapo pammariang Gubernur na lakua mange ri Isa, ”Battu ri antee mae assala'Mu?” Mingka Isa gele appihali mange ri ia.

¹⁰ Injomo saba'na, appaui Pilatus mange ri Ia, ”Gele juaKo a'ra' a'bisara mae ri nakke? Gelejua Muisse'i ma'nassana nakke kahasa laappalappasa ri Kau, na kahasa todo'a laassuro salli' ri Kau.”

¹¹ Appihali Isa, ”Kau tide' manna siso'di' kahasamu mae ri Nakke, ampa kahasa injo gelei ripassareang mange ri kau battu rate. Injomo saba'na: Ia, tulaparapa' injoa mange ri kau, la'bi bakkakang kadorakaanna.”

¹² Pakaramula rihattu injo Pilatus tulusu a'ra'mu lalappasang Isa, mingka tau Yahudi injo appau bakkakii, ”Ampa mupakalappasai tau inni, geleko bahaannna Kaisar. Sikuanna tau larapang injo kalenna karaeng, ia labaliangi kaisar.”

¹³ Rihattu lalangngere'na Pilatus pau injo, ia lasuro erammu Isa ansulukang, na ia attolongi ri kadera pangadelang, ri tampa' riare' injo Litostrotos lalang bisara Ibrani Gabata.

¹⁴ Allo injo hattu pappakasadiamo Pa'lappasang, hattu injo barang tette' sampulomuruamo. Appaui Pilatus mange ri tau Yahudi injo, ”Janjangi karaemmu!”

¹⁵ Jari appau bakkakimu, ”Hunoi Isa! Hunoi Isa! Salli'i Isa!” Lakuamo Pilatus mange ri iyai, ”Makala nakke parallu kusalli' karaemmu?” Pappihalinna imang ponggaha injo, ”Kambe gele rie' karaemba maraenganna kaisar!”

^16a Sa'genna Pilatus lapassareangi Isa mange ri iyai larisalli'.

Isa risalli' 19:16b-27

^16b Tau Yahudi injo latarimai Isa.

¹⁷ Isa lasompo salli'na a'lampa a'sulukang mange ri tampa' riare' injo tampa' ka'daroulu, nulalang ribisara Ibrani: Golgota.

¹⁸ Ri injomu Ia lasalliki. Ia assurangi todo'i rua tau maraeng risalli', risa'rinna ampimbali, Isa ritangnga.

¹⁹ Pilatus lasuro pada'ki' todo'i ukirang rate ri kaju salli' injo, ukiri'na, ”Isa, tau Nazaret, Karaeng tau Yahudi.”

²⁰ Lohe tau Yahudi laaji ukirang injo, saba' ri tampa'na Isa risalli' gele dere battu ri kota na ukirang injo lalang bisara Ibrani, bisara Latin na bisara Yunani.

²¹ Jari appau ngase'mu imang ponggaha injo mange ri Pilatus, ”Ako ukiri'i: Karaeng tau Yahudi, mingka Ia lapaui: Nakkemo Karaeng tau Yahudi.”

²² Pappihalinna Pilatus, ”Apa numaeng kuukiri, latulusu ta'ukiri.”

²³ Rimaennamo tantara injo lasalliki Isa, laalleimu pakeanNa ampai labissa' a'jari appa' dahuang solanna se're tantara nguppai sidahuang – na Baju bakka'Na laallei todo'i. Baju bakka' injo tide' jai'na, ritannung battu riappa' ratena tulusu naung.

²⁴ Injomo saba'na a'bisaraimu, ”Andai ripolong-polong a'jari sikura dahuang, mingka bajikangangi rigorong mamoi barang inai akkulle lauppai.” Appakonjomu injo a'ra'na solanna ripa'rupa nuta'ukiri injo lalang ri Kitta' Tangkasa, ”Iyai lapa'dahu-dahuangi pakeangKu ritangnga-tangnganai na iyai lapanggorongangi baju bakka'Ku.” Passala injo maeng lageokangi tantara injo.

²⁵ Riampi' salli'na Isa ammentengi idonNa surang uranna siana' idonNa, Maria, bahinenna Kleopas surang Maria Magdalena.

²⁶ Rihattunna Isa lajanjang idonNa surang ana' gurung lakamaseang injo rie' riampi'na, Ia appaui mange ri idonNa, ”Idong, iamo inni ana'mu!”

²⁷ Maeng injo pauNa mange ri ana' gurunNa, ”Iamo inni idommu!” Na pakaramula rihattu injo ana' gurung injo laallei ammari ri saponna.

Isa mate 19:28-30

²⁸ Rimaenna injo, saba' Isa latarrusui ma'nassana a'maeng ngase'mu sikuanna, appaui Isa – solanna ripa'rupa nuta'ukiri injo lalang ri Kitta' Tangkasa –: ”A'ra'a nginung!”

²⁹ Ri injo rie' talle rassi anggoro kassi. Jari nga'bakimu nuassimpole taju' bassa risipappa' bulo, numaeng lapaloma lalang ri anggoro kassi, ampai lapatanjo mange ri babana Isa.

³⁰ Rimaenna lainung Isa anggoro kassi injo, Ia appaui, ”A'maemmu.” Maeng injo Ia lapadukku ulunNa na lapassareang nyahaNa.

Ritobo'i la'bena Isa 19:31-37

³¹ Saba' allo injo hattu appakasadia Pa'lappasang na solanna ri allo Passambajangang tau mate injo gele tulusu a'gojeng ri kaju salli' – saba' allo Passambajangang injo allo bakka' – jari mange ngase'mu ponggaha Yahudi injo ri Pilatus na laerai ri ia solanna tau risalliki injo ritepo'i bangkenna na ripanaungi batangkalenna.

³² Jari riekimu tantara injo ampai latepo' bangkenna tau makase're injo na bangkenna tau maraeng assurang injo Isa risalli';

³³ mingka rihattu ambattuinnamo mange ri Isa na lajanjangi ma'nassana Ia matemu, iyai gele latepoki bangkenNa,

³⁴ mingka rie' ri tantara injo latobo'i poke la'beNa, jari ansulu'mu rara surang ere.

³⁵ Tau anjanjangi injo ripassala inni assa'bi na passa'bina toje'i nabana, na ia laisse'i ma'nassana ia nunaba lapau, solanna tappa' todo'ko.

³⁶ Saba' a'jari passala injo, solanna ripa'rupai nuta'ukiri injo lalang ri Kitta' Tangkasa, ”Gele rie' buku-bukunna laritepo'.”

³⁷ Rie' pole pau maraeng lakua, ”Iyai laa'ma'ra' mange ri Ia ri tumaeng injo latoboki.”

Isa riloangang 19:38-42

³⁸ Rimaenna injo Yusuf tubattu injo ri Arimatea mangei laera ri Pilatus, solanna ia ripa'biangi lapanaung batangkalenna Isa. (Ia ana' gurungi ri Isa, mingka assa'bu-sa'bui saba' malla'i mange risikonjo tukahasana Yahudi.) Pilatus laturuki pangerana injo. Jari ia mangemu konjo na lapanaungi batangkalenna Isa.

³⁹ Nikodemus rie' todo'i mange ri injo. Iamo riolo maeng battu mange ri Isa rihattu bangngina. Ia ngerangi lohe minnya' mur a'leo' minnya' hondu barang larie'i tallumpulo kilo bera'na.

⁴⁰ Iyai laalle batangkalenna Isa, ampai laroko' kaeng balasung na lasare minnya'-minnya' pappakahondu assituru' kabiasaanna tau Yahudi injo ampa laalloangangi tau mate.

⁴¹ Riampi' tampa'na Isa risalli' rie' se're koko na lalang ri koko injo rie' se're kuburu bau nugelepa minang ripappaonrangi tau mate.

⁴² Saba' allo injo hattu appakasadia Pa'lappasang tau Yahudi, na kuburu injo gele juai dere tampa'na, jari lapaonrangimu batangkalenna Isa ri injo.