YAHYA 18 - Kitta' Passitallikang Bau KAREBA BAJI'

Isa rijakkala 18:1-11

¹ Sungka'i maeng lapau ngase' injo ansulukammu Isa battu ri injo assurang-surang ana'-ana' gurunNa na iyai a'lampa anta'leang Balang Kidron. Ri injo rie' se're koko na Ia antama'i ri injo assurang-surang ana'-ana' gurunNa.

² Yudas, tau a'bali'ballang injo ri Isa, laisse' todo'i tampa' injo, saba' Isa detto'i asse're-se're ri injo surang ana'-ana' gurunNa.

³ Jari rie' todo'mu Yudas mange konjo a'rurung sibakkalang tantara na sikonjo pajaga Sapo Allataala turisuro risikonjo imang ponggaha na tau Farisi injo na ngerangi sisangka'na pakakasa pa'bundu surang lampu, sulo na panra'bung.

⁴ Isa, latarrusu sikonjo nulaa'jari ri kalenNa, jari mangei ri a'rakang na appaui ri iyai, ”Inai mubojai?”

⁵ Appihalii ngase'mu, ”Isa tau battu injo ri Nazaret.” PauNa mange ri iyai, ”Nakkemo inni.” Yudas tau a'bali'ballang injo ri Ia rie' todo'i ri injo assurang ngase'i ammenteng.

⁶ Rihattunna Ia appau mange ri iyai, ”Nakkemo inni,” soho' bokoimu na anra'ba ngase'i naung ri tana.

⁷ Jari Ia akkuta'nangi pole mange ri iyai, Inai mubojai? Appihali ngase'mu, ”Isa tau battu injo ri Nazaret.”

⁸ Pappihalinna Isa, ”Maeng Kupaumu mange ri kaui, Nakkemo inni. Ampa Nakke tau muboja injo, lappasammu iyai inni a'lampa.”

⁹ Appakonjomu a'ra'na solanna a'rupa pau numaeng injo Ia lapau, ”Battu ri iyai Ripassareangi mae ri Nakke, gele rie' manna se're tau Kulappasang lamate.”

¹⁰ Jari Simon Petrus, saba' ngerangi pa'dang, labu'bu'i pa'danna, ampai lapasimbe' mange ri pagahena Imang Bakka' injo na latappu'i toli kananna. Arenna pagahe injo Malkhus.

¹¹ Lakuamo Isa mange ri Petrus, ”Punai ri banoana pa'dammu intu; gelejua Nakke parallu lanarima kasissaang numaeng lapassareang injo Amma mae ri Nakke?”

Isa ri a'rakanna Hanas – Petrus lasassali Isa 18:12-27

¹² Jari pasukang tantara surang parawira na sikonjo pajaga ri Sapo Allataala turisuro injo ri tau Yahudi lajakkalai Isa ampai lasokkeki.

¹³ Riuruna Ia laerangii mange ri Hanas, saba' Hanas injo matoanna Kayafas na ritaung injo ia a'jari Imang Bakka';

¹⁴ na Kayafasmo maeng appiu'rangi mange ri ponggaha Yahudi injo: ”La'bi riekang matu-matunna ampa se're tau mate rikanara se're bangsa.”

¹⁵ Simon Petrus na se're ana' gurung maraeng lapinahangi Isa. Ana' gurung maraeng injo laisse'i Imang Bakka' na ia antama'i surang Isa rijurunna sapo pammarianna Imang Bakka' injo,

¹⁶ mingka Petrus attaangi pantarang riampi' babaang. Ana' gurung maraeng injo, tulaisse' injo Imang Bakka', muliangi ansulukang, a'bisarai surang tau bahine a'jaga injo ri babaang maeng injo laurangi Petrus antamakang.

¹⁷ Appaui bahine a'jaga injo ri babaang mange ri Petrus, ”Gelejua kau ana' gurunNa todo'ko tau intu?” Appihali Petrus, ”Gele!”

¹⁸ Rihattu injo sikuanna pagahe na pajaga ri Sapo Allataala maemmu apparukkuki api, saba' dingimmu hawa rihattu injo, na iyai ammentengi ri injo a'rarang. Petrus ammenteng todo'i ri injo na assurang-surang ngase'i a'rarang.

¹⁹ Jari pakaramulamu Imang Bakka' injo akkuta'nang ri Isa ripassala ana'-ana' gurunNa surang ajaranNa.

²⁰ Appihali Isa mange ri ia, ”Nakke appau lambusu ri lino inni: Nakke sanging ngajara ri sapo passambajangang surang ri Sapo Allataala, tampa'na sikuanna tau Yahudi asse're-se're; Nakke gelea minang a'bisara assa'bu-sa'bu.

²¹ Ngura kau akkuta'nang mae ri Nakke? Iyaimo intu kuta'nangi, tumaeng injo allangngere apa Kupau mange ri iyai; toje'i, iyai intu laisse'i apa numaeng injo Kupau.”

²² Rihattunna Ia lapau passala injo, rie' se're tau pajaga ammenteng ri injo, latampilingi rupanNa ampai appau, ”Appakonjo pappihalimMu mange ri Imang Bakka'?”

²³ Appihali Isa mange ri ia, ”Ampa salai injo pauKu, pausai mae ri antee salana, mingka ampa nabai pauKu, ngura Nakke mutampiling?”

²⁴ Jari Hanas lasuro erangi Isa lalang ritassokke mange ri Kayafas, Imang Bakka' injo.

²⁵ Simon Petrus ammenteng juapai na a'rarangi ri api. Appauimu tau lohe injo mange ri ia, ”Gelejua kau todo' ana' gurunNa?”

²⁶ Ia lasassali, lakua, ”Gele.” Appaui sitau suro-surona Imang Bakka' injo, bijanna pagahe ripolong injo tolinna ri Petrus, ”Gelejua kau kujanjang ri koko injo assurang-surang Ia?”

²⁷ Assassalai pole Petrus na rihattu injomo akkongkora'i jangang.

Isa ri a'rakanna Pilatus 18:28-38a

²⁸ Rimaenna injo, laerangimu Isa battu ri Kayafas mange ri sapo pammarianna Gubernur. Rihattu injo ngesala juapai. Iyai gele antama' ri sapo pammarianna Gubernur injo, solanna andai lapakarammasa kalenna, saba' iyai a'ra'i langanre-nganre Pa'lappasang.

²⁹ Injomo saba'na ansulukangi Pilatus laruppai ngase'i na appaui, ”Apa pappitinamu mange ri tau inni?”

³⁰ Pappihalinna mange ri ia, ”Ampa Ia gelei se're tau daa geo'na, Ia gelei taparapa' mange ri kau!”

³¹ Appaui Pilatus mange ri iyai, ”Alle na adeli assituru' hukkung Tora'mu.” Lakuaimo tau Yahudi injo, ”Kambe gelekang ripa'biang muno tau.”

³² Appakonjomu a'ra'na solanna ripa'rupa pauna Isa, nulapau injo rihattu lapappiissekanna anteekamua ta'ranna Ia lamate.

³³ Pilatus muliangi pole antama' ri sapo pammariang Gubernur, ampai lakeo' Isa na akkuta'nangi mange ri Ia, ”Apa Kaumo inni karaenna tau Yahudi?”

³⁴ Pappihalinna Isa, ”Apa kau appau ripassala injo nubattu ri ati tangkasa'mu to'jua iyareka rie' tau maraeng appau mange ri kau passala ri Nakke?”

³⁵ Appaui Pilatus, ”Apa nakke inni tau Yahudi? BangsaMu to'jua na sikonjo imang ponggaha tumaeng laparapa' injoKo mae ri nakke; apamo numaeng Mugeokang?”

³⁶ Pappihalinna Isa, ”PakkaraengangKu gele nubattu ri lino inni, saba' ampa PakkaraengangKu battu ri lino inni, tantu a'balina sikonjo suroKu, solanna Nakke gelea ri alle ri tau Yahudi, mingka PakaraengangKu gele nubattu ri lino inni.”

³⁷ Jari akkuta'nangi pole Pilatus mange ri Ia, ”Jari Kau intu Karaeng?” Pappihalinna Isa, ”Kaumo appau ma'nassana Nakkemo Karaeng. Kanaranamo injo Nakke rilaherang na passabakang injo pole Nakke rie' antama' mae ri lino inni, solanna Nakke assare passa'bi passala rikatojekang; sikuanna tau battu rikatojekang lapilangngeri pauKu.”

^38a Appaui Pilatus mange ri Ia, ”Anteekamua battuanna katojekang injo?”

Isa risare hukkungang mate 18:38b–19:16a

^38b Sungka'i maemmo lapau appakonjo, ansulukangi pole Pilatus lapiuppai tau Yahudi injo na appaui mange ri iyai, ”Gele rie' kasalaang kuuppa manna siso'di' ri Ia.

³⁹ Mingka ri kau rie' kabiasaang ma'nassana ri allo Pa'lappasang nakke laallappalasang se're tau ritarungku. A'raki juako, solanna kulappasangi karaenna tau Yahudi inni ri kau?”

⁴⁰ Appau bakkakimu isse', ”Anda Ia, mingka Barabas!” Barabas injo se'rei palukka' bakka'.