YAHYA 16 - Kitta' Passitallikang Bau KAREBA BAJI'

Sabbara 16:1-4a

¹ ”Iangase'na inni Kupau mange ri kaui, solanna andai ammassa nyahamu na a'bokoko ri Nakke.

² Laripelakiko dere, la'bipa pole larie' hattunna sallo' ma'nassana sikuanna tau lahuno injoko pa'ngare'na ia anggeokangi nubaji' ri a'rakanna Allataala.

³ Iyai injo a'bua' appakonjo, kanara geleinna laisse' baji' ri Amma iyareka ri Nakke.

^4a Mingka iangase'na inni Kupau mange ri kaui, solanna ampa larapi'mu hattunna akkulle muu'rangi ma'nassana Nakke maemmu Kupau mange ri kaui.”

Jamaang Nyaha Paurang-urang injo 16:4b-15

^4b ”Passala inni gelei Kupau mange ri kaui minang ri pakaramulana, kanara sikonni inni assurangi juapaki,

⁵ mingka konni-konnina Nakke laa'lampa lamange ri Ia Tumaeng assuro injo ri Nakke, na gele rie' manna se're tau ri kaui akkuta'nang mae ri Nakke: Laantee mae lampaTa?

⁶ Mingka kanara Nakke appau passala injo mange ri kaui, jari pa'risi nyahamui.

⁷ Mingka toje'i nuKupau inni mange ri kaui: Iamo intu la'bi riekang matu-matunna ri kaui, ampa Nakke a'lampa. Saba' ampa Nakke gelea a'lampa, Nyaha Paurang-urang injo gele todo'i larie' mange ri kaui, mingka ampa a'lampa, Nakke lassuro ri Ia mange ri kaui.

⁸ Ampa Iamo rie', Ia laappiu'rangi lino rikadorakaang, katojekang na hukkungang;

⁹ battu ri kadorakaang, saba' iyai tuli gele tappa' mae ri Nakke;

¹⁰ ri katojekang, saba' Nakke a'lampaa mange ri Amma na gelema lamujanjangi;

¹¹ battu rihukkungang, saba' tukahasana lino inni maemmu rihukkung.

¹² Lohe juapa passala nuparallu Kupau mange ri kaui, mingka konni-konnina kaui gelepai akkulle muerangi.

¹³ Mingka ampa Iamo rie', iamo intu Nyaha Katojekang, Ia laurangiko antama' risikonjo katojekang; saba' Ia gele appau battu ria'ra' kale-kalena, mingka sikonjo numaeng lalangngere injomo lalapau na Ia laappabattu mange ri kaui passala nularie' injo sallo'.

¹⁴ Ia laappakala'biri mae ri Nakke, saba' Ia laappabattu mange ri kaui apa numaeng latarima battu ri Nakke.

¹⁵ Iangase'na nulaampunnai Amma injo anungKu; injomo saba'na Nakke appau: Ia laappa'rupai mange ri kaui apa numaeng latarima injo battu ri Nakke.”

Pa'risi laappabattu te'ne 16:16-33

¹⁶ ”Gelemu sallo hattunna, kau gele lanjanjang ri Nakke na gele tommoi pole sallo hattunna, kau lanjanjang ri Nakke.”

¹⁷ Rilalangngerinna injo lohemo battu ri ana'-ana' gurunNa assilagari, ”Apamo battuanna Ia appau appakonjo mae ri ditte: Gelemu lasallo hattunna, kaui gele lanjanjang ri Nakke na gele tommo pole lasallo hattunna kaui lanjanjang ri Nakke? Na: Nakke laa'lampa mange ri Amma?”

¹⁸ Jari appau ngasekimu, ”Apa battuanna Ia appau: Gelemu sallo hattunna? Ditte gele riisse' apa Ia lakuangang.”

¹⁹ Isa laisse'i ma'nassana iyai rie' nua'ra' lapakkuta'nang mange ri Ia, jari Ia appau mange ri iyai, ”Barang injo pauKu sumpae' mulagari, iamo intu: Gelemu lasallo hattunna, kaui gele lanjanjang ri Nakke na gele tommoi lasallo hattunna, kaui lanjanjang ri Nakke.

²⁰ Sitoje'na Nakke appau mange ri kaui: Laapparau ngase'ko surang lassi'na-si'naiko, mingka larannu lino inni; lapa'risi nyahamu, mingka pa'risi'na nyahamu laminrai a'jari te'ne.

²¹ Se're inni bahine sanna' pa'risi'na rihattunna lamana', mingka ri maennamo lalassukang ana'na, ia gelemu lau'rangi kamarasaianna rihattunna mana', saba' te'nena ma'nassana se're tau maemmu laanakang mae ri lino.

²² Appakonjo todo'i kau konni-konnina laappuko pa'risi, mingka laKujanjangi juapako pole surang late'ne atimu na gele rie' manna se're tau akkulle lapaari kate'neammu injo battu ri kaui.

²³ Rihattu injo geleiko akkuta'nangi mae ri Nakke. Sitoje'na Nakke appau mange ri kaui: Sikuanna numuera mange ri Amma, Ia lapassareangi mange ri kau lalang arengKu.

²⁴ Sa'genna hattu inni, geleipako minang ngera lalang arengKu. Ngeraimoko lamutarimai, solanna sangka'i kate'neammu.

²⁵ Iangase'na inni Kupau mange ri kaui lalang ripakkalebarang. Larie' hattunna Nakke gelemo laa'bisara mange ri kaui lalang ripakkalebarang, mingka Kupau lambusui Amma mange ri kaui.

²⁶ Rihattu injo langera dowaangiko lalang arengKu. Gele Kupau mange ri kaui ma'nassana Nakke ngera tujummu mange ri Amma,

²⁷ saba' Ammamo ngamaseang ri kaui, kanara kaui maeng ngamaseang ri Nakke na tappa'ko ma'nassana Nakke rie' mae battu ri Allataala.

²⁸ Nakke rie' mae battu ri Amma na Nakke rie' antama' ri lino; Kubokoi pole lino inni na Nakke a'lampaa lamange ri Amma.”

²⁹ Lakua ana'-ana' gurunNa, ”Janjangi, konni-konnina Ripau lambusumu na gelemuKi make pakkalebarang.

³⁰ Konni-konnina taisse'mu ma'nassana Ditte ngisse' ri iangase'na na gelei parallu tau inni akkuta'nang mange ri Ditte. Injomo saba'na kambe tappa'kang ma'nassana Ditte rie' mae battu ri Allataala.”

³¹ Appihali Isa mange ri iyai, ”Konni-konnina tappa'moko?

³² Janjangi, larie' hattunna, na larapi'mu, rihattunna kau ripasia'-siara massing-massing ri tampa'na to'jua na Nakke mubokoi a'kale-kale. Mingka gele kale-kalengKu jua, saba' Amma minahangi ri Nakke.

³³ Iangase'na injo Kupau mange ri kaui, solanna nguppaiko dame salehangang lalang ri Nakke. Lalang ri lino inni lasissaiko ripama'ri'-ma'risi, mingka pakasa'ga'i nyahamu, saba' Nakkemo ambeta lino.”