YAHYA 15 - Kitta' Passitallikang Bau KAREBA BAJI'

Poong anggoro toje' 15:1-8

¹ ”Nakkemo poong anggoro toje' na AmmangKumo tuanjamana.

² Sikonjo tangke-tangke rie' ri Nakke nugele injo ambua, latatta'i na sikonjo tangke-tangke ambua injo latangkasi, solanna pela'lohe buana.

³ Tangkasamoko kanara pau maeng injo Kupau mange ri kaui.

⁴ Ammariko lalang ri Nakke na Nakke lalang ri kaui. Assimpole tangke-tangke injo gelei akkulle ambua battu ri kalenna to'jua, ampa gelei a'da'ki' ri poong anggoro, appakonjo todo'i ri kaui, geleiko ambua ampa geleiko ammari lalang ri Nakke.

⁵ Nakkemo poong anggoro toje' na kauimo tangke-tangkena. Inai jua ammari lalang ri Nakke na Nakke lalang ri ia, ia lalohe buana, saba' pantaranganna Nakke geleiko akkulle anggeokangi manna se're.

⁶ Inai jua gele ammari lalang ri Nakke, ia laripamballungi ansulukang assimpole tangke-tangke na a'jari kalotoro, maeng injo lapasse'rei tau na ripantama'i ri api laritunu.

⁷ Ampa kau ammari lalang ri Nakke na pauKu ammari lalang ri kaui, ngeraimoko apa jua mukaa'raki, lamutarimai intu.

⁸ Lalang ripassala innimo AmmangKu ripakala'biri, iamo intu ampa kau ambua lohe na ri appakonjona kaumo intu ana'-ana' gurungKu.”

Parenta laassikamaseang 15:9-17

⁹ ”Assimpole Amma ngamaseang mae ri Nakke, appakonjo todo'i Nakke ngamaseang mange ri kaui; ammariko lalang ripangamaseangKu injo.

¹⁰ Ampa muturuki parentaKu, kau laammari lalang ripangamaseangKu, assimpole Nakke nuruki passuroanNa AmmangKu na ammari lalang ripangamaseanNa.

¹¹ Iangase'na injo Kupau mange ri kaui, solanna karannuangKu rie'i lalang ri kaui na a'jari sangka'i karannuammu.

¹² Iamo inni parentaKu, iamo intu solanna assikamaseangiko, assimpole Nakke ngamaseang ri kaui.

¹³ Gelemo rie' pangamaseang la'bi bakkakang battu ripangamaseanna inni, iamo intu tau lapa'bisonaang nyahana passabakang ri baha'-bahaanna.

¹⁴ Kauimo intu bahaangKu, ampa mugeokangi nuKupassuroang injo mange ri kaui.

¹⁵ Nakke geleimoko Kuareki pole ata, saba' ata inni gele laisse', apa lageokang tau lapaa'jari injo ata, mingka Kuarekiko bahaang, saba' Nakke maeng Kupappiissekammu mange ri kaui sikonjo nuKulangngere battu ri AmmangKu.

¹⁶ Gele kau anjo'jo' ri Nakke, mingka Nakkemo anjo'jo' ri kaui. Nakke maeng Kutantuangiko, solanna a'lampako na lohe buamu na tulusu pambuamu, solanna apa jua muerai mange ri Amma lalang ri arengKu, Ia lapassareangi mange ri kaui.

¹⁷ Iamo inni parentaKu mange ri kaui: Kamaseangi parammu rupatau.”

Lino inni likingi mange ri Isa surang ri ana'-ana' gurunNa 15:18-27

¹⁸ ”Ampa lino inni liking ri kaui, u'rangimu ma'nassana ia la'bi rioloi liking mae ri Nakke.

¹⁹ So'di injo kau battu ri lino inni, tantu lakamaseangimmu lino assimpole se're anunna. Mingka kanara kaui gele battu ri lino inni, mingka Nakke maeng Kujo'jokiko battu ri lino inni, injomo saba'na lino inni liking ri kaui.

²⁰ U'rangimu numaeng injo Kupau ri kaui: Se're ata gele lala'bi langkasang battu ri tau lapaa'jari injoi ata. Ampa iyai injo maeng ma'ri'-ma'risi ri Nakke, iyai todo' injo lama'ri'-ma'risi ri kaui; ampa iyai injo maeng minahang ripauKu, injo laturuki todo'i paumu.

²¹ Mingka sikuanna lalageokang ngase'i mange ri kaui kanara ArengKu, saba' Ia gele laisseki tumaeng assuro injo ri Nakke.

²² So'di injo Nakke gelea rie' na Nakke gelea appau-pau mange ri iyai, tantu geleinna doraka. Mingka konni-konnina iyai injo tide'mo passassala rikadorakaannai!

²³ Inai jua liking mae ri Nakke, ia liking todo'i mange ri AmmangKu.

²⁴ So'di injo Nakke gelea anggeokang jama-jamaang ritangnga-tangngana assimpole nulageokangi injo tau maraeng, tantu geleinna doraka. Mingka konni-konnina manna injo iyai maengi lajanjang iangase'na injo, tuli likingi baji' mae ri Nakke iyareka ri AmmangKu.

²⁵ Mingka pau nuta'ukiri injo lalang Kitta' Tora'na parallui ripa'rupa: Iyai likingi mae ri Nakke manna tide' jua pa'lalanganna.

²⁶ Ampa rie'mo Nyaha Paurang-urang nulaKusuro battu injo ri Amma, iamo injo Nyaha Katojekang nuansulu' battu ri Amma, Ia laassa'bii ripassala'Ku.

²⁷ Mingka kaui lassa'bi todo'ko, saba' kaui minang ripakaramulana assurang-surangki.”