YAHYA 14 - Kitta' Passitallikang Bau KAREBA BAJI'

Isa patteteang mange ri Amma 14:1-14

¹ ”Andalalo balisa atimu; tappa'moko ri Allataala, tappa' todo'ko mae ri Nakke.

² Ri Saponna AmmangKu lohe tampa' pammariang. Ampa gelei appakonjo, tantu Kupauna mange ri kaui. Saba' Nakke laa'lampa mange konjo laappakasadia tampa' ri kaui.

³ Ampa Nakke a'lampaa mange konjo na maeng sadiamu tampa'mu, Nakke larie' pole na Kuerangiko mange ri tampa'Ku, solanna ri tampa' pammariangKu rieki todo'ko ri injo.

⁴ Ri antee mae lampaKu, muisse'i lalang mange konjo.”

⁵ Appaui Tomas ri Ia, ”Karaeng, kambe gele taisse' laantee mae lampaTa; jari anteekamua lataisse' lalang mange konjo?”

⁶ Appaui Isa ri ia, ”Nakkemo patteteang surang kanabaang na tallasa. Gele rie' manna se're tau akkulle ambattu mange ri Amma, ampa gele attete ri Nakke.

⁷ So'di injo muissekia, tantu muissekinna todo' AmmangKu. Konni-konnina Ia muissekimu na Ia maemmu mujanjangi.”

⁸ Appaui Filipus mange ri Ia, ”Karaeng, pijo'jokiangkang Amma injo mae ri kambe, injo ganna' tommo ri kambe.”

⁹ Appaui Isa mange ri ia, ”Sallomuki assurang-surang Filipus, mingka kau gelepai muisse? Inai jua maeng anjanjang ri Nakke, injo ia maemmu lajanjang Amma; anteekamua kau appau: Pijo'jokiangkang Amma injo mae ri kambe.

¹⁰ Gele juapako tappa' ma'nassana Nakke lalang ri Amma na Amma lalang ri Nakke? Apa Kupau mange ri kau, gele Kupau battu ria'ra' kale-kaleKu to'jua, mingka Amma, Tuammari injo ri Nakke, Iamo anggeokang rijama-jamaanNa.

¹¹ Tappa'moko mae ri Nakke ma'nassana Nakke lalang ri Amma na Amma lalang ri Nakke; iyareka ampa gele, tappakimoko rikanara jama-jamaang injo.

¹² Sitoje'na Nakke appau mange ri kaui: Inai jua tappa' mae ri Nakke, ia lageokang todo'i jama-jamaang Kugeokang injo, la'bipa pole jama-jamaang nula'bi bakkakang battu ri injo. Saba' Nakke laa'lampa mange ri Amma;

¹³ na apa jua muera lalang ri arengKu, laKugeokangi, solanna ripakala'biri Amma lalang ri Ana'.

¹⁴ Ampa ngeraiko lalang riarengKu, injo tantumu laKugeokanna.”

Isa laassare Nyaha Paurang-urang 14:15-31

¹⁵ ”Ampa ngamaseangiko ri Nakke, kau lamuturuki sikuanna parentaKu.

¹⁶ Nakke langera ri Amma, na Ia laassare ri kau se're Paurang-urang maraeng, solanna Ia lapinahangiko situlusu'na,

¹⁷ iamo intu Nyaha Katojekang. Ia gele akkulle latarima lino, saba' Ia gele lajanjang lino na Ia gele riisse' ri lino. Mingka muissekii, saba' Ia minahangi ri kaui na ammari ri kau.

¹⁸ Nakke geleko laKulappasangi assimpole ana' kukang. Nakke lamuliang juapa mange ri kau.

¹⁹ Gelemu lasallo lino inni nagelema lajanjang, mingka kau lamujanjangia, saba' Nakke laattallasa na kaui pole laattallasa.

²⁰ Rihattu injomo kau lamuisse'i ma'nassana Nakke lalang ri AmmangKu na kau lalang ri Nakke na Nakke lalang ri kau.

²¹ Inai jua lateteng parentaKu na lageokangi, iamo ngamaseang mae ri Nakke. Inai jua ngamaseang mae ri Nakke, ia larikamaseang todo'i ri AmmangKu na Nakke pole langamaseang mange ri ia na laKupappijanjangi kalengKu mange ri ia.”

²² Yudas, gele injo Yudas Iskariot, appau mange ri Ia, ”Karaeng, apamo saba'na nalaripappijanjangi kalenTa mae ri kambe, na gele mange ri lino?”

²³ Lakua Isa, ”Ampa rie' se're tau ngamaseang mae ri Nakke, ia lalaturuki pauKu na AmmangKu langamaseang mange ri ia na labattukang mange ri ia na ammarikang surang ia.

²⁴ Inai jua gele ngamaseang mae ri Nakke, ia gelei laturuki pauKu; na pau mulangngere injo gele nubattu ri Nakke, mingka nubattu ri Amma Tuassuro injo ri Nakke.

²⁵ Iangase'na injo Kupau mange ri kaui, rihattu rie'Ku juapa assurang-surang kaui;

²⁶ mingka Nyaha Paurang-urang, iamo intu Nyaha Tangkasa, nulalasuro injo Amma lalang riarengKu, Iamo lalapangajarangi iangase'na mange ri kaui na lalapiu'rangiko risikonjo numaeng Kupau ri kaui.

²⁷ Dame salehangang Kubokoi ri kaui. Dame salehangang Kupassareang mange ri kaui, na nuKupassareang injo gelei assimpole nulapassareang a'ra'na lino inni mange ri kaui. Andamu balisa na bentere atimu.

²⁸ Maengi mulangngeri ma'nassana Nakke maeng appau mange ri kaui: Nakke laa'lampa, mingka Nakke labattu juapa muliang mange ri kaui. So'di injo ngamaseangiko ri Nakke, tantu rannuimmu saba' Nakke a'lampaa mange ri AmmangKu, na Amma la'bi bakkakang battu ri Nakke.

²⁹ Rikonni-konninamo Nakke appau mange ri kaui rigelenapa a'jari passala injo, solanna tappakiko, ampa a'jarimu passala injo.

³⁰ Gelemo lalohe Kulagara mange ri kaui, saba' tukahasana ri lino inni rie'mu na ia tide' jua kahasana manna siso'di' mae ri kalengKu.

³¹ Mingka lino inni parallui laisse' ma'nassana Nakke ngamaseang Amma na ma'nassana Nakke anggeokang ri iangase'na assimpole nulapassuroang injo Amma mae ri Nakke. Ambaungiko, maemoko a'lampaki battu ri inni.”