YAHYA 13 - Kitta' Passitallikang Bau KAREBA BAJI'

Isa labissai bangkeng suro-suroNa 13:1-20

¹ Rihattu gelenapa ripakaramula allo Pa'lappasang injo, Isa laisse'mu ma'nassana larapi'mu hattunNa laa'lette' battu ri lino inni mange ri Amma. Ia lakamaseangi sikonjo a'jari anunNa ri lino inni, na Ia tulusu lakamaseanna sa'genna larapi' allo kala'busang.

² Rihattu attangngainna surang nganre, Ibilisi maeng labisikimu naha-naha daa lalang ri atina Yudas Iskariot, ana'na Simon, laa'bali'ballang ri Ia.

³ Isa laisse'i ma'nassana Amma maemmu lapassareang sikuanna mange ri Ia na ma'nassana Ia battui ri Allataala na lamuliangi pole mange ri Allataala.

⁴ Jari ammentengi Isa na lapasulu' soro'banNa. Ia ngalle silahara kaeng titorong ampai laarre' aja'Na,

⁵ maeng injo Ia niri'i ere antama' risibatu talle na pakaramulamu labissai bangkeng suroNa ampai lalu'lu' kaeng lapaarre' injo ri aja'Na.

⁶ Jari larapi'mu mange ri Simon Petrus. Appaui Simon Petrus mange ri Ia, ”Karaeng, ngura Ditte a'ra'i Ribissai bangkengku?”

⁷ Lakuamo Isa mange ri ia, ”Apa nuKugeokang inni, konni-konnina gele muisseki, mingka lamupahangi sallo'.”

⁸ Appaui Petrus mange ri Ia, ”Ditte gele laminang ribissai bangkengku situlusu'na.” Appihali Isa, ”Ampa Nakke gele ambissai ri bangkemmu, geleko nguppa dahuang lalang ri Nakke.”

⁹ Appaui Simon Petrus mange ri Ia, ”Karaeng, anda sa'ga bangkengku jua, mingka limangku na ulungku todo'!”

¹⁰ Appaui Isa mange ri ia, ”Inai jua ampa maemmu anrio, ia gelemu parallu ribissai kalenna poleang passangadinna bangkennamamo ribissai, saba' ia tangkasamu sibatu batangkale. Kau pole tangkasamoko, mingka gelepa ngase'ia.”

¹¹ Saba' Ia latarrusui, inai lalapassareangi. Injomo saba'na Ia appaui, ”Geleiko tangkasa ngase'.”

¹² Sungka'na Ia maemmu labissai bangkeng suroNa, Ia lapake muliang pakeanNa na muliangi mange ri tampa'Na. Maeng injo Ia appaui mange ri iyai, ”Mupahang juai apa numaeng Kugeokang mange ri kaui?

¹³ A'ngarekiko ri Nakke Guru surang Karaeng, na nabai injo paumui, saba' Nakkemo Guru surang Karaeng.

¹⁴ Jari ampa Nakke, Karaeng na Gurummu, ambissai bangkemmu, jari kaui pole parallu assibissai bangkeng;

¹⁵ saba' Nakke maemma assare se're pinahangang mange ri kaui, solanna mugeokangi todo'i assimpole numaeng Kugeokang injo mange ri kaui.

¹⁶ Sitoje'na Nakke appau mange ri kaui: Se're inni ata gele la'bi langkasang battu ri tau ngatainna, iyareka se're turisuro battu ri tuassuro injo.

¹⁷ Ampa pade' muisse'i iangase'na inni, injo sunggumoko, ampa mugeokangi.

¹⁸ Gele mange ri kaui jua Nakke appau. Kuisse'i, inai maeng Kujo'jo'. Mingka parallui ripa'rupa pau inni: Tau lakanre injo rotiKu, laangka'mu kantunu'na mae ri Nakke.

¹⁹ Konni-konnina Nakke appau pole ri kaui rigelenapa a'jari passala injo, solanna ampa a'jarimu passala injo, tappakimoko ma'nassana Nakkemo inni.

²⁰ Sitoje'na Nakke appau mange ri kaui: Inai jua latarimai tau Kusuro injo, ia latarimamu Tuassuro injo ri Nakke.”

Isa appiu'rangi ri Yudas 13:21-30

²¹ Sungka'na maemmo Isa appau appakonjo Ia sarro lannasa'na, ampai assa'bi, ”Sitoje'na Nakke appau mange ri kaui, rie' se're tau ri kaui intu lalapassareanga.”

²² Assitangarimu suroNa, bentere ngase'mu inai are lakuangang Isa.

²³ Sala se're ri suro injo, iamo intu suro rikamaseang injo ri Ia, assandere riampi'Na, risa'ri kananNa.

²⁴ Mange ri suro injo Simon Petrus assare tanra na lakua, ”Kuta'nangsai inai lakuangang injo Isa!”

²⁵ Jari a'gilimmu suro attolong injo riampi'na Isa na appaui mange ri Ia, ”Karaeng, inai injo?”

²⁶ Appihali Isa, ”Iamo tuKusare injo roti, ampa maemmu Kupaloma ri mangko'.” Sungka'i maeng appau appakonjo Ia lapalomamu roti injo, ampai laalle na lapassareangi mange ri Yudas, ana'na Iskariot.

²⁷ Sungka'i maeng latarima roti injo Yudas, ia ladongkokimu Ibilisi. Jari appaui Isa mange ri ia, ”Apa nua'ra' lamugeokang, geokang memammu inni.”

²⁸ Mingka gele rie' manna se're tau ri iyai turie' injo attolong nganre lapahangi ngura appau appakonjoi Isa mange ri Yudas.

²⁹ Saba' Yudas pananro doe'i, jari rie'mo tubata-bata ma'nassana Isa lasuroi lammalli apa nulaparalluang ri allo pa'lappasang injo, iyareka laassare mange ri tau kaasi-asi.

³⁰ Sungka'i latarimamo roti injo, lassirimu Yudas a'lampa. Rihattu injo seppa'mu bangngi.

Parenta bau 13:31-35

³¹ Sungka'i a'lampamo Yudas, appaui Isa, ”Konni-konnina Ana' Rupatau laripakala'biri na Allataala ripakala'biri lalang ri Ia.

³² Ampa Allataala ripakala'biri lalang ri Ia, Ia laripakala'biri todo'i ri Allataala lalang ri kalenNa, na Iamo laripakala'biri.

³³ Oe ana'-ana'Ku, so'di'kalemamo hattungKu larie' ri kaui. Kau laa'bojai ri Nakke, na assimpole numaeng injo Kupau mange risikuanna tau Yahudi: Mange ri tampa' Kumangei injo, geleiko ma'ring labattui, appakonjoi pole rikonni-konnina Kupau todo'i mange ri kaui.

³⁴ Nakke assare parenta bau mange ri kaui, iamo intu solanna kau assikamaseang; assimpole Nakke ngamaseang mange ri kau appakonjo todo'i kaui intu parallu assikamaseang.

³⁵ Ri appakonjona sikuanna tau laisse'i ma'nassana kaui intu ana'-ana' gurungKu, iamo intu ampa assikamaseangiko.”

Isa appiu'rangi ri Petrus 13:36-38

³⁶ Appaui Simon Petrus mange ri Isa, ”Karaeng, laantee mae lampaTa?” Appihali Isa, ”Ri tampa' Kumangei injo, geleko akkulle minahang ri Nakke konni-konnina, mingka sallo' kau laminahang ri Nakke.”

³⁷ Appaui Petrus mange ri Ia, ”Karaeng, ngura nakke gelea akkulle minahang ri Ditte konni-konnina? Nakke a'ra'i kupassareang nyahaku mange ri Ditte!”

³⁸ Appihali Isa, ”Nyahamu lamupassareang mae ri Nakke? Sitoje'na Nakke appau mange ri kau: Rigelenapa akongkoroa' jangang, kau pintallumma musassali.”