YAHYA 12 - Kitta' Passitallikang Bau KAREBA BAJI'

Isa ririo songkabala 12:1-8

¹ Annangallo rigelenapa Pa'lappasang, ambattumu Isa mange ri Betania, tampa' pammarianna Lazarus tumaeng injo lapakaattalasa muliang Isa battu rikamateang.

² Ri injo a'buaki panganre-nganreang tujunna Isa na Marta a'daha-daha, sala se'renna tuminahang nganre surangi Isa iamo intu Lazarus.

³ Maeng injo ngalle Maria sitangnga katti minnya' narwastu ka'jala ballinna, ampai laminnyaki bangkenna Isa na uhu'na lapake allu'lu'; na honduna minnya' injo laganna'i sibatu sapo injo.

⁴ Mingka Yudas Iskariot, se'rei suro ri Isa, tugele injomo sallo nalapassareangi Isa, appau,

⁵ ”Ngura minnya' narwastu inni gele ribalukang mamo na ballinna ripassareangi mange ri tau kaasi-asi?”

⁶ Passala injo lapaui gele kanara lapariatina tau kaasi-asi inni, mingka ia se'rei palukka'; ia biasai a'kossi'-kossi' doe' tattaro lalang ri purukang lateteng injo.

⁷ Jari appaui Isa, ”Lappasang tommo lageokang passala inni assimpole papiu'rangi ripanguburangKu.

⁸ Saba' tau kaasi-asi intu tulusu rie' juai ri kaui, mingka Nakke gelea tulusu larie' ri kau.”

Passamaturukang larihunoi Lazarus 12:9-11

⁹ Sibageang bakka' tau Yahudi allangngere ma'nassana Isa rie'i konjomange na mange ngase'i konjo gele sangga kanara Isa jua, mingka pole lalajanjangi Lazarus, tumaeng injo lapakaattallasa muliang Isa battu rikamateang.

¹⁰ Jari sikonjo imang ponggaha assamaturuki ngase'mu lalahuno todo'i Lazarus,

¹¹ saba' kanara iamo nalohe tau Yahudi a'boko ri iyai na tappa'i mange ri Isa.

Isa ripakala'biri ri Yerusalem 12:12-19

¹² Rimintara'na mae rihattu lohena tau battu lamange assua'-suara ri Pa'lappasang injo lalangngere ma'nassana Isa rie'mu attangnga lalang lamange ri Yerusalem,

¹³ ngalle ngase'mu taha-taha nuriare' taha palem, na a'lampai laruppai Isa ampai a'gora-gora: ”Hosana! Ripakala'birimu Tubattu injo lalang arenna Allataala, Karaeng Israele!”

¹⁴ Isa anrumpa'i sikaju ana' kaladai longko ampai nai' a'bai, assimpole rie' ta'ukiri:

¹⁵ ”Ako malla', oe ana'rarana Sion, janjangimu, rie'mu Karaemmu, attolongi rate ri sikaju ana' kaladai longko.”

¹⁶ Ripakaramulana ana'-ana' gurunna Isa gele lapahang passala injo, mingka sungka'i maemmo ripakala'biri Isa, ngu'rangii ngase'mu ma'nassana pau injomo lakuangang, na ma'nassana iyai maeng lageokang todo'i mange ri Ia.

¹⁷ Jari assa'bimu tau lohe tuassurang-surang injo Isa rihattunna lakeo' Lazarus ansulukang battu ri kuburu na lapakaattallasai muliang battu rikamateang.

¹⁸ Injomo saba'na tau lohe injo a'lampai laruppai Isa, kanara lalangngerinna ma'nassana Ia a'bua' kajariang nugele injo samara.

¹⁹ Jari appaui tau Farisi injo, ”Kaumo anjanjang ma'nassana tide' jua matu-matunta, janjammu, sibatu lino battu minahang ri Ia.”

Isa lapappiissekang kamateanNa 12:20-36

²⁰ Ri iyai tua'lampa injo lassambajang ri allo pa'lappasang, rie' todo' sikura tau Yunani.

²¹ Iyai injo a'lampai mange ri Filipus, assala'na battu ri Betsaida ri Galilea, ampai appaui mange ri ia, ”Karaeng, kambe a'ra'kang assijanjang surang Isa.”

²² A'lampai Filipus mange lapauwang Andreas; Andreas surang Filipus lapabattui pasang injo mange ri Isa.

²³ Appaui Isa mange ri iyai, ”Larapi'mu hattunna Ana' Rupatau laripakala'biri.

²⁴ Sitoje'na Nakke appau mange ri kaui: Ampa lisere bae gandong inni gele a'dappe' naung ri tana, ia latulusu silisere'na; mingka ampa matei, ia laa'jari lohe bullere'na.

²⁵ Inai jua lakatutui nyahana, latappela' nyahana, mingka inai jua gele lakatutui nyahana ri lino inni, ia lapiarai ritallasa mannannungang.

²⁶ Inai jua anjampangi ri Nakke, ia parallui minahang ri Nakke na ri anteea mae rie' ri injomu pajampangingKu laammari. Inai jua anjampangi ri Nakke, ia ripakala'biri ri Amma.

²⁷ Konni-konnina assi'na-si'na batengKu na apamo laKupau? Amma, pakasalama'i battu rikasissaang inni? Gele, saba' rikanaranamo injo Nakke rie' lalang rikasissaang inni.

²⁸ Amma, ripakala'birimu aremMu!” Jari kalangngerammu sa'ra battu ri Suruga, ”Nakke maemmu Kupakala'biri, na Nakke laappakala'biri juapa!”

²⁹ Tau lohe ammentengi injo na lapilangngeri appau ma'nassana injo sa'ra gunturu. Rie' pole tau appau, ”Se're malaeka' maeng a'bisara surangang Ia.”

³⁰ Appihali Isa, ”Sa'ra kalangngerang injo gele kanara ri Nakke, mingka kanara ri kaui.

³¹ Konni-konnina attangngamu pangadelang ri lino inni: konni-konnina pole tukahasana lino inni laripamballungi ansulukang;

³² na Nakke, ampa Nakkemo ripakala'biri ri lino, laKubeso' ngase'i sikuanna tau battu injo mae ri Nakke.”

³³ Inni lapaui Isa lalapappissekangi anteekamua ta'ranna Ia lamate.

³⁴ Jari appihalimu tau lohe injo, ”Kambe maeng talangngeremu hukkung Tora' ma'nassana Almase tulusu laattallasai situlusu'na; anteekamua lama'ring Kau appau ma'nassana Ana' Rupatau parallu ripakalangkasa? Inai sitoje'na Ana' Rupatau injo?”

³⁵ Appaui Isa mange ri iyai, ”Siso'di' kalemamo hattunna sinara injo rie' ri kaui. A'lingkaimoko sangkalang rie'na juapa sinara injo ri kaui, solanna kalammang injo andai kahasa ri kaui; inai jua a'lingka lalang ri kalammang, injo ia gele laisse' antee mae lampana.

³⁶ Tappa'ko mange ri sinara injo, ampa rie' juapai sinara injo ri kaui, solanna kaui a'jari ana'-ana' sinara.” Sungka'i maeng appau appakonjo, Isa a'lampai mange amminsa'bu battu ri tau lohe injo.

Ngurai tau Yahudi inni gele a'ra' tappa' 12:37-43

³⁷ Manna injo Isa a'bua'i siloheang kajariang nugele samara ri a'rakang matannai, mingka iyai gele juai tappa' mange ri Ia,

³⁸ solanna ripa'rupa pauna Allataala nulaukiri injo Nabbi Yesaya: ”Karaeng, inaimo latappa' mange ripauba? Na mange ri nai' lima KakahasaamMu Karaeng ripappijanjangang?”

³⁹ Injomo saba'na iyai gele akkulle tappa', saba' Yesaya maeng todo'i lapau,

⁴⁰ ”Ia maeng lapakabutamu matanna, na lapakaterasa atina, solanna gele anjanjang matanna, na gele lapahang ri atina, jari a'gilingi, sa'genna Kupakamole ngase'.”

⁴¹ Passala inni ripaui ri Yesaya, saba' ia maeng lajanjammu kala'biranNa na maemmu pole lapau-pau passala'na Ia.

⁴² Mingka lohe todo' ritangngana ponggaha injo tappa' mange ri Ia, mingka rikanara lohena tau Farisi jari iyai injo gele lapau silambusu'na, solanna gelei ripelaki dere.

⁴³ Saba' iyai injo la'bi langaiang ripakala'biri ri rupatau na ripakala'biri ri Allataala.

Pauna Isa langadeli 12:44-50

⁴⁴ Maeng injo appau bakka'i Isa, ”Inai jua tappa' ri Nakke, injo gele Nakke lakatappaki, mingka mange ri Ia, ri Tusasuro injo ri Nakke;

⁴⁵ na inai jua anjanjang ri Nakke, injo Iamo lajanjang, Tuassuro injo ri Nakke.

⁴⁶ Nakke antama' ri lino inni assimpole sinara, solanna sikuanna tau tappa' injo ri Nakke gele ammari rikalammang.

⁴⁷ Ampa rie' se're tau lapilangngeri pauKu, mingka gele lageokang, gele Nakke hakkinna, saba' Nakke rie' mae gele langadeli lino, mingka Kupakasalama'i.

⁴⁸ Inai jua gele tappa' ri Nakke, na gele latarima pauKu, injo ia rie'mo hakkinna. Iamo intu pau Kupau injo. Iamo injo laa'jari hakkinna ampa kiama'mu lino.

⁴⁹ Saba' Nakke appa-pau gele nubattu ri kalengKu to'jua, mingka nubattu ri Amma, Tuassuro injo ri Nakke, iamo assuro ri Nakke laappala'bang apa nuparallu Kupau surang Kupabattu.

⁵⁰ Kuisse'i ma'nassana parentaNa injo iamo intu tallasa mannannungang. Kanara injomo, apa nuKupau injo, Kupabattui assimpole anteekamua ripappauna Amma mae ri Nakke.”