YAHYA 11 - Kitta' Passitallikang Bau KAREBA BAJI'

Lazarus ripakaattallasa muliang 11:1-44

¹ Rie' se're tau attangngai garring, arenna Lazarus, battu ri Betania, desa pamarianna Maria surang uranna siana', Marta.

² Maria iamo intu bahine maeng injo laminnayaki bangkenna Karaeng battu ri minnya' mur na uhu'na lapalu'lu'; Lazarus tau garring injo iamo intu uranna siana'.

³ Bahine rua injo appikatu pau mange ri Isa, ”Karaeng, ia tau Mukamaseang injo, garringi.”

⁴ Mingka rihattu lalangngere'na Isa kareba injo, Ia appaui, ”Garring injo gele juai langalle nyaha, mingka lalapappijanjangangi kala'biranna Allataala, solanna patteteang rigarring injo Ana' Allataala ripakala'biri.”

⁵ Isa lakamaseang toje'i Marta na Maria surang Lazarus uranna siana'.

⁶ Mingka rihattu lalangngere'Na ma'nassana garringi Lazarus, Ia laattu-attuangi ammari ruangallo pole ri tampa' pa'bangngianna;

⁷ mingka rimaenna injo Ia appaui mange ri ana'-ana' gurunNa, ”Muliammuki mange ri Yudea.”

⁸ Appaumu ana'-ana' gurunNa mange ri Ia, ”Guru, baukale juapai tau Yahudi inni a'ra' ambunduki batu ri Ditte, ngura a'ra' juapaKi muliang mange konjo?”

⁹ Appihali Isa, ”Gelejua rie' sampulorua jaang lalanna siallo? Inai jua a'lingka ritangnga allona, gele latatto'ro bangkenna, saba' ia lajanjangi sinara'na lino inni.

¹⁰ Mingka ampa rie' se're tau a'lingka ribangngina, lata'to'roi bangkenna, saba' tide' sinara lalang ri kalenna.”

¹¹ Appakonjomu pauNa, na rimaenna injo appaui Isa mange ri iyai, ”Lazarus, uranta siana', tinromu, mingka Nakke laa'lampa mange konjo Kuronrongi battu ritinrona.”

¹² Jari lakuamo ana'-ana' gurunNa mange ri Ia, ”Karaeng, ampa tinrona jua, lagassingi intu.”

¹³ Mingka sitoje'na Isa labisarai passala matenamo Lazarus, mingka pa'ngare'nai Isa labisarai passala tinro injo tinrona toje' jua.

¹⁴ Injomo saba'na Isa lapau lambusui, ”Lazarus matemu;

¹⁵ Mingka Nakke sukkuru, gelea rie' rihattu injo, saba' appakonjopai la'bi baji' ri kaui, solanna akkulleiko tappa'. Konni-konnina maeko a'lampaki mange ri ia.”

¹⁶ Jari Tomas, turiareng injo Didimus, appau mange ribahaanna, iamo intu ana'-ana' gurung maraeng injo, ”Maemoko a'lampa todo'ki mange lamate surang Ia.”

¹⁷ Rihattu ambattunamo Isa, Ia larumpa'i Lazarus patangallomu ammonranna lalang ri kuburu.

¹⁸ Betania seppa'i ri Yerusalem, larie' juai barang tallu kilometere derena.

¹⁹ Ri injo lohemo tau Yahudi battu latimporongi Marta na Maria saba' matena uranna siana'.

²⁰ Sungka'i Marta lalangngere ma'nassana Isa rie'i, a'lampai laruppai. Mingka Maria lalang juai ri sapo.

²¹ Jari appaui Marta mange ri Isa, ”Karaeng, so'di' rie'Ki ri inni, tantu gelena mate urangku siana'.

²² Mingka manna konni-konnina kuisse'i ma'nassana Allataala laassare mange ri Ditte risikuanna nuriera injo mange ri Ia.”

²³ Appaui Isa mange ri Marta, ”Attallasai muliang urammu siana'.”

²⁴ Lakuamo Marta mange ri Isa, ”Kuisse'i ma'nassana ia laattallasai muliang rihattu attallasa'na ngase' muliang tau mate inni ampa larapi'mu allo kala'busang.”

²⁵ Appihali Isa mange ri ia, ”Nakkemo patteteang tallasa muliang surang katallasang; inai jua tappa' mae ri Nakke, ia laattallasai manna maemmu mate,

²⁶ na sikuanna tau attallasa na tappa'i mae ri Nakke, gele lamate sitarrusu'na. Tappa' juako ripassala inni?”

²⁷ Appihali Marta, ”Io', Karaeng, tappa'a ma'nassana Kaumo Almase, Ana' Allataala, tulabattu injo antama' ri lino inni.”

²⁸ Rimaenna appau appakonjo ia a'lampai mange lakeo' Maria uranna siana' na a'bisi'-bisi'i mange ri ia, ”Guru rie'i konjomange na Ia lasuro keo'ko.”

²⁹ Rilalangngere'na injo lassirimu ammenteng Maria ampai a'lampa mange laboja Isa.

³⁰ Mingka rihattu injo Isa gelepai ambattu antama' lalang ri desa injo. Ia rie' juapai ri tampa' passiuppaanna Marta sumpae'.

³¹ Sungka'i tau Yahudi lohe assurangi injo Maria ri sapo injo latimporongi, lajanjangi ma'nassana Maria lassiri ammenteng na a'lampai ansulukang, lapinahangimu, saba' pa'ngare'nai ma'nassana ia a'lampai lamange ri kuburu apparau ri injo.

³² Riambattuna Maria mange ri tampa' pammari-marianna Isa na lajanjangi Isa, ia a'demporoi ri a'rakang bangkenNa na appaui mange ri Ia, ”Karaeng, so'di injo rie'Ki ri inni, tantu gelena mate urangku siana'.”

³³ Rihattunna Isa lajanjangi Maria apparau na injo pole tau Yahudi lohe uranna Maria, a'jari simpummu pa'mai'Na. Ia sarroi pa'risi nyahaNa na lakua,

³⁴ ”Ri anteei mae muloangang?” Appihali ngase'mu, ”Karaeng, maeKi na ritilingi!”

³⁵ Jari apparaui Isa.

³⁶ Lakua tau Yahudi Injo, ”Janjangimu, Ia toje'i pangamaseanna mange ri ia!”

³⁷ Mingka rie' sikura tau ri iyai injo appau, ”Ia appakaambula' mata tau buta, makala gele akkulle anggeokang, sa'genna gele mate tau inni?”

³⁸ Pela' pa'risi mu pole nyahana Isa, jari a'lampai mange ri kuburu injo. Kuburu injo se'rei liang batu nuritongko' pole batu.

³⁹ Lakua Isa, ”Palesangi batu panongko' inni!” Marta, uranna siana' tau mate injo, appau mange ri Ia, ”Karaeng, ia botto'mu, saba' patangallomu maeng matena.”

⁴⁰ Lakuamo Isa, ”Gelejua maemmu Kupau mange ri kau: Ampa tappa'ko lamujanjangi kala'biranna Allataala?”

⁴¹ Jari lapalesangimu batu panongko'na kuburu injo. Jari Isa ammongai nai' ri langi' na appaui, ”Amma, Nakke masa barakka' mange ri Kau, saba' Kau maeng appilangngeri ri Nakke.

⁴² Kuisse'i ma'nassana Kau sanging appilangngeri ri Nakke, mingka rikanara tau lohe ammenteng injo risiappuKu inni, Nakkemo appau, solanna tappa' ngase'i ma'nassana Kaumo maeng assuro ri Nakke.”

⁴³ Rimaenna appau appakonjo a'nga'ngarai Isa lalang risa'ra bakka', ”Lazarus, ansulu'moko mae!”

⁴⁴ Ansulu' toje'i Lazarus, bangkeng surang limanna ta'ka'ba' juapai kaeng balasung na rupanna ta'roko' juapai kaeng. Appaui Isa mange ri iyai, ”Pasalai kaeng rie' injo ri kalenna na lappasangi a'lampa.”

Passamaturukang larihuno Isa 11:45-57

⁴⁵ Lohe ri tau Yahudi battu injo attimporong ri saponna Maria na mata kalennamo lasa'bii apa numaeng lageokang Isa, tappa'i mange ri Ia.

⁴⁶ Mingka rie' todo' sikura tau ri iyai a'lampa mange ri tau Farisi injo na lalagarai mange ri iyai, apa numaeng lageokang injo Isa.

⁴⁷ Jari imang ponggaha injo na tau Farisi lakeo'i Hakking Agama injo laa'rappung na appau ngase'i, ”Apamo parallu rigeokang? Saba' tau injo sanna' lohemo nugele samara lageokang.

⁴⁸ Ampa ia ripaloga, injo sikuanna tau laa'jari tappa' ngase' mange ri Ia na battu ngase'i tau Roma injo laalle tampa' tangkasa'ta surang bangsata.”

⁴⁹ Mingka rie' se're tau ri iyai, iamo intu Kayafas, Imang Bakka' ri taung injo, appau mange ri iyai, ”Kau tide' pangisse'mu,

⁵⁰ na geleko ngu'rangi ma'nassana la'bi riekang matu-matunna ri kau, ampa se're tau mate lasalama' bangsata na sikuanna tau ri bangsata lamate.”

⁵¹ Passala injo lapaui gele nubattu ri kalenna to'jua, mingka assimpole se're Imang Bakka' ri taung injo na nguppai panjanjang ri Allataala ma'nassana Isa lamate solanna salama' bangsanai,

⁵² na gele sangga bangsa injo jua, mingka lapparappung todo'i na lalapasse'rei ana'-ana' Allataala nuta'bere-bere injo.

⁵³ Pakaramula allo injo assamaturu' ngase'mu lalahuno Isa.

⁵⁴ Injomo saba'na Isa gelemu a'bora tangnga ri a'rakanna tau Yahudi injo, mingka Ia a'lampai battu ri injo na mange ri tampa' ambani injo ri parang luara, rise're kota nuriare' Efraim, na ri injomo Ia ammari surang ana'-ana' gurunNa.

⁵⁵ Rihattu injo seppa'mu allo Pa'lappasanna tau Yahudi inni na lohemo tau battu ri kamponnai a'lampa mange ri Yerusalem lalatangkasi kalenna ri gelenapa allo Pa'lappasang injo.

⁵⁶ Iyai injo labojai Isa na ammenteng ngase'i lalang ri Sapo Allataala, allagara ngase'i, ”Anteekamua panguppamu? Makala rie' juai Ia mae konni ripassua'-suarang inni?”

⁵⁷ Rihattu injo pole sikonjo imang ponggaha na tau Farisi injo maemmu assare parenta solanna sikuanna tau laisse' injo ri antee mae Isa parallui lapappiissekang, solanna akkulle lajakkala Isa.