YAHYA 1 - Kitta' Passitallikang Bau KAREBA BAJI'

Pau Allataala a'jari rupatau 1:1-18

¹ Ri pakaramulana rie' Pau; Pau injo rie'i ri Allataala na Pau injomo Allataala.

² Ia ri pakaramulana rie'i ri Allataala.

³ Iangase'na Ia appaa'jari na ampa gele kanara ri Ia tide' nua'jari manna se're risikuanna numaeng injo ripaa'jari.

⁴ Lalang ri Ia rie' tallasa na tallasa injo assare sinara ri rupatau inni.

⁵ Sinara injo assau rikalammang na kalammang injo gele akkulle ambeta.

⁶ Rie'mo se're tau risuro ri Allataala, Yahya arenna;

⁷ ia rie'i assimpole se're sa'bi laassare passa'bi ripassala'na sinara injo, solanna patteteang ri iamo sikuanna tau a'jari tappa'.

⁸ Gele ia sinara injo, mingka ia parallui lapappisa'biang passala'na sinara injo.

⁹ Sinara nusitoje'na, nulalasinari injo sikuanna tau, rie'mu ri lino inni.

¹⁰ Ia rie'mu lalang ri lino inni na lino inni ripaa'jari kanara ri Ia, mingka Ia gelei riisse' ri lino inni.

¹¹ Ia rie'i mange rianunNa, mingka sikuanna tau anunNa gele latarima.

¹² Mingka risikuanna tau latarima injo risare kahasa ri Ia solanna a'jari ana'-ana' Allataala, iamo intu iyai tutappa' injo lalang ri arenNa;

¹³ iyaimo tau rianakang nugele battu ri rara iyareka battu ria'ra' rupatau, gele pole nubattu rikanara sinnana se're inni bura'ne, mingka nubattu ri Allataala.

¹⁴ Pau injo maemmu a'jari rupatau, na ammarii ripassa'lakanta, na ditte maemmu rijanjang kala'biranNa, iamo intu kala'birang nurisareang injo mange ri Ia assimpole ana' sitau-tau ri AmmanNa, rassi barakka' na katojekang.

¹⁵ Yahya assare passa'bi ripassala'Na na appau bakka'i, ”Iamo inni, nukukuangang injo rihattungku appau: Ribokoangangku larie'i Tumaeng riolomu rie', saba' Ia rie'mu rigelekupa rie'.”

¹⁶ Saba' battu rikarassianNa ditte ngase' inni maemmuki nguppa dahuang lohe rupanna barakka'.

¹⁷ Saba' hukkung Tora' ripassareangi patteteang ri Musa, mingka lasareki barakka' na katojekang nubattu ri Isa Almase.

¹⁸ Gele rie' manna se're tau maeng anjanjang Allataala, mingka Ana' sitau-tauna Allataala, Turie' injo ri rihaanna Amma, Iamo lapalahere Allataala.

Lapappisa'biangi kalenna Yahya 1:19-28

¹⁹ Iamo inni passa'bina Yahya rihattunna tau Yahudi rieki injo ri Yerusalem assuroi lohe imang surang tau Lewi lamange akkuta'nang ri ia, ”Inaiko? Kaumo Almase?”

²⁰ Lasa'bii kalenna na gele a'bura-bura, lakua, ”Gele nakke Almase.”

²¹ Maeng injo akkuta'nangimu isse' mange ri ia, ”Ampa appakonjo, inaiko? Apa kaumoka Elia?” Appihali pole Yahya, ”Gele!” ”Kaumoka nabbi larie' injo?” Lakuamo Yahya, ”Gele!”

²² Injomo saba'na lakuaimo mange ri ia, ”Inaiko? Saba' kambe inni parallukang assare pappihali mange ri tau lasuro injokang. Apa lamupau ri kalemmu?”

²³ Pappihalinna, ”Inakkemo sa'ra tau a'nga'ngara bakka' injo ri parang luara, pakalambusu pa'lalanganna Karaeng Allataala! Assimpole numaeng injo lapau Nabbi Yesaya.”

²⁴ Battu ri tau risuro injo, rie' todo' tau Farisi.

²⁵ Akuta'nangi ngase'mu mange ri ia, lakua, ”Ngura anrioko tau, ampa pade' gele kau Almase, gele todo'ko Elia, na kau gele nabbi larie' injo?”

²⁶ Appihali Yahya mange ri iyai, ”Nakke anrio tau ere jua kupake; mingka rie' tau ammenteng ripassa'lakammu tugele muisseki,

²⁷ iamo intu Ia, tulabattu injo ribokoangangku. Manna pallekkesi tulu' sandalaNa nakke gelea siratang.”

²⁸ Passala injo a'jari ri Betania ha'leanna Balang Yordan ri tampa'na Yahya anrio tau.

Yahya anjo'jo mange ri Isa 1:29-34

²⁹ Rimintara'namo mae Yahya lajanjangi Isa ambattu mange ri ia na lakuamo, ”Janjangimu Ana' jimbala'na Allataala, nulaappakalappasa injo kadorakaang ri lino inni.

³⁰ Iamo kukuangang rihattu kupauna: Ribokoangangku sallo' larie' se're tau labattu numaeng la'bi riolomo rie' na nakke, saba' Ia rie'mu ritide'ku juapa.

³¹ Manna nakke riolo gelei kuisse', mingka iamo injo tujungku rie' na anrio tau surangang ere, solanna Ia ripappiissekang ri Israele.”

³² Maenna injo assa'bi Yahya, lakua, ”Nakke maemmu kujanjang Nyaha Tangkasa naung battu ri langi' assimpole bangkeng bodo, na ammari ri baho ulunNa.

³³ Na manna nakke riolo gele todo'i kuisse', mingka Ia, tuassuro injo ri nakke lanrio tau surangang ere, maengi appau mae ri nakke: Ampa mujanjangi Nyaha Tangkasa injo naung rise're tau na ammari ri baho ulunNa, Iamo lanrio tau surangang Nyaha Tangkasa.

³⁴ Nakke maemmu kujanjang na assarea passa'bi: Iamo inni Ana' Allataala.”

Ana'-ana' gurung bungasa'na Isa 1:35-51

³⁵ Sungka'i mintara mae Yahya ammentengi pole ri injo assurangi rua ana' gurunna.

³⁶ Na rihattu injo lajanjammu Isa lumalo, jari lakuamo, ”Janjangimu Ana' Jimbala'na Allataala!”

³⁷ Ruaiya ana' gurung lalangngere apa nulapau injo, maeng injo a'lampaimu minahang ri Isa.

³⁸ Mingka assailei Isa mae riboko na lajanjangi ma'nassana iyai minahangi ri Ia jari lakuamo mange ri iyai, ”Apa mubojai?” Lakuaimo mange ri Ia, ”Rabbi (battuanganna: Guru), ri anteeKi mae ammari?”

³⁹ Appaui Isa mange ri iyai, ”Maeko lamujanjangi.” Mangei toje'mu na lajanjangi ri antee mae ammari, na allo injo assipammariangi surangang Ia; hattu injo barang latette' appa'mu.

⁴⁰ Rie' sala se'renna battu ri tau rua injo iamo intu Andreas, uranna siana' Petrus, sungka'i maeng lalangngere pauna Yahya minahangi ri Isa,

⁴¹ Andreasmo pakaramula laurangi assijanjang Simon, uranna siana', na appaui mange ri ia, ”Kambe tauppamu Almase (battuanganna: Kristus).”

⁴² Ia laurangi mange ri Isa. Isa latangarai na appaui, ”Kau Simon, ana'na Yahya, kau lariareng Kefas (battuanganna: Petrus).”

⁴³ Rimintara'namo mae latappuki Isa laa'lampa mange ri Galilea. Ia assiuppai Filipus na lakua mange ri ia, ”Minahangko ri Nakke!”

⁴⁴ Filipus assala'na battu ri Betsaida, kamponna Andreas na Petrus.

⁴⁵ Filipus laurangi assijanjang Natanael na lakua mange ri ia, ”Kambe tauppamu Ia nulapau injo Musa lalang ri kitta' Tora' surang ri kitta'na sikonjo nabbi.”

⁴⁶ Appaui Natanael mange ri ia, ”Apa lama'ringi rie' nubaji' battu ri Nazaret?”

⁴⁷ Lakuamo Filipus mange ri ia, ”Maeko na janjangi!” Isa lajanjangi Natanael ambattu mange riampi'Na, jari lapaumu passala'na ia, ”Janjangi, inni se're tau Israele toje', tide' leo'na lalang ri ia!”

⁴⁸ Lakua Natanael mange ri Ia, ”Anteekamua Kau na muisse'a?” Appihali Isa mange ri ia, ”Rigelemupa lakeo' Filipus, Kujanjammoko attiolung rahangang poong kaju ara.”

⁴⁹ Lakuamo Natanael mange ri Ia, ”Guru, Kau Ana' Allataala, Kaumo Karaeng ri taunna Israele!”

⁵⁰ Appaui Isa, ”Saba' Nakke appau ri kau, Kujanjangko attiolung rahangang poong kaju ara, jari tappa'ko? Kau laanjanjang passala nula'bi bakkakang battu ri injo.”

⁵¹ Jari lakuamo Isa mange ri ia, ”Sitoje'na Nakke appau mange ri kaui, kaumo laanjanjang langi' ta'bungkara na malaeka'na Allataala a'nai naung ri injo mange ri Ana' Rupatau.”