TITUS 3 - Kitta' Passitallikang Bau KAREBA BAJI'

Pappasang kala'busang 3:1-14

¹ Piu'rangilaloi iyai solanna tunru' ngase' mange ri pamarenta surang risikuanna tau kahasa, tunru' na sadia laanggeokang sikonjo jama-jamaang baji'.

² Andalalo iyai injo appitina, andalaloi iyai a'besere, sibaji'na iyai sanging baji' ampe na lumu nyahai mange risikuanna tau.

³ Saba' riolo ditte tallasa todo'ki lalang rikaba'gaang: gele mallang, ripa'lingu, a'jari atai rilohe rupanna napasu daa surang a'ra' rinudaa, tallasa lalang risipa' daa surang siriati, rassi pangalikkingang, assikalikkingang.

⁴ Mingka sungka'i kajanjangang kalammoranna Allataala, Pappasalama'ta, na pangamaseanNa mange ri rupatau inni,

⁵ rihattu injomo Ia appakasalama' ri ditte. Kasalamakang injo riuppai gele kanara panggeokang naba numaeng injo rigeokang, mingka kanara barakka'Na patteteang ri Nyaha Tangkasa nuassare injo mae riditte pambaui na kalaherang muliang passabakang rilabisssainta.

⁶ Nyaha Tangkasa injo ripassareangi mae ri ditte patteteang ri Isa Almase, Pappasalama'ta,

⁷ solanna ditte, a'jari tau ripa'naba kanara barakka' pangamaseanNa, nguppaki kaharisang lanarima tallasa mannannungang, assituru' lalang ripattajallianta.

⁸ Pau inni nabai na nakke a'ra'a solanna mupangajarang toje'i, solanna iyai tutappa' injomo mange ri Allataala apparri-parri toje'i anggeokang jama-jamaang baji'. Iamo injo nubaji' surang nurie' matu-matunna mange ri rupatau.

⁹ Mingka lilianglaloi pa'bi'naang nuriboja-boja injo na kaba'gaang, passilolongang risikonjo pinangka', pa'beserang surang passigagaang passala ri hukkung Tora', saba' iangase'na injo tide' matu-matuna na sanging nutide' tujunna.

¹⁰ Se're tau nyabaki pa'beserang, ampa maemmu pinsikali iyareka pinruang mupiu'rangi, sibaji'na dereko ri ia.

¹¹ Muisse'i ma'nassana tau assimpole injo sanna' toje' linguna na kadorakaannamo injo appassala ri kalenna.

¹² Rimaennamo kusuro Artemas iyareka Tikhikus mange ri kau, lassiriko apparri-parri rie' battu mae ri nakke ri Nikopolis, saba' maeng kutappakimu laammari ri tampa' injo sa'genna lappasa hattu bosi.

¹³ Tulung baji'laloi Zenas, guru riatorang injo, na Apolos, lalang ripa'lingkaanna, solanna iyai gelei kakurangang manna siso'di'.

¹⁴ Na lappasammu sikuanna tau riditte appilajara anggeokang jama-jamaang baji' laakkullei lasangkaki kaparalluang tallasa'na nupoong injo, solanna tallasa'na andai tide' hassele'na.

Sallang Pappikatu 3:15

¹⁵ Sallang battu risikuanna tau assurang injo nakke ri inni na pabattui sallangku mange ri iyai tungamaseang injo ri kambe lalang rikatappakang. Barakka' pangamaseang minahang ri kau ngase'!