TITUS 2 - Kitta' Passitallikang Bau KAREBA BAJI'

Nuparallu ri tau toa, taruna surang ata 2:1-10

¹ Mingka kau, mupangajarangi apa nuassituru' riajarang baji' inni:

² Bura'ne toa injomo sibaji'na akkullei lakahasai kalenna, rikangalikangi, rassii pangisse', nabai lalang ripangajarang, ripangamaseang surang kasabbarang.

³ Appakonjo todo'i bahine toa injomo, sibaji'na iyai tallasai assimpole tau pasambajang, andai appitina, gelei pa'hujaang, mingka lapangajarangi sikonjo passala nubaji'.

⁴ Na ri appakonjona ngajarai ri bahine lolo injo juapa ngamaseang ri bura'nenna surang ri ana'-ana'na,

⁵ tallasa rassii pangisse' na tangkasai, detto'i lapassilolongang pakkalabinianna, baji'i atina surang mallangi mange ri bura'nenna, solanna pau Allataala andai ritua-tuai ri tau maraeng.

⁶ Appakonjo todo'i ri tau longko intu; piu'rangilalo iyai injo solanna lakahasai kalenna lalang risikuanna passala.

⁷ Na paa'jari kalemmu laa'jari pinahangang ripanggeokang baji'. Sibaji'na kau lambusu surang attoje'-toje' rihattu ngajara'mu,

⁸ nabai na tide' sallaanna risikonjo pau-paumu sa'genna a'jarii siri' balimmu, saba' gele rie' nudaa akkulle lapappitinaang ripassala'ta.

⁹ Ata intu sibaji'na mallangi mange ri tau ngatainna lalang risikuanna passala na ringai ri iyai, akolalo anggaga,

¹⁰ ako ngalle salai, mingka sibaji'na sanging lambusu na mallang, solanna ri appakonjona iyai injo lalang risikonjo passala appakala'biri ajaranna Allataala, Pappasalama'ta.

Barakka' pangamaseang appakasalama' risikuanna rupatau 2:11-15

¹¹ Saba' barakka' pangamaseang Allataala nuappakasalama' injo risikuanna rupatau kajanjangammu.

¹² Ia ngajarai ri ditte solanna ditte ribokoi panggeokang daa injo surang sikonjo a'ra'na lino inni. Na laa'jaraki solanna ditte tallasa rassi pangisse', adele surang assambajang lalang ri lino konni-konnina.

¹³ Na konni-konnina ritajangmu laripa'rupana pattajallianta nurassi injo barakka' na pakajanjanganna kala'birang ri Allataala nusanna' bakka'na surang Pappasalama'ta Isa Almase.

¹⁴ Iamo maeng lapassareang kalenNa mae ri ditte laappakalappasa ri ditte battu riiangase'na sipa' daa na lapakatangkasaki laa'jari umma'Na, nusanging anggeokang nubaji'.

¹⁵ Pangajarangi iangase'na injo, pappiu'rangiangi surang pakatappa'laloi lalang risikonjo pangisse'mu. Andalalo rie' tau larapangko ki'di'.