ROMA 9 - Kitta' Passitallikang Bau KAREBA BAJI'

Tau ripile ri Allataala 9:1-29

¹ Nakke appau katojekang lalang ri Almase, gelea a'bura-bura. Ati ki'di'ku minahangi assa'bi lalang ri Nyaha Tangkasa,

² ma'nassana sanna' pa'risi'ku na sanging assi'na-si'nai atiku.

³ Ampa pole, a'ra'a busung na assisa'la' battu ri Almase kanara sikonjo urang siana'ku; julu kampongku.

⁴ Saba' iyai injo tau Israele. Iyaimo maeng rialle a'jari ana', na iyaimo pole maeng narima kala'birang, na sikonjo sapatta na hukkung Tora', na sambajang, na sikonjo talli'.

⁵ Iyaimo tui pappuwa-puwaang, tuappaturung injo Almase lalang ri tui rupatau, nurie' risikuanna. Iamo Allataala nuparallu ripakabakka' situli-tulinna. Aming!

⁶ Mingka, pau Allataala gele ma'ring buili. Saba' gele iangase'na tau assala'na injo battu ri Israele injo tau Israele,

⁷ na gele todo' iangase'na rirekeng tuina Abraham injo ana'na Abraham, mingka: ”Tau assala battu injomo ri Ishak larirekeng tuimu.”

⁸ Battuanganna: Gele sikonjo ana' rupatau injo ana'i ri Allataala, mingka ana'-ana' passitallikang injo jua riare' tui tau naba.

⁹ Saba' pau inni ngimbolongi sapatta: ”Rihattu assimpole innimo Nakke labattu pole na Sara lamana'mu se're ana' bura'ne.”

¹⁰ Mingka gele sangga injo jua. La'bi sinarai pole iamo intu Ribka tulatianangang injo battu rise're tau, iamo intu battu ri Ishak, ammanna puwa-puwata.

¹¹ Saba' rihattunna ana'-ana' injo gelepa rilaherang na gelepai anggeokang nubaji' iyareka nudaa, – solanna pattujunna Allataala ripassala pamileanNa ripakajarre', gele assituru' panggeokang, mingka assituru' pakkeo'Na –

¹² ripaui mange ri Ribka: ”Ana' lihua intu laa'jari ata ri arinna.”

¹³ Assimpole rie' ta'ukiri: ”Yakub Kukamaseangi, mingka Kukali'kingang Esau.”

¹⁴ Ampa appakonjoi, apamo a'ra' laripapau? Geleika adele Allataala? Gele ma'ring!

¹⁵ Saba' Ia appau mange ri Musa, ”Nakke lanaro pangamaseang mange ri inai Kukaa'raki Kupanaroi pangamaseang na Nakke laa'baji' nyaha mange ri inai Kukaa'raki Kupaa'baji' nyahai.”

¹⁶ Jari, passala injo gele assituru' ria'ra'na rupatau inni iyareka rikaresona tau inni, mingka mange ripangamaseanna Allataala.

¹⁷ Saba' Kitta' Tangkasa appau mange ri Firaun, ”Iamo injo saba'na Kuangka'ko, iamo intu solanna Kupappijanjangang kahasaKu lalang ri kau, na solanna arengKu ripappiissekang risibatu lino.”

¹⁸ Jari, Ia lataro pangamaseanna mange ri inai jua Ia lakaa'raki na Ia lapakaterasa atina mange ri inai jua Ia lakaa'raki.

¹⁹ Konni-konnina kau lamupaui mae ri nakke, ”Ampa appakonjo, rie' juapaka lalapassala Allataala? Saba' inai labaliang a'ra'Na?”

²⁰ Inaiko, oe rupatau, namugaga Allataala? Akkulle juaika turipaa'jari injo appau mange ri tuappaa'jarina, ”Ngura nakke mupaa'jari appakonjo?”

²¹ Ampa pabua' korong tana injo gele rie' kahasana ri tana a'jammenna, laa'bua' battu rirammaang assimpole lalapake ritujuang nula'biri na nuassimpole todo' injo lapake ritujuang nusamara?

²² Jari, ampa lalapappijanjangangi kuku'Na surang kahasaNa, Allataala lapassareangi kasabbarang bakka'Na mange risikonjo panaroang kuku'Na, numaeng lapakasadia injo rikamateang –

²³ mingka lalapappijanjangangi kabakkakang kala'biranNa mange risikonjo panaroang pangamaseanNa numaeng lapakasadia injomo tujunna kala'birang,

²⁴ iamo intu ditte, tumaeng rikeo' injo ri Allataala gele sangga ri tau Yahudi jua, mingka mange pole risikuanna tau maraeng,

²⁵ assimpole nulapau injo todo' Allataala lalang ri kitta' Nabbi Hosea, ”Tugele injo umma'Ku Kuare'i umma'Ku na tau gele injo bahaang a'jari bahaangi.”

²⁶ Na ri tampa', ri antee mae laripau mange ri iyai, ”Kau inni geleko umma'Ku,” ri injomo laripau mange ri iyai, ”Ana'-ana' Allataala attallasa injo.”

²⁷ Na appaui Yesaya ripassala'na Israele, ”Manna injo jumallana ana' Israele assimpole bone lohena ribiring tamparang, mingka sesanna jua laripakasalama'.

²⁸ Saba' apa numaeng lapau Allataala, lalageokangi Karaeng rate ri lino inni, sangka'i na seppa'mu.”

²⁹ Assimpole nulapau injo Yesaya ri gelenapa injo, ”So'di injo Allataala sibatu lino gele ambokoi tui ri ditte, ditte sallomuki a'jari assimpole Sodom na assimpole Gomora.”

Kasalamakang risikuanna tau maraengang surang kalinguanna tau Israele 9:30–10:3

³⁰ Ampa appakonjo, apamo a'ra' laripau? A'nassai, sikuanna tau maraeng gele injo a'boja kanabaang, maeng nguppamu kanabaang, iamo intu kanabaang assituru' rikatappakang.

³¹ Mingka tau Israele, manna injo a'bojai hukkung nuappabattu injo kanabaang, gelei ambattu mange ri hukkung injo.

³² Ngura nagele? Saba' tau Israele inni a'bojai kanabaang gele assituru' katappakanna, mingka assituru' panggeokanna. Iyai injo tatto'roi ri batu patatto'roang,

³³ assimpole rie' ta'ukiri: ”Sitoje'na, Nakke lanaro ri Sion se're batu pa'bitantangang na se're batu bakka'i laappakaa'dappe'i tau, na inai tappa' mange ri Ia, gele laripakasiri'.”