ROMA 8 - Kitta' Passitallikang Bau KAREBA BAJI'

Tallasa ri Nyaha Tangkasa 8:1-17

¹ Ri appakonjonamo, konni-konnina gele sikalimo rie' hukkungang mange ri iyai turie' injo lalang ri Isa Almase.

² Saba' hukkung Nyaha Tangkasa nuassare injo tallasa maeng lapakalappasako battu ri hukkung kadorakaang na hukkung kamateang lalang ri Almase.

³ Saba' apa nugele ma'ring lageokang hukkung Tora' kanara tide' pakkullena ria'ra' rupatau, maeng lageokammu Allataala. Rilasurona Ana'Na a'jari assimpole rupatau doraka, na lallappasi kadorakaang, Ia maeng assaremu hukkungang mange rikadorakaang rie' injo lalang ri rupatau inni,

⁴ solanna pangerana hukkung Tora' ripa'rupai lalang ri ditte ri tugele injo attallasa assituru' a'ra'na rupatau, mingka assituru' a'ra'na Nyaha Tangkasa.

⁵ Saba' sikuanna tau attallasa injo assituru' a'ra'na rupatau, nulapikkiri sikonjo passala nubattu ria'ra'na rupatau; sikuanna tau attallasa injo assituru' Nyaha Tangkasa, nulapikkiri sikonjo passala nubattu ri Nyaha Tangkasa.

⁶ Saba' a'ra'na rupatau inni iamo intu kamateang, mingka a'ra'na Nyaha Tangkasa iamo intu tallasa na dame salehangang.

⁷ Saba' a'ra'na rupatau inni iamo intu passibaliang ri Allataala, saba' a'ra' injo gele tunru' mange ri hukkung Allataala; passala inni toje'i gele ma'ring mange ri ia.

⁸ Sikuanna tau attallasa lalang ria'ra'na rupatau, gele ma'ring naba mange ri Allataala.

⁹ Mingka geleiko attallasa lalang ria'ra'na rupatau, passangadinna lalang ria'ra'na Nyaha Tangkasa, ampa toje'i Nyaha Tangkasa'Na Allataala ammari lalang ri kau. Mingka ampa rie' tugele ngampunnai Nyaha Almase, ia gele anunna Almase.

¹⁰ Mingka ampa Almase rie' lalang ri kau, batangkale inni toje'i lamate kanara kadorakaang, mingka nyaha iamo intu katallasang rikanara kanabaang.

¹¹ Ampa Nyaha Tangkasa'Na Almase, ammari lalang ri kau, injo Ia, tumaeng lapakaattallasa injo muliang Isa Almase battu ritangnga-tangngana tau mate, lalapakaattallasa todo'i batangkalemmu nulamate intu ri Nyaha Tangkasa'Na nuammari injo lalang ri kau.

¹² Jari, Urang siana', dittemo intu tau kainrangang, mingka gele mange ria'ra' rupatau, solanna tallasaki assituru' a'ra' rupatau.

¹³ Saba' ampa tallasa'mu assituru' a'ra' rupatau, lamateko intu; mingka ampa ri Nyaha Tangkasa na mupakamate sikonjo a'ra' panggeokang batangkalemmu, injo laattallasako.

¹⁴ Sikuanna tau, turiurang injo ri Nyaha Tangkasa'Na Allataala, iamo ana' ri Allataala.

¹⁵ Saba' gelemoko narima nyaha langatai nulapaa'jari injoko pole malla', mingka maemmoko narima Nyaha Tangkasa nulapaa'jari injoko ana' ri Allataala. Ri Nyaha Tangkasa injomo ditte a'nga'ngara: ”O Abba, o Amma!”

¹⁶ Nyaha Tangkasa injomo assa'bi surang nyahata ma'nassana dittemo ana'-ana'na Allataala.

¹⁷ Ampa dittemo ana', dittemo intu languppa dahuang, battuanganna tau lanarima risikonjo nulasappattaang Allataala, nularitarima injo surangi Almase, iamo intu ampa sissaki surangang Almase, solanna ditte ripakala'biri todo' surangang Almase.

Pattajallianna ana'-ana'na Allataala 8:18-30

¹⁸ Saba' kujarreki ma'nassana kamarasaiang rihattu konni-konnina gele akkulle ripassimpole surangang kala'birang nularipappijanjangang injo mae ri ditte.

¹⁹ Saba' sarro pa'bojana sikonjo mahallo' attajang hattunna ana'-ana' Allatala ripappijanjangang.

²⁰ Saba' sikonjo mahallo' maeng ripatunru' ngase'mu mange rinutide' injo matu-matunna, gele ria'ra' kale-kalena jua, mingka ria'ra'Na, tumaeng lapatunru' injo,

²¹ mingka lalang pattajalliang, saba' mahallo' injo laripakalappasa todo'i battu ripangatainna kamateang na antama'i lalang rikalappasang na kala'biranna ana'-ana' Allataala.

²² Saba' ditte riisse'i ma'nassana sa'genna hattu inni sikuanna mahallo' assurang-surangi a'nganro na assurang-surangi appisa'ring pa'risi pamana'.

²³ Gele sangga iyai jua, mingka ditte pole tumaeng injo narima barakka' pangamaseang ana' lihua ri Nyaha Tangkasa, ditte a'nganro todo'ki lalang ri ati na ritajangi palarialleta assimpole ana', iamo intu pallappasinna batangkalenta.

²⁴ Saba' ditte ripakasalama'ki lalang ripattajalliang. Mingka pattajalliang kajanjangang injomo, gelemo pattajalliang intu; saba' anteekamua tau inni latajalli juapa rinukajanjangang injomo?

²⁵ Mingka, ampa tajalliki rinugele injopa rijanjang, injo ritajangi lalang kasabbarang.

²⁶ Appakonjo todo'i Nyaha Tangkasa lasokongki lalang rikalammaanta; saba' ditte gelei riisse', anteekamua sitoje'na ngera dowaang; mingka Nyaha Tangkasamo lapangera dowaangki mange ri Allataala surangang pa'nganroang nugele injo akkulle ripapau.

²⁷ Na Allataala nulasalidiki injo batenta, laisse'i pattujunna Nyaha Tangkasa injo, iamo intu ma'nassana Ia, assituru' a'ra'na Allataala, ngera dowaangi tujunna sikuanna tau tangkasa.

²⁸ Ditte konni-konnina riisse'i ma'nassana Allataala minahangi anjama lalang risikuanna laappabattu kabajikang mange ri iyai tungamaseang injo ri Ia, iamo intu mange risikuanna tau rikeo' injo assituru' surangang naha-nahanna Allataala.

²⁹ Saba' sikuanna tau ripile minang ripakaramulana, maeng ripattantu todo'i minang ripakaramulana laa'jari assimpole ja'bangang Ana'Na, solanna Isa, Ana'Na injo, a'jari lihua risikonjo urang siana'.

³⁰ Iyai turitantuang injo ri Allataala minang ripakaramulana, iyai todo'mo rikeo'. Iyai turikeo' injo, iyai todo'mo ripa'naba. Iyai turipa'naba injo ri Allataala, iyai todo'mo ripakala'biri ri Allataala.

Jarre' rikatappakang 8:31-39

³¹ Injomo saba'na, apamo laripau ri sikuanna passala injo? Ampa Allataala rie'i riditte, inaimo labaliangki?

³² Ia, tugele injo lapassayang Ana' kalenNa, mingka Ia lapassareangi mae ri ditte ngase', anteekamua lama'ring Ia gele lapasareang ngase' pangamaseanna mae ri ditte assurang ri Ia?

³³ Inaimo akkulle lagagai sikuanna tau lapile Allataala? Allataala, turipa'naba ri Allataala? Inaimo laassare hukkungang mange ri iyai?

³⁴ Isa Almase, maemmu mate? Na la'bipa pole; maeng attallasamo muliang, na attolong todo'i ri sa'ri kananna Allataala, na laa'jari Urang ri ditte?

³⁵ Inaimo lalapassisa'lakangki battu ripangamaseanna Almase? Panja'ja' iyareka kamarasaiang iyareka pama'ri'-ma'risi, iyareka kalarakang iyareka kageleang make pakeang, iyareka bala iyareka pa'dang?

³⁶ Assimpole rie' ta'ukiri: ”Kanara ri Kau rie'kang lalang ribala kamateang siallo bujuru, kambe rirapang assimpole sikonjo jimbala sumbeleang.”

³⁷ Mingka lalang ri iangase'na injo la'bipa ditte battu risikuanna tau ambeta, kanara Ia maeng lakamaseangki.

³⁸ Saba' kukajarreki ma'nassana baji' mate iyareka tallasa, baji' malaeka'-malaeka' iyareka sikonjo pamarenta, baji' nurie' rikonni-konnina iyareka rinularie' injo sallo',

³⁹ iyareka sikonjo kakahasaang, baji' nurie' injo rate iyareka nurie' rahangang, iyareka sikonjo mahallo' maraeng, gelei akkulle lapassisa'la'ki battu ripangamaseanna Allataala, nurie' injo lalang ri Isa Almase, Karaengta.