ROMA 7 - Kitta' Passitallikang Bau KAREBA BAJI'

Battuanna Hukkung Tora' 7:1-12

¹ Apa gele muisseki, urang siana', – saba' nakke a'bisara mange ri tungisseki injo hukkung – ma'nassana hukkung injo lakahasa rise're inni tau ampa attallasa juapai tau injo?

² Saba' se're inni bahine tassikko'i ri hukkung mange ribura'nenna ampa attallasa juapai bura'nenna. Mingka ampa matemu bura'nenna, injo lappasamu battu ri hukkung lasikko' injoi ribura'nenna.

³ Jari, riattallasa'na juapa bura'nenna rirapangi assangkili, ampa ia a'jari bahinenna tubura'ne maraeng; mingka ampa matemu bura'nenna injo, ia lappasamu battu rihukkung, jari gelemu assangkili, ampa ia a'jari bahinenna tubura'ne maraeng.

⁴ Injomo saba'na, urang siana'ku, kau maeng matemoko ri hukkung Tora' lalang ri kalenna Almase, solanna kau a'jari anunna tau maraeng, iamo intu anunna Isa, tumaeng ripakaattallasa injo muliang battu ritangnga-tangngana tau mate, bisannabali ditte ripa'hasselangi Allataala.

⁵ Saba' rihattunta juapa tallasa lalang ria'ra' kalenta, hawa napasu kadorakaang, nuripa'naba ri hukkung Tora', appageo' risikonjo batangkalenta, solanna ditte a'hassele rikamateang.

⁶ Mingka konni-konnina ditte maeng ripakalappasaki battu ri hukkung Tora', saba' maeng matemuki ri ia, ritulagurung injoki, sa'genna ditte konni-konnina anjampangiki lalang ripanggeokang bau assituru' Nyaha Tangkasa na gele lalang ripanggeokang assimpole riolo assituru' hurupu'na hukkung Tora' inni.

⁷ Ampa apakonjo, apamo a'ra' laripau? Apa hukkung Tora' injo kadorakaang? Gelei appakonjo! Sibale'na, mingka patteteang ri hukkung Tora'mo nakke ngisse' kadorakaang. Saba' gele todo'i kuisse' apa injo allalo a'ra', ampa gele lapau hukkung Tora': ”Akolalo piti a'ra'-a'raki!”

⁸ Mingka lalang riparenta injo kadorakaang nguppa pa'lalangang laappaenteng ri atiku lohe rupanna a'ra'; saba' ampa gele rie' hukkung Tora' matei kadorakaang injo.

⁹ Riolo gele rie' hukkung Tora', nakke attallasa. Mingka, sungka'i rie'mo parenta injo, kadorakaang injo pakaramulamu attallasa,

¹⁰ sibale'na nakke mate. Parenta nusitoje'na langerang mange ritallasa, a'rupa ri nakke sitoje'na ngerangi mange rikamateang.

¹¹ Saba' lalang riparenta injo, kadorakaang nguppai hattu laa'bura-bura ri nakke na surangang riparenta injomo lalahunoa.

¹² Jari, hukkung Tora' intu nutangkasa, na parenta injo tangkasa todo'i, nabai surang baji'i.

Karesona hukkung Tora' na kadorakaang 7:13-25

¹³ Ampa appakonjo, apa nubaji' injo laa'jari kamateang ri nakke? Gelei appakonjo! Mingka solanna a'butti ma'nassana iamo intu kadorakaang, jari kadorakaang injo lapake nubaji' inni laappabattu kamateang mae ri nakke, solanna battu riparenta injo kadorakaang pela' a'rupa assimpole kadorakaang.

¹⁴ Saba' ditte ri isse'i ma'nassana hukkung Tora' intu sipa'na gele kajanjangang ri mata kasara, mingka nakke rupatau lamma, ribalukang lalang kahasa kadorakaang.

¹⁵ Saba' apa nukugeokang injo gele kuisse'. Saba' gele apa nukukaa'raki injo kugeokang, mingka apa nukukali'kingang injo, iamo injo kugeokang.

¹⁶ Jari, ampa kugeokangi apa nugele injo kukaa'raki, kuioi ma'nassana hukkung Tora' intu baji'i.

¹⁷ Ampa appakonjo gelemo nakke anggeokang, mingka kadorakaang rie' injomo ri nakke.

¹⁸ Saba' nukuisse' ma'nassana ri nakke, iamo intu lalang ri nakke assimpole sipa' rupatau, gele rie' manna se're nubaji'. Saba' a'ra' rinubaji' injo rie'i ri nakke, mingka gelea anggeokang nubaji'.

¹⁹ Saba' gele apa nukaa'raki, iamo baji', kugeokang, mingka ampa nugele kukaa'raki, iamo daa, kugeokang.

²⁰ Jari, ampa nakke anggeokang nugele kukaa'raki, injo gele todo'mo nakke anggeokang, mingka kadorakaang rie' injo ammari ri nakke.

²¹ Appakonjomo kuuppa ri hukkung inni: Ampa nakke a'ra' anggeokang nubaji', injo nudaa rie' ri nakke.

²² Saba' lalang ri batengku kungai hukkung Allataala,

²³ mingka lalang ri batangkalengku kuisse'i rie' hukkung maraeng akkareso labaliangi hukkung akkala pikkirangku na nakke lapaa'jari tahangang kadorakaang nurie' injo lalang ri batangkalengku.

²⁴ Nakke, rupatau silaka! Inaimo lalapakalappasaa battu ri batangkale lamate inni?

²⁵ Sukkuru mange ri Allataala patteteang ri Isa Almase, Karaengta! Jari nakkemo anjampangi hukkung Allataala sangga ri akkala pikkirangku, na assimpole rupatau lamma nakke anjampangi kadorakaang.