ROMA 6 - Kitta' Passitallikang Bau KAREBA BAJI'

Mate na attallasa muliang surangang Almase 6:1-14

¹ Ampa appakonjo, apamo a'ra' laripau? Makala akkullejuaki sannang lalang rikadorakaang, solanna pela' attamba lohei pangamaseang injo?

² Gelei appakonjo! Gelejua ditte matemuki rikadorakaang, anteei kamua ditte naakkulle juapaki attallasa ri injo?

³ Iyareka geleka muisse' ma'nassana ditte ngase' inni maeng ririomuki lalang ri Isa Almase na ririo todo'ki lalang rikamateanNa?

⁴ Ri appakonjona, ditte maeng ripassiloangangki surangang Ia ripanrio lalang rikamateanNa, solanna, assimpole Almase maeng ripakaattallasa muliang battu ritangnga-tangngana tau mate kanara rikala'birang Amma, appakonjo todo'i ditte ripakama'ringki attallasa lalang rikatallasang nubau.

⁵ Saba' ditte maeng a'jari se'remuki surangang nuassimpole rikamateanNa, iamo injo ditte a'jari se're todo'ki nuassimpole rikatallasanNa.

⁶ Saba' riisse'i ma'nassana rupatau sallota minahangi risalli', solanna tappela' kahasana batangkale dorakata, bisannabali andai ripaa'jari ata muliang kalenta mange rikadorakaang.

⁷ Saba' inai maeng mate, ia lappasamu battu rikadorakaang.

⁸ Jari, saba' ditte maemmuki mate surangang Almase, ditte tappa'ki ma'nassana laattallasa todo'ki surangang Ia.

⁹ Saba' ditte riisse'i ma'nassana Almase rimaeng attallasa'namo muliang battu ritangnga-tangngana tau mate, Almase gelemu lamate muliang: Kamateang gelemu a'kahasa ri Ia.

¹⁰ Saba' Ia mate, iamo intu mate mange rikadorakaang, sikali juai situlusu'na, mingka Ia attallasai, iamo intu tallasa ri Allataala.

¹¹ Appakonjomu sibaji'na panguppamu: Ma'nassana maeng matemoko rikadorakaang, mingka attallasako ri Allataala lalang Isa Almase.

¹² Injomo saba'na, sibaji'na kadorakaang injo andamu a'kahasa muliang lalang ri kalemmu nulamate intu, solanna gele muturuki nulangai injo.

¹³ Andalaloko passareangi kalemmu mange rikadorakaang lalapake assimpole poke risipa' daa, mingka passareangi kalemmu mange ri Allataala assimpole sikuanna tau, maeng mate injomo riolo, mingka konni-konnina attallasai muliang. Na passareangi kalemmu mange ri Allataala lalapaa'jari poke rikatojekang.

¹⁴ Saba' kadorakaang gelemu lakahasa muliang ri kaui, saba' gelemoko rie' lalang ri hukkung Tora', mingka lalang ribarakka' pangamaseang.

Rua rupanna pangatai 6:15-23

¹⁵ Jari anteei kamua? Apa laa'bua' juapaki kadorakaang, saba' gelemuki rie' rahangang kahasana hukkung Tora', mingka rahangang kahasana barakka' pangamaseang? Gelei appakonjo!

¹⁶ Apa gelei muisse' ma'nassana ampa mupassareang kalemmu mange rise're tau assimpole ata lamuturuki, a'jari atannamoko tau injo, nuparallu muturuki, baji' injo rikadorakaang nulaerang injoko mange rikamateang, baji' injo patunru' nulaerang injoko mange rikanabaang?

¹⁷ Mingka sukkurumoko mange ri Allataala! Riolo kau ata kadorakaang, mingka konni-konnina kau surangang sisukku'na atimu maeng muturuki pangajara numaeng ripabattu injo mange ri kau.

¹⁸ Maeng ripakalappasimoko battu rikadorakaang na a'jari ata kanabaang.

¹⁹ Assimpole rupatau kupau passala inni kanara lammamu assimpole rupatau. Saba' assimpole kau maeng mupassareangi batangkalemmu a'jari ata rinudaa na kadorakaang nulalaerangiko mange rikadorakaang, appakonjo todo'i kau konni-konnina parallui mupassareang batangkalemmu a'jari ata kanabaang nulalaerangi injoko mange rikatangkasang.

²⁰ Saba' rihattummu a'jari ata kadorakaang, kau lappasako battu rikanabaang.

²¹ Hassele apamo akkulle mualle battu ri iangase'na nulapassabaki injoko a'jari siri' konni-konnina? Kala'busang ri iangase'na iamo intu kamateang.

²² Mingka konni-konnina, sungka'mu ripakalappasa battu rikadorakaang na sungka'mu a'jari ata ri Allataala, nguppamoko hassele lalaerangko mange rikatangkasang na kala'busanna iamo intu tallasa mannannungang.

²³ Saba' sahala kadorakaang iamo intu kamateang; mingka barakka' pangamaseang ri Allataala iamo intu tallasa mannannungang lalang ri Isa Almase, Karaengta.