ROMA 5 - Kitta' Passitallikang Bau KAREBA BAJI'

Hassele pappa'naba 5:1-11

¹ Injomo saba'na, ditte turipa'naba injo kanara tappa', ditte attallasaki lalang dame salehangang surangang Allataala patteteang ri Karaengta, Isa Almase.

² Patteteang ri Ia ditte nguppa todo'ki pa'lalangang laantama' rikatappakang ripangamaseang inni. Ri pangamaseang innimo ditte ammenteng na ditte a'bangga-bangga lalang ripattajalliang lanarima kala'birang ri Allataala.

³ Gele sangga injo jua. Mingka ditte a'bangga-bangga todo'ki lalang rikasissaanta, saba' ditte riisse'i ma'nassana kasissaang injo appakarie' kasabbarang,

⁴ na kasabbarang injo appakaammumba terasa ripasso'ri na terasa ripasso'ri appakaammumba pattajalliang.

⁵ Na pattajalliang injo gele appakaammassa nyaha, saba' pangamaseanna Allataala maeng lapantama'mu lalang ri atita battu ri Nyaha Tangkasa numaeng lapassareang injo mae ri ditte.

⁶ Saba' rihattunta juapa lamma, Almase maemmu lakamatei sikuanna tau doraka rihattu nuritantuang injo ri Allataala.

⁷ Saba' gele lo'moro se're inni tau a'ra' mate kanara tau adele – mingka ma'ringi kanara tau baji' inni rie' tau barani a'ra' lakamatei.

⁸ Mingka, Allataala lapappijanjangangi mae ri ditte pangamaseanNa lalang ripassala inni: Rihattunta juapa doraka, Almase maeng lakamateiki.

⁹ La'bipapole, saba' ditte konni-konnina maeng ripa'nabamuki kanara raraNa, ditte attantumu laripakasalama' patteteang ri Ia battu rikuku'na Allataala.

¹⁰ Saba' ampa ditte, rihattunta juapa gele a'baji', ripa'dameangki surangang Allataala patteteang rikamateanna Ana'Na, la'bipa pole ditte, tukonni-konnina maeng ripa'dameammuki, attantumu laripakasalama' rikanara attallasa'Na!

¹¹ Gele sangga injo jua! Mingka ditte a'bangga-banggaki lalang ri Allataala patteteang ri Isa Almase, Karaengta, saba' patteteang ri Iamo ditte riuppai pa'dameang injo.

Adam na Almase 5:12-21

¹² Injomo saba'na, assimpole kadorakaang injo antama' lalang ri lino inni patteteang rise're tau, na patteteang rikadorakaang injo todo'mo kamateang, appakonjomu kamateang injo a'lele mange risikuanna tau, saba' sikuanna tau maengi a'bua' kadorakaang.

¹³ Saba' rigelenapa rie' hukkung Tora', kadorakaang rie'mu ri lino. Mingka kadorakaang injo gelejuai rirekeng ampa tide' hukkung Tora'.

¹⁴ Manna mamo appakonjo, kamateang a'kahasa battu rijammanna Adam sa'genna rijammanna Musa, injo pole tugele injo a'bua' kadorakaang assimpole numaeng lageokang injo Adam, nua'jari ja'bangang ri Ia ritularie' injo.

¹⁵ Mingka pangamaseang Allataala gele assimpole kasalaanna Adam. Saba', ampa passabakang kasalaanna se're tau na lohe tau a'jari maeng a'dappe' antama' lalang rikahasa kamateang, sukku' la'bi bakkakanna pole pangamaseanNa na barakka'Na, nulato'lokang injo mae rilohe tau kanara rise're tau, iamo intu Isa Almase.

¹⁶ Na pangamaseang injo gele assillohe surangang kadorakaang se're tau. Saba' pangadelang mae rise're kasalaang injo maeng appakaammumbamu hukkungang, mingka pangamaseang ripassareang injo mange rilohe kasalaang appakaammumba kanabaang.

¹⁷ Saba' ampa kasalaanna se're tau, kamateang maemmu a'kahasa patteteang ri tau se're injo, jari la'bipa pole iyai, tumaeng narima injo lohe pangamaseang surang barakka' pappa'naba na laattallasai na lakahasai kanara ri tau se're injo, iamo intu Isa Almase.

¹⁸ Jari, assimpole patteteang rise're kasalaang lohe tau nguppa hukkungang, appakonjo todo'i patteteang rise're panggeokang kanabaang lohe tau nguppa kanabaang laattallasa.

¹⁹ Saba', assimpole patteteang rikanara gelena tunru' se're tau jari lohemo tau a'jari doraka, appakonjo todo'i pateteang tunru'na se're tau na lohe tau a'jari tau naba.

²⁰ Hukkung Tora' rie' mae, na pela' lohemo kasalaang a'jari; mingka ri antee-tee mae attamba lohe kadorakaang, ri injomu sanna' lohena pangamaseang a'jari,

²¹ solanna, assimpole kadorakaang lakahasa lalang ri linona kamateang, appakonjo todo'i pangamaseang lakahasa patteteang pappa'naba laattallasa mannannungang, rikanara Isa Almase, Karaengta.