ROMA 3 - Kitta' Passitallikang Bau KAREBA BAJI'

Kala'bianna tau Yahudi na Pangamaseanna Allataala 3:1-8

¹ Ampa appakonjoi, apamo kala'bianna tau Yahudi inni na apamo matu-matunna sunna' injo?

² Sanna' lohena surang lohe todo' passala. Makasere: Saba' mange ri iyaimo ripitanjoiang pauna Allataala.

³ Jari anteekamua, ampa ritangnga-tangnganai rie' tau gele mallang, akkulle juaika pagelena mallang injo appakabuili kamallanganna Allataala?

⁴ Gelei akkulle! Sibale'na: Allataalamo intu naba, na sikuanna rupatau sanging pabura-bura, assimpole rie' ta'ukiri: ”Solanna toje'i kanabaamMu lalang risikonjo pappauMu, na ambeta, ampa Kau riadeli.”

⁵ Mingka ampa kageleanta naba appajo'jo' rikanabaang Allataala, apamo laripau? Nakke appau assimpole rupatau – geleika adele Allataala? – ampa Ia lapappijanjangang kuku'Na?

⁶ Gelei akkulle! So'di appakonjo, anteekamua Allataala akkulle langadeli ri lino inni?

⁷ Mingka ampa kanabaang Allataala ribura-buraku pela' allua-luai rikala'biranNa, ngura lariadeli juapa assimpole tau doraka?

⁸ Ngura ditte gele ripau, ”Maeki anggeokang nudaa, solanna nubaji' lapakaammumba? Rie' toje' pappitina ri tau appau injo ma'nassana ditte paralluki appau appakonjo.” Tau assimpole injo inni siratangi languppa hukkungang.

Sikuanna rupatau sanging tudoraka 3:9-20

⁹ Jari, anteekamua? Makalarie' kala'biranta battu ri tau maraeng? Tide' manna siso'di'. Saba' sumpae' ditte maemmuki rija'jakang baji' tau Yahudi, iyareka tau Yunani ma'nassana sikuanna rie'i lalang kahasa kadorakaang,

¹⁰ assimpole rie' ta'ukiri: ”Tide' tunaba, gele rie' manna se're tau.

¹¹ Tide' manna se're tau rie' akkala baji'na, tide' manna se're tau a'boja Allataala.

¹² Iangase'na tau maeng ngase'mu a'lili, iyai ngase' tide' matu-matunna, tide' tau anggeokang nubaji', tide' manna se're tau.

¹³ Karro'-karro'nai assimpole kuburu a'nganga, lilanai ambuju'-buju', rimori-morina rie' numoso.

¹⁴ Babanai rassi sapatta bura-bura,

¹⁵ Bangkenna lassiri lamange appasulu' rara.

¹⁶ La'boro surang kamateang. Labokoi ripa'lalangannai,

¹⁷ na pa'lalangang kadameang gele laisseki;

¹⁸ ri iyai tide' malla' mange ri Allataala.”

¹⁹ Mingka ditte ri isse'i ma'nassana sikuanna nurie' ta'ukiri lalang ri Kitta' Tora' risareangi mange ri tau attallasa injo lalang ri hukkung Tora', solanna kajempangang sikonjo baba na solanna sibatu lino rie'i lalang ri pangadelanna Allataala.

²⁰ Saba' gele rie' manna se're tau akkulle ripa'naba ri a'rakanna Allataala kanara rianggeokanna jua hukkung Tora', nakanara ri hukkung Tora'mo tau inni ngisse' kadorakaang.

Rupatau inni ripa'nabai kanara tappa' 3:21-31

²¹ Mingka konni-konnina, manna tide' hukkung Tora' pappa'nabana passabakang ri Allataala maemmu ripappijanjangang, assimpole nulasa'bikang injo lalang ri Kitta' Tora' na Kitta'na sikonjo nabbi,

²² iamo intu pappa'naba passabakang ri Allataala patteteang tappa' lalang ri Isa Almase mange risikuanna tau tappa'. Saba' tide' passisalaang.

²³ Saba' sikuanna tau maeng ngase'mu a'bua' kadorakaang na labokoi kala'biranna Allataala,

²⁴ na saba' ripangamaseanNa maeng risareang kale-kale pappa'naba patteteang pallappasi lalang ri Isa Almase.

²⁵ Isa Almase maeng ripattantui ri Allataala laa'jari patteteang passidameang passabakang ri tappa', lalang ri raraNa. Passala inni lageokangi Allataala lalapappijanjangang kaadelanNa, saba' Ia maemmu lapalalo sikonjo kadorakaang a'jari riolo rihattu kasabbaranNa.

²⁶ PattujunNa iamo intu lapappijanjangangi kaadelanNa rikonni-konnina ma'nassana Ia adele na appa'naba todo'i tau tappa' injo mange ri Isa.

²⁷ Ampa appakonjoi, apamo pammentenganta laripa'bangga-banggaang? Tide'! Apa laribua' pappoongang? Assituru' panggeokang baji'? Gele, passangadinna katappakang!

²⁸ Saba' kambe jarre'kang, ma'nassana rupatau inni ripana'bai kanara tappa', gele kanara anggeokanna hukkung Tora'.

²⁹ Iyareka apa Allataala injo Allataalana jua tau Yahudi? Gelejua Ia Allataala todo'i risikuanna tau maraeng? Iya, nabai. Ia Allataala todo'i risikuanna tau maraeng!

³⁰ Ampa se're jua Allataala, Ia laappa'nabai baji' risikuanna tau assunna' kanara tappa', iyareka risikuanna tau gele injo todo' assunna' kanara tappa'.

³¹ Ampa appakonjoi, makala kambe tabokoi hukkung Tora' kanara tappa'? Tide' manna siso'di'! Sibale'na, kambe pela' tapakajarre'i.