ROMA 16 - Kitta' Passitallikang Bau KAREBA BAJI'

Sallang pappikatu 16:1-16

¹ Kuerai pa'mai' baji'mu mange ri Febe, urang siana' bahine julu katappakanta tuanjampangi injo jamaah ri Kenkrea,

² solanna ia mutarima baji' lalang ri Karaeng, appaanteekamua sibaji'na mange risikuanna tau tangkasa, na sarei sokongang mange ri ia ampa parallui. Saba' ia maeng todo'i assare sokongang mange ri lohe tau, mae pole ri nakke.

³ Pabattui sallangku mange ri Priskila na ri Akwila, urang-urang sipanjamaangku lalang ri Isa Almase.

⁴ Iyai injo maeng lapassareangi nyahana rikatallasangku. Mange ri iyai gele nakke jua attarimakasi, mingka pole sikonjo jamaah gele injo Yahudi.

⁵ Sallangku todo' mange ri jamaah rie' injo ri saponna. Sallangku mange ri Epenetus, urang siana' kukamaseang injo, tau bungasa injo tappa' mange ri Almase ri tana Asia.

⁶ Sallangku mange ri Maria, tau anjama terasa injo ri kaui.

⁷ Sallangku mange ri Andronikus na Yunias, sikonjo urang siana' julu kampongku, tumaeng injo ritarungku surangang nakke, iamo intu sikuanna tau rikangalikang risikonjo suro na maeng tallasai lalang ri Almase rioloangangku.

⁸ Sallangku mange ri Ampliatus tukukamaseang injo lalang ri Karaeng.

⁹ Sallangku mange ri Urbanus, urang sipanjamaangku lalang ri Almase, na sallangku mange ri Stakhis tukukamaseang injo.

¹⁰ Sallangku mange ri Apeles, tujarre' injo pa'bitantanna lalang ri Almase. Sallangku mange ri iyai, antama' todo'i risikonjo assi saponna Aristobulus.

¹¹ Sallangku mange ri Herodian, bahaang julu kampongku. Sallangku mange ri iyai antama' todo'i risikonjo assi saponna Narkisus, turie' injo lalang ri Karaeng.

¹² Sallang mange ri Trifena na ri Trifosa, tuterasa injo bukunna anjama lalang panjampangi ri Karaeng. Sallangku mange ri Persis, tukukamaseang, tuterasa injo bukunna anjama lalang panjampangi ri Karaeng.

¹³ Sallangku mange ri Rufus, tau pileang injo ri Karaeng, na sallangku todo' mange ri idonna, tau kurapang injo todo' idongku.

¹⁴ Sallang mange ri Asinkritus, Flegon, Hermes, Patrobas, Hermas na risikonjo urang siana' julu katappakang assurang-surangi injo iyai.

¹⁵ Sallang mange ri Filologus, na ri Yulia, Nereus na urang siana' bahinena, na Olimpas, na mange todo' risikuanna tau tangkasa tuassurang-surangi injo iyai.

¹⁶ Assipikatuiko sallang surangang panghau tangkasa. Sallang mange ri kaui battu risikonjo jamaahna Almase.

Pappiu'rangi 16:17-24

¹⁷ Mingka kupainga'ko, urang siana', solanna ingakiko mange ri iyai ri tau appakaammumba injo passisala pahangang surang batu patatto'roang, pa'beserang lalang ripangajarang numaeng injo mutarima. Ia injo liliangi!

¹⁸ Saba' tau appakonjo injo gele anjampangi ri Almase, Karaengta, mingka pomponna jua lajampangi. Lalang ripau burana na ribisara baji'na lakelo sikuanna tau lambusu injo atina.

¹⁹ Kareba ripassala katunrukammu maeng kalangngerammu mange risikuanna tau. Injomo saba'na nakke rannu ripassala'mu. Mingka nukukaa'raki solanna ngissekiko lalang ripassala nubaji', na tangkasa ripassala sipa' daa.

²⁰ Allataala, poong dame salehangang, lassiri lapakaili' Ibilisi rirahangang bangkemmu. Barakka' ri Isa, Karaengta, lapinahangiko!

²¹ Sallang mange ri kau battu ri Timotius, urang sipanjamaangku, na battu ri Lukius, Yason na ri Sosipater baha'-bahaang julu kampongku.

²² Sallang lalang ri Karaeng mange ri kau battu ri Tertius, iamo intu tukupangukirang injo sura' inni.

²³ Sallang mange ri kau battu ri Gayus, tulapabangngi injoa ri saponna, na mange risikonjo jamaah. Sallang mange ri kaui battu ri Erastus, pananro doe' pamarenta, na battu ri Kwartus urang siana'ta. [

²⁴ Barakka' ri Isa Almase, Karaengta, lapinahangi ngase'ko! Aming.] [

Sikonjo kala'birang ri Allataala 16:25-27

²⁵ Ri Ia, tukahasa injo lapakaterasako, – assituru' Injili nukupakabakka' injo na nukupala'bang injo ripassala'na Isa Almase, assituru' passa'bi harasia, nuritaro injo a'bila'-bilangang taung sallona,

²⁶ mingka konni-konnina maeng ripappijanjangammu na assituru' parenta battu ri Allataala nutide' injo la'busu'na, maeng ripappiissekammu ri kitta'-kitta'na sikonjo nabbi mange risikuanna tau lalaurangi mange rikatunrukang katappakang –

²⁷ Ri Ia, kale-kalenna Allataala rassi pangisse', patteteang ri Isa Almase: Sikonjo kala'birang sa'genna situlusu'na! Aming.]