ROMA 15 - Kitta' Passitallikang Bau KAREBA BAJI'

Tau lamma surang tau sa'ga' 15:1-13

¹ Ditte, tau sa'ga' inni, parallui ritanggong kalammaanna tau gele injo sa'ga' na andalalo kasannanganta jua riboja.

² Sikuanna tau ri ditte parallui laboja kasannanganna paranna rupatau laappakasa'ga' rikatappakannai.

³ Saba' manna Almase gele kasannangang kale-kaleNa to'jua laboja, mingka assimpole rie' ta'ukiri, ”Pau pattua-tuainna, nulapatua-tua injo mange ri Kau maemma lataba.”

⁴ Saba' iangase'na nuta'ukiri riolo, maeng ta'ukiri laa'jari pappilajarang mae ri ditte, solanna a'bitantang jarre'ki ripattajalliang rikasabbarang na panyihi-nyihi battu ri Kitta' Tangkasa.

⁵ Bisannabali Allataala, poong kasabbarang na panimu-nimu injo, assare mange ri kau tallasa a'julu akkala pikkirang, assituru' ria'ra'na Isa Almase,

⁶ jari lalang ria'julu ati surang riasse're pau kau appakala'biri Allataala na Amma Karaengta, Isa Almase.

⁷ Injomo saba'na assitarimako, assimpole todo' Almase maeng latarimaki, rikala'biranna Allataala.

⁸ Nukukuangang injo iamo intu: Passabakang kanabaang Allataala Almase maengi a'jari pajampangi mange risikuanna tau assunna' laappakajarre' talli' numaeng lapassareang injo mange ripuwa-puwata,

⁹ na lapakama'ringi sikuanna tau maraeng appakala'biri Allataala kanara pangamaseanNa, assimpole rie' ta'ukiri: ”Injomo saba'na nakke appakala'biri ri Kau ritangngana sikuanna tau maraeng na akkelonga kelong-kelong ri aremMu.”

¹⁰ Sitarrusu'na: ”Sunggulalo, oe sikuanna tau maraeng, surangang umma'Na.”

¹¹ Na rie' pole: ”Pakala'biri Karaeng, oe kau ngase' sikuanna tau maraeng, na lappasammu sikonjo pinangka' appakala'biri ri Ia.”

¹² Sitarrusu'na lakua Yesaya: ”Pamarenta battu ri tuina Isai laammumba, na Ia laammentengi lamarenta sikuanna tau, na mange ri Iamo sikuanna tau lannanro pattajalliang.”

¹³ Bisannabali Allataala, poong pattajalliang injo, lapirassiiko lalang risikonjo kate'neang na dame salehangang lalang katappakammu, solanna rikagassingang Nyaha Tangkasa kala'bi-la'biangiko lalang ripattajalliang.

Paulus lasesei papoonganna nulaukiri injo 15:14-21

¹⁴ Urang siana'ku, nakkemo jarre' ripassala'na kau ma'nassana maeng rassi todo'ko rikabajikang surang sikonjo pangisse' na akkulleko assipiu'rangi.

¹⁵ Mingka, kanara barakka' numaeng lapassareang injo Allataala mae ri nakke, nakke ri antee-tee mae lalang rikabaraniang maeng kuukiri mange ri kaui laa'jari pappiu'rangi,

¹⁶ iamo intu ma'nassana a'jari pajampangi ri Isa Almase risikuanna tau maraeng assimpole katappakang lalang riappala'bang Injili Allataala, solanna sikuanna tau maraeng akkulle ritarima ri Allataala assimpole passidakka nubaji' mange ri Ia, nuripakatangkasa ri Nyaha Tangkasa.

¹⁷ Jari, lalang ri Almase nakke akkulle bakka' nyahaku ripassala panjampangingku ri Allataala.

¹⁸ Saba' nakke gelea labarani appau manna se're passala maraeng, passangadinna passala apa numaeng lageokang injo Almase patteteang ri nakke, iamo intu langurang sikuanna tau maraeng mange rikatunrukang, lalang pappau na panggeokang,

¹⁹ rikanara tanra mara'-maraeng surang kajariang gele injo samara na surangang kahasa Nyaha Allataala. Appakonjomu lalang ripa'lingkaang a'lili' battu ri Yerusalem sa'genna ri Ilirikum nakke maeng appala'bang Injili Almase.

²⁰ Lalang ripappala'bangang injo nakke kurapangi assimpole kala'birangku ma'nassana nakke gelei kugeokang ri tampa'-tampa', numaeng laisseki injomo tau arenna Almase, solanna nakke gelea appaenteng rateang pappoongang, numaeng labua' injo tau maraeng,

²¹ mingka assituru' nurie' injo ta'ukiri: ”Iyai, tugele injopa minang narima kareba ripassala'na Ia, laanjanjangi ri Ia, na iyai, tugele injopa minang allangngere lalapahangi.”

Pattajallianna Paulus lamange ri Roma 15:22-33

²² Injomo saba'na, sangnging rie' halangangku lamange ri kaui.

²³ Mingka konni-konnina, saba' nakke tide'mo pole tampa' panjamaangku ri kampong inni na kanara sallokumo a'ra' lamange ri kau,

²⁴ nakke tajalli ripa'lingkaangku lamange ri Spanyol akkullea assekka ri tampa'mu na assijanjangki, jari kau akkullea muurangi mange konjo, ampa maemmo kuurangiko assijanjang manna sinampe'.

²⁵ Mingka konni-konnina nakke attangnga lalanga lamange ri Yerusalem langerang sokongang mange risikuanna tau tangkasa.

²⁶ Saba' Makedonia na Akhaya maeng ngallemu passamaturukang laassare passidakka manna siso'di' jua mange risikuanna tau kaasi-asi ritangnga-tangngana sikuanna tau tangkasa ri Yerusalem.

²⁷ Katappukang injo maeng lapassamaturuki ngase'i, na injo sitoje'na a'jari tanggongannai. Saba', ampa sikuanna tau maraeng maemmu nguppa dahuang rikasalamakanna tau Yahudi, injo sitoje'na parallu todo'i sikuanna tau maraeng laanjampangi tau Yahudi injo battu rikakalumannyang rie' injo ri iyai.

²⁸ Injomo saba'na, ampa maemmu kujama injo na maemmu kupassareang hassele karesona sikuanna tau maraeng mange ri iyai, nakke a'ra'a lamange ri Spanyol na kampommu lakulalang.

²⁹ Na kuisse'i ma'nassana ampa nakke rie' lamange ri kaui, lakugeokang sukku'i lalang ribarakka'na Almase.

³⁰ Mingka passabakang Almase, Karaengta, na passabakang pangamaseang battu injo ri Nyaha Tangkasa, kupassuroangi ri kau, urang siana', assurangki ngera-ngera ri Allataala lalang ripangera dowaang,

³¹ solanna gelea lakura-kura tau gele injo tappa' ri Yudea, na solanna panjampangingku tujunna Yerusalem latarima baji'i risikuanna tau tangkasa ri injo,

³² solanna nakke surangang kate'neang ambattu mange ri kaui kanara a'ra'na Allataala na nguppa kagassingang surangang kau.

³³ Allataala, poong dame salehangang, lapinahang ngasekiko! Aming.