ROMA 14 - Kitta' Passitallikang Bau KAREBA BAJI'

Ako assare hukkungang ri urang siana'mu 14:1-12

¹ Tarimai tau lamma injo katappakanna manna gele lalagara panguppana.

² Rie' se're tau jarre'i ma'nassana ia akkulle nganre sikonjo rupanna kanre-kanreang, mingka tau lamma injo katappakanna sangga gangang-gangang jua lakanre.

³ Inai nganre, akolalo attua-tua ri tau gele injo nganre rise're kanre-kanreang, inai gele nganre, andalalo assare hukkungang ri tau nganre injo, saba' Allataala maeng latarimamu tau injo.

⁴ Inai todo'ko, na muhukkungi atanna tau maraeng? Ia ammentengi, iyareka a'dappe'i, injo tanggonganna to'jua tau lapaa'jari injoi ata. Mingka ia latulusu ammentengi, saba' Karaeng a'kahasa lajaga tarrusui ripammentenganna.

⁵ Rie' tau larapangi allo se'reang la'bi paralluang na ri allo maraeng, mingka rie' todo' tau maraeng larapangi allo injo assimpole ngase' juai. Parallui sikuanna tau jarre' toje' lalang ri atina.

⁶ Inai a'bitantang rise're allo attantu, ia lageokangi injo rkanarana Karaeng. Inai nganre, ia lageokangi injo rikanarana Karaeng, saba' ia appanai' sukkuru mange ri Allataala. Na inai gele nganre, ia lageokangi injo tujunna Karaeng na ia sukkuru todo'i mange ri Allataala.

⁷ Saba' gele rie' manna se're tau ri ditte attallasa tuju kalenta to'jua, na gele todo' rie' manna se're tau mate tuju kalenna to'jua.

⁸ Saba' ampa attallasaki, injo ditte attallasaki tujunna Karaeng, na ampa mateki, injo mateki tujunna Karaeng. Jari, baji' tallasa iyareka mate, injo ditte anunnaki Karaeng.

⁹ Iamo injo saba'na Almase maemmu mate na attallasai muliang, solanna Ia a'jari Karaeng, baji' risikuanna tau mate, iyareka risikuanna tau attallasa.

¹⁰ Mingka kau, ngura kau ngadeli ri urang siana'mu? Iyareka ngura kaui attua-tua ri urang siana' julu katappakammu? Saba' ditte ngase' paralluki lamange ri kadera pangadelanna Allataala.

¹¹ Saba' rie' ta'ukiri: ”Saba' Nakke tallasa, appakonjomu pauna Allataala, sikuanna tau laa'kolantu'i ri a'rakangKu. na sikuanna tau laappakala'biri Allataala.”

¹² Appakonjomu sikuanna tau ri ditte ngase' laassare tanggongjawa' ripassala kalenna to'jua mange ri Allataala.

Ako a'bua' patatto'roang ri urang siana'mu 14:13-23

¹³ Injomo saba'na, andalaloki assihukkungi poleang! Mingka la'bi bajikangi kaui minahang ripanguppa inni: Andai ripaa'jari urang siana'ta a'dappe' iyareka tatto'ro!

¹⁴ Kuisse'i na jarre'a ri Karaeng Isa ma'nassana gele rie' manna se're nurammasa battu ri kalenna to'jua; sangga ri tau larapang injo jua ma'nassana rie' se're nurammasa, mange ri tau injo iamo injo rammasa.

¹⁵ Saba' ampa mupa'risi atina urang siana' julu katappakammu rikanara passala rinumukanre injo, kau gele tommoko tallasa assituru' passuroang pangamaseang. Akolalo pakadaa urang siana' sikatappakammu rikanara kanre numukanre injo, saba' Almase maeng lakamatei todo'i.

¹⁶ Kanara injomo, ako pa'biangi kalemmu ritua-tuai passala apa nubaji' ri kau.

¹⁷ Saba' Pakkaraengang Allataala gele passala kanreang na inungang, mingka passala kanabaang, dame salehangang na te'ne pa'mai' lalang ri Nyaha Tangkasa.

¹⁸ Saba' inai jua anjampangi Almase lalang rita'ra appakonni, ia baji'i ri Allataala na rikangalikangi ri rupatau.

¹⁹ Injomo saba'na maemuki a'boja apa nuappabattu injo dame salehangang na nurie' injo matu-matunna laassipakaterasa.

²⁰ Akolalo panraki jama-jamaanna Allataala rikanara passala kanre! Iangase'na intu tangkasa, mingka silakamu tau nganre injo napassabakang ri injo, appakatatto'ro tau maraeng.

²¹ Bajikangangi kau anda nganre assi binantang iyareka nginung anggoro, iyareka anggeokang se're passala nulapassabaki injo urang siana' julu katappakammu tatto'ro.

²² Kajarrekilalo nurie' injo ri kaui, mange ri kau to'jua ri a'rakanna Allataala. Sunggulalo, tugele injo lahukkung kalenna lalang rilarapanna baji' nulageokang injo.

²³ Mingka inai jua bata-bata, ampa ia nganre, injo ia rihukkummu, saba' ia gele lageokang assituru' katappakanna. Sikuanna nugele assituru' katappakang, iamo intu riare' kadorakaang.