ROMA 13 - Kitta' Passitallikang Bau KAREBA BAJI'

Tunru' mange ri pamarenta 13:1-7

¹ Sikuanna tau parallui tunru' mange ri pamarenta rateanganna, saba' gele rie' pamarenta assala'na nugele battu ri Allataala; na sikonjo pamarenta rie' injo, ripattantui ri Allataala.

² Injomo saba'na inai labaliangi pamarenta, ia labaliangi intu nulatantuang injo Allataala na inai lageokangi, laappabattui hukkungang ri kalenna.

³ Saba' ampa se're inni tau a'geo' baji', ia andamu malla' ri pamarenta, injo jua ampa daa geo'na. A'rakiko tallasa gele malla' ripamarenta? Geokanglalo nubaji' inni languppaiko pappakala'biri battu ri ia.

⁴ Saba' pamarenta iamo intu atanna Allataala rikabajikammu. Mingka ampa daa sipa'mu, malla'moko mange ri ia, saba' gelejua ngurana pamarenta assele' pa'dang. Pamarenta intu atai ri Allataala lalapa'balasangi kuku'na Allataala mange risikuanna tau daa injo sipa'na.

⁵ Injomo saba'na parallui ripatunru' kalenta, gele sangga rikanara kuku'na jua Allataala, mingka mange pole ripauna ati alusu'ta.

⁶ Ia todo'mo injo saba'na jari a'bajarako bea. Saba' sikuanna tau appassilolongang ripassala injo pajampanginna Allataala.

⁷ Bajarai mange risikuanna tau nuparallu injo mubajara: sima mange ri tau harisi injo lanarima sima, bea mange ri tau harisi injo lanarima bea, malla' mange ri tau harisi injo lanarima kamallakang na ngali' mange ri tau harisi injo lanarima kangalikang.

Pangamaseang panyangkaki ri hukkung Tora' 13:8-14

⁸ Akolalo kainrangang manna mange ri inai jua, passangadinna kainrangang pangamaseang rise're tau mange ri tau maraeng. Saba' inai jua lakamaseang paranna rupatau, ia maeng sangka'mu ri hukkung Tora'.

⁹ Saba' parenta: Ako assangkili, ako muno, ako a'lukka', ako sinna matammu, na parenta maraenganna, rie' ngase'mu lalang ripau inni, iamo intu: Kamaseangi parammu rupatau assimpole mukamaseanna kalemmu!

¹⁰ Pangamaseang inni gele a'bua' nudaa mange riparanta rupatau, kanara injomo pangamaseang intu panyangkaki hukkung Tora'.

¹¹ Passala inni parallui mugeokang, kanara muisse'na hattu konni-konnina, iamo intu ma'nassana larapi'mu hattunna ri kau laambaung ritinro. Saba' konni-konnina kasalamakang injo la'bi ambanimu mae ri ditte na injo rihattu ampata a'jari tappa'.

¹² Sallomu bangngi, na seppa'mu sinara. Injomo saba'na maemuki ribokoi sikonjo panggeokang rikalammang na runrungi pakeang sinara injo!

¹³ Maemuki tallasa baji' assimpole tallasa rihattu allona, anda lalang ripa'roa'-roakang na kahujaang, anda lalang ripassangkilang surang napasu daa, anda lalang ripa'beserang na siriati.

¹⁴ Mingka pake Karaeng Isa Almase na akolalo turuki panggeokang assipa' tau inni lalapa'rupai a'ra'na.